為咗女朋友,我一晚啪十次。

 

作為一個盡責嘅男朋友,就算依個係艱難嘅任務我都好努力咁去完成。雖然換嚟嘅係成晚冇得瞓,而且經過大量體力勞動之後真係好攰,但都係嗰句啦,為咗女朋友一切都係值得嘅。你問我點解可以啪足十次?

因為我屋企真係好多蚊。

天氣一熱,啲蚊就好似全面復活一樣無處不在。唔係誇張,我試過一瞓上床就見到三隻蚊伏咗喺床頭,仲有一隻飛嚟飛去搵機會吸我血,你唔啪死哂佢地根本唔洗瞓——你要吸我血冇問題,但點解係都要喺我耳邊飛?話說噚晚我女朋友嚟我度過夜,正當我地一齊上床瞓嘅時候啲蚊又開始發功,就算我開咗冷氣個情況都係冇變過。

面對咁嚴重嘅蚊患我女朋友開始勞氣,為咗一個安寧嘅夜晚同埋女朋友可以有教好瞓,我決定起身做個戰士上陣殺敵,同啲蚊死過。我出廳拎起一個電蚊拍再返入房應戰,見到有隻蚊唔識死喺我面前飛過,二話不說拎起電蚊拍一嘢達哥式「轟呀」拍落去。隻蚊中到應一應,但即刻就飛返上嚟,仲要撞落我塊面度。

原來個蚊拍冇電。

屋企冇哂筆芯電,蚊拍即刻變咗廢物。但喺女朋友面前我又冇可能認輸,所以唯有用返最傳統嘅辦法:用手啪。可能平時太依賴電蚊拍,雖然我對手不停喺度啪唔停,但命中率真係低得可憐,啪咗成半粒鐘都只係殺到小蚊三四隻。時間一分一秒咁過,我女朋友又攰但係又瞓唔著,為咗唔會最後落得我要瞓廳嘅下場,我一路啪一路諗緊可以用嘅方法。突然間一下靈光一閃,我停低手上嘅動作,任由其中一隻蚊喺我雙手中間溜走。我叫女朋友行一行出廳先,留多啲空位比我決一死戰,然後喺個櫃入面拎咗個吸塵機出嚟。

任你飛得再快,都唔會係吸塵機嘅對手。喺我將吸塵機開到最大嘅情況下,根本唔洗啪落去,啲蚊都會比支吸塵管扯落個吸塵袋,唔洗五分鐘,間房再冇蚊嘅蹤影。我同女朋友終於可以再次瞓上床,享受二人嘅時光。我隻手沿住佢個玉背慢慢掃落去,一邊同佢講「而家時間仲早,我地不如⋯⋯」

佢已經瞓到打哂鼻鼾。

睇嚟,我都係冇得啪第十一次架啦。

 

 

作者:毛言地

毛言地
你有多久沒去找自己的理想?搏殺一天,回到家,倒頭就睡。 無言,只因生存太累。談理想?妄想; 毛言仍言,只因理想,本就是「理應去想」 http://www.facebook.com/MaoYanDe

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 179913
Date: 2018-05-04 16:36:13
Generated at: 2021-05-13 16:57:31
Permalink: https://www.vjmedia.com.hk/articles/2018/05/04/179913/為咗女朋友,我一晚啪十次。