【塔羅個案】中女不諱言「我有 SP,但我唔會同我老公離婚」

文教 / 最新文章綜覽

 

Hailey 同老公拍咗拖兩年後結婚,當時佢廿九歲,老公大佢幾年,大家各自有份穩定工作,覺得時間差唔多,就按照傳統,結婚,大宴親朋,開始一齊生活。

佢地嘅婚姻生活,喺旁人眼中,雖然未至於話模範夫妻,但兩人生活獨立,各自有各自空間,理應相安無事。

至少表面係咁樣。

「其實我未同佢結婚之前,已經有個穩定 SP。」Hailey 身上帶著淡淡菸酒味,似乎佢喺黎見我之前,提早咗開始佢嘅 Happy Hour,「我老公份工,好悶,同佢個人一樣。」

我做塔羅,一直提醒自己唔可以有偏見、唔可以對人地嘅事情抱住 Judgmental 嘅心態。只不過,聽到 Hailey 咁講,我都係不禁眉頭一揚,內心飄過一句「咁妳又嫁?」⋯⋯當然,我秒速將呢個念頭吞返落肚。

「OK,咁妳係咪想問同老公離婚之類嘅嘢?」我開始洗牌。

「唔係呀,我點都唔會離婚的,我黎只係想問我個 SP 咁耐以黎有無鍾意過我。」Hailey 嘆咗口氣,「佢下個月結婚了,兩個月前話要同我斷咗段關係。」

「妳言下之意係⋯⋯妳對個 SP 有好感?所以佢結婚唔開心?」

「我唔係鍾意佢嘅,但係我無諗過佢居然會結婚囉,佢條女又豬,都唔知點解要娶佢。如果佢無鍾意過我嘅話,我會覺得自己輸咗囉。」

我聽到呢度,有少少火都黎,呢番說話對我黎講,都真係幾難聽。不過我選擇咗深呼吸,點點頭,不作回應,默默指示 Hailey 開牌。

結果出咗黎,Sorry,SP 君由頭到尾,都只係當 Hailey 性伴侶,並無愛情嘅元素喺入面。

「佢真係無鍾意過妳噃。」解牌直接係我習慣 ,至於我用字厚唔厚道,就真係好睇我同你嘅緣份了。面對住 Hailey,我有少少壞心眼,「按照妳頭先嘅講法,妳輸咗噃。」

Hailey 笑住話「哈哈哈咁都好嘅,我怕佢亂咁結婚,一陣寂莫返轉頭搵我,我到時都唔知理唔理佢好呀!」Hailey 並不知道自己的笑容到底有多牽強,「無鍾意過嘅都係好事吖!係咪?妳話係咪先?」

我不置可否,只係輕輕問了一句,「咁下一個問題,妳想問返佢嘅事,定想問下妳老公同妳⋯⋯」

我老公點諗有咩所謂?我淨係想知佢點諗呀!!」Hailey 突然情緒激動起來,眼淚奪眶而出,「我想問佢地結咗婚之後,會唔會長久?佢幾時會搵返我?點解佢無鍾意過我?我衰咩呀?因為我有老公?如果我而家離婚,可唔可以令佢唔結婚?」

「既然頭先都開咗牌話佢唔鍾意你,咁就算你離唔離婚,我相信對佢目前嘅婚姻唔會有影響。」

平時見到客喊,我會提供紙巾、甚至拍拍對方手背以示安慰。不過,Hailey 嘅經歷同埋問題,我實在難以搵到值得我去安慰佢嘅理由。

有種人在關係裡面會顯得非常貪心,要錢,要名,要勝利感,要存在感,唯獨不稀罕真心。

Hailey 係好典型嘅例子。我要的就要得到,已經擁有了的不會放手,但是得不到的,我會想盡辦法搶過來⋯⋯

或者是將它破壞。

Hailey 最後一條問題係「點可以令到人地離婚」。呢種立壞心腸嘅問題,一,實在太超過我的道德底線;二,我相信我副塔羅牌,應該唔會想去解決呢種問題。

結果,反正時間差不多,我義務已盡,乾脆選擇起身送客。

Hailey 好嬲,佢話以後唔會再黎搵我,「你都唔係幫人解決問題嘅!」

我笑,喂老老實實我又真係無咩所謂呀。

 

【塔羅牌個案分享】

後生女教友畀已婚傳教士搞大個肚唔認數
「我想分手,佢話唔好,不如去開房;然後我覺得佢仲愛我」
你話想生仔我咪唔避孕囉,我家下有咗你就叫我落?
名校老師婚外情的故事
四年入面,我睇住個客拍拖、結婚再離婚。
中環高薪厚職女強人求愛篇:我一覽眾山小,但係⋯⋯
有種客人的確可以活得 Single and Fabulous
女人就黎三十歲仲係 A0 係咪就叫有問題?

 

 

 

關於作者:神婆

神婆
非典型占卜師,唔神秘,無形象,除了鐘意聽客人講故事,夜間興趣係打機睇動漫同撚貓。https://www.facebook.com/FortunaMessage

我有回應

則留言

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。