香港人唔係鍾意去旅行，而係唔想留喺香港

香港人好鍾意飛，甚至可以話係用盡方法飛：有長假期要飛、搶到平機票要飛、辭咗職要飛、甚至星期六日都可以飛。香港人係咪真係咁想探索其它國家呢？又唔係架喎，好多人一年幾轉都係飛日本，仲要係例牌東京大阪，仲要去親都係嗰幾個地方。唔係想睇多啲個世界，唔係想體驗當地民情，嚟嚟去去都係嗰一兩個行情，點解香港人都咁鍾意飛，飛得咁密？當然有好多嘢食要去到當地先好食係一個原因，但仲有一個更大嘅理由令香港人咁做。

香港依個地方真係好令香港人反感。

喺香港，由你起身嗰一刻開始你就離唔開無助同壓力：一家人迫喺二三百呎嘅屋企、打開電視係無盡嘅財經新聞、出門口追車避免遲到、返到公司就做唔停手直到放工、出街發現冇咩鋪頭係為香港人而開、地產鋪寫住窮人恩物都要四百萬、然後同一眾打工仔迫巴士返屋企、再攰有關愛座都唔敢坐、最後比幾廿蚊先有個頹飯可以做晚餐。喺一個咁嘅地方你好難怪人寧願儲少啲甚至唔儲錢都要飛，因為對佢地嚟講張機票就係救贖劵，全靠得到去飛嗰日嘅動力先挨到落去，只有飛機起飛嗰一刻香港人先可以真正鬆一口氣。

點解香港人可以成日去東京大阪都唔會悶？嘢食好食當然係其一，鍾意買嘢可以係其二，但其實飛嘅係咪日本都好，香港人一樣會咁開心，只要佢地身處嘅地方唔係香港——日本只係香港人去慣咗，同埋大家點都有啲戀日嘅情意結咁解。係架，香港人出國真係好失禮，又大聲又冇禮貌成個大陸人咁，我去旅行聽到人講廣東話就會遠離佢地，廢事比當地人當同一類人。不過香港人會咁失禮，或多或少係因為佢地喺香港根本冇真正生活過，佢地未試過可以放低生活上千百種壓力，入一間自已鍾意嘅餐廳食一餐飯，或者行一條有嘢啱佢行嘅街。即係好似細路第一次入迪士尼，第一次見到米奇咁樣，興奮到忘哂形又有幾出奇？

要靠旅行先可以做返一個人，大部份嘅香港人就係咁悲哀。唔似得外國人鍾意用幾個月流浪去感受一個地方同人情，用旅行去擴闊眼界同探索人生，香港人去旅行只係想避難，想抖一抖氣，想感受返自己係一個人。不過想探索世界又點？假就得嗰幾日，可以搵到乜嘢意義？唔洗搵錢返香港生存啊？

你話，做香港人有咩好。

作者：毛言地

你有多久沒去找自己的理想？搏殺一天，回到家，倒頭就睡。 無言，只因生存太累。談理想？妄想； 毛言仍言，只因理想，本就是「理應去想」 http://www.facebook.com/MaoYanDe

閱讀後覺得好，請多多讚好及分享～：）