【產經輔仁】AV 時代將臨

 

早幾個禮拜發生咗一單史無前例嘅交通意外,無人駕駛自動車(Autonomous Vehicles,簡稱AV)撞死人。比電動車更進一步,AV自動車為改變我們的生活,影響係全面嘅。

我們在這裡不討論AV自動車的技術問題,反正認路、防撞、應變等等,只要投入時間同金錢,就會解決。我們這些不懂技術的人,也不必理會AI如何解決撞細路定撞人群的道德meme,我們應該關注嘅係錢途。

喺外國,報章話已經有的士公司落柯打大批大批咁買自動車,外國人工貴地方大,自動車有好好嘅規模經濟效益。而且,自動車研發公司會俾呢啲的士公司優惠,通過自動的士嘅高用量嚟積累行車數據,AI係需要好好習習嘅,佢地係差一個機會。再者,外國公共交通缺乏,無車等同無腳,又平又安全嘅自動車,甚至可以作為社會福利用以接載老人病人。只要唔請人,自動化機器嘅成本平好多。外國會在這方面行得好快。

當自動車的士在外國普及,首當其衝嘅會係下價車,當搭的士平過養車,點解要買車?有統計話,私家車嘅使用率(Utilization rate)只有5%,如果做過車主就道,部車停在車場嘅時間多過在路上行嘅時間。咁低嘅使用率,如果自動車多到可以隨傳隨到,點解要買車?而Uber等租車公司,都係自動車嘅尋在大買家,佢地擁有大量人群嘅出行數據,隨時可以轉型,唔使Call人地架車,自己出自動車就食晒份車錢。事實上,有啲車廠已經接定租車公司嘅大單。

我估計外國就十年之內會有自動車的士在各大城市服務,香港會唔會有呢?會快定慢呢?我諗最大嘅阻力會係的士司機同的士牌車主,佢地嘅政治代理人會阻礙自動車的士在香港周街行。因為,自動車的士的數量一定會大大高於現時嘅的士牌數量先會達到規模經濟效益,除非自動車的士一開始就俾呢班權貴壟斷,如果有新玩家入場,首先係牌價急跌,然後市場競爭嘅結果係人揸的士無運行。依家的士牌同司機好多都係投共嘅本土權貴,但佢地未必有魄力同財力去玩自動車的士,呢件肥肉好可能係大陸巨頭食埋,差在留番幾多俾佢地做「遣散費」。反正呢班友呢十幾廿年都搵夠移民,賣港最後一煲喇,佢地會賣到個好價錢嗎?

既然有AV的士,點解唔可以有AV巴士?無錯,已經有無司機巴車嘅概念。而且,呢種自動車巴士由AI決定路線,通過實時組合唔同乘客嘅上車地點同目的地,自動車巴士可以路線次次不同。香港搭的士有泥鯭的,呢啲係人腦。台北有App可以召集同路人然後叫巴士公司開辦路線,快靚正,得到好多市民正評。呢啲App正在收集數據、改善算法,將來只需要將揸車個司機炒魷,換上自動車巴士,就可以開始規模營運。消費者得益,老闆賺得更多。香港嗰啲巴士公司,而且見到自動車巴士有利可圖、在外國行之有效,都會跟風轉型,反正研發已經由外國做好咗,賺錢可樂而不為?

私人方面,好有錢嘅家庭會先引入私家自動車,老人家要出門,太太要去行街,細路要去返學,工人要去買餸,佢地會炒咗個多咀、八卦同花錢嘅司機,自動車隨傳隨到,唔會走咗去唔知邊度,安全、可靠,更加唔需要管理。見識過大戶人家就知,佢地嘅所謂「下人」,係好好福利架,鉅富如李超人,會送層幾百萬嘅樓俾退休嘅家傭。有錢佬寧願俾多兩個錢,好過有內鬼爆陰私,甚至有挺而走險嘅去標老闆參就得不償失。總之管少個人,善莫大焉。我估計,自動車落地之日,就係嗰啲私家車司機失業嘅時候。

有錢嘅用私家自動車,無錢嘅用自動車的士,咁重有無人買「人揸車」呢?有,就係嗰啲玩跑車嘅,當揸車係運動嘅人囉。歷史重演,揸車由一種生活同謀生技能變成運動好消閒消費。就好似火車同汽車代替馬匹一樣,騎馬同駕駛馬車成為咗一種退役生活技能,變成運動。騎馬、馬術係運動,可以去奧運,而唔再係衣食住行嘅一部份。以後,賽車、揸車係運動,唔再係衣食住行嘅一部份。生活都靠AV自動車。

咁啲司機失晒業,有無咩嘢新興行業可以替代?

可惜,我諗唔到。可能會有少數人可以轉業去「服務」啲自動車,但不可能一對一的比例。加上可能連維修車都可以自動化,拖壞車返車俾大型維修站的機器人嚟維修保養,模組化零件根本槪念係連整都廢事,換個新嘅模組又行得番,舊嘅回收廢料重煉。到時真係連整車呢行都只係剩番嗰啲研發嘅工程師或者係服侍跑車嘅「真。技師」。

人呀,路行到盡就會搵到出路,唔擔心得咁多。反正,自動化的潮流不只揸車。外國某大運動鞋牌子已經可以3D Printing嘅現場度腳造鞋。一個一個行業隨住AI同機器人嘅普及而變天。

正如某位已過世股評人話齋,未來係搵食容易、發達艱難。咁多嘢自動化,無工開,希望到時真係可以唔使做就有飯食有屋住。

另外,AV仲會影響車位同停車場嘅價格,依家香港有啲車位嘅價錢貴過間中價屋,停車場呢就泊兩個鐘貴過一餐飯。當AV的士周街走時,車位需會唔會暴跌?呢個時候去買,會唔會變成接火棒呢?想投資車位同開停車場嘅人真係要諗清楚。自動車係識得自己返屋企架,有錢人仲駛唔駛在市區泊AV?啲又窄又刁鑽嘅車位第時搵邊個租呢?

 

【專題:產經輔仁】

 

作者:白恩樑

好讀書,不求甚解,每有會意,便欣然忘食。(陶潛《五柳先生傳》) 為天地立心、為生民立命、為往聖繼絕學、為萬世開太平。(張載) 子曰:「飯疏食,飲水,曲肱而枕之,樂亦在其中矣。不義而富且貴,於我如浮雲。」(論語.述而) 創業要準備一桶血,而最大的創業就是打天下。(王強,《亞洲週刊》訪問2009)

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 180118
Date: 2018-05-08 21:54:29
Generated at: 2020-10-30 09:25:12
Permalink: https://www.vjmedia.com.hk/articles/2018/05/08/180118/【產經輔仁】av-時代將臨