口語寫文,上唔到大台

 

呢種講法真係刺中左係講故台出身既人既痛處。

係,邊個寫故都應該俾人咁樣兜口兜面屌過。尤其係當你個故有番咁上下人睇同推,你深慶自己得米既時候,就會有啲好似額頭鑿住我係讀正統中國文學出身既粉人出黎留言指摘你,你寫既野根本就唔合文法,亦都無文學價值,即係登唔到大雅之堂囉。之後你如果想同佢對多幾句,佢肯定就會拋幾個張愛玲西西劉以鬯出黎,浸鬼死你。最後總會係「我唔會再同你呢啲三教九流一般見識」作結。屢見不爽。

其實寫咁耐文我都唔知個大台係乜。究竟大台係咩黎?有大台係咪真係好野?如果我進佔左大台,會唔會又有人同我講大台係鬼要拆大台?唔知呀。其實你話要辯論你一定又要想援引下任白既粵曲戲寶對白呀,或者係香港作家用口語寫小說做例子等等。倪匡或者係亦舒紅左果陣仲癲,索性用上海話寫埋落去,一樣所有人照睇不誤。但梗係啦,你無話語權,就梗係注定俾人一野打爆。

大台小台我依家一於好無理。亦都唔會再為呢啲所謂價值拗黎拗去,因為到最後唔會有好結果。只不過,去到我自己可以控制既生成器內容,我就絕對唔會寫野去理咩所謂文學價值。大學時代如果你都好似我咁曾經匿埋係圖書館對住一堆堆文本自己去穿鑿三十幾四十版有過百個footnote 既term paper,就會明白所謂發掘出黎既文學價值。文本,只要有好多人去drill,咪會自動產生文學價值,反之就真係膠都費事俾囉。寫到呢度,我諗起一個實驗:

世界知名小提琴家拎住個好貴既小提琴係返工時間去美國某車站演奏左幾分鐘,所有路人無人認出,甚至對佢不屑一顧。呢個真係一個相當大既笑話黎,希望一D都有意用粵語寫野既朋友仔黎講,都會有一啲啟發作用。

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 179975
Date: 2018-05-05 17:49:44
Generated at: 2021-10-24 11:59:56
Permalink: https://www.vjmedia.com.hk/articles/2018/05/05/179975/口語寫文,上唔到大台