【神婆趣談】為咗結婚可以去到幾盡?港女逼婚大法合集

 

今日唔同大家講「結婚到底為乜」「嫁唔出係咪等於有問題」呢啲咁 Heavy 嘅 Topic,我地輕鬆少少,我想同大家分享下我見客、又或者喺客口中聽返黎嘅各種有趣「逼婚大法」。

香港地,逼婚,通常係女方採取行動的;而當中有部份方法,我聽完都覺得各位後生女,當面對男朋友唔係好有結婚意欲嘅時候,到底會點做呢?事不宜遲,馬上同大家分享。

 

【一、直接問「我地幾時結婚?」】

呢種方法當然就直截了當,但係同時係最嚇死男朋友嘅逼婚方法。

係呀,可能你會覺得「咁佢無諗法,我又唔想估估下,做人直接啲唔好咩?」呢點我認同,但大前題係:家下你男人唔想結,你咁問,佢答你「好」或者「唔好啦」都係死路一條架啫,成事率好低架!我見過有客咁樣問完,逼婚唔成仲被分手,真係⋯唔好亂黎呀。

 

【二、直接 Send 婚紗或酒席資料比男朋友】

呢個我聽完之後真係心生敬佩,叻女呀,問都唔問你結唔結,直接 send 相過黎問「到是結婚我著呢件好無睇啊?」呢種做法,即係連你應唔應承結婚都唔 Q 理吖!你夠膽死講「乜嘢結婚?」「我幾時話要結婚?」呢啲回應呀?

得,你咁講,咪預咗會聽到「你唔想結呀?你唔想同我行落去呀?你無諗將來架?」呢啲反應囉,係咪好有畫面呢?除非你一早就想同條女分手,咁就唔同講法啦。

 

【三、扮哂識人或者有優惠,先斬後奏訂婚紗相或酒席 Package】

我講得出呢啲方法,就當然係我聽過事例啦!認真,我佩服架,佩服到有啲驚;因為我完全想像唔到,喺同男朋友零共識嘅情況之下,女方自己去訂酒席喎,訂婚紗相 package 喎⋯⋯

證明咩?證明呢個叻女呀,有啲積蓄呀!仲有 Guts 添呀!最正係自己比咗舊錢之後,仲要同男朋友扮哂自己有 Discount 唔想浪費,所以先斬後奏、將件事變得懶係合理化咁,直接叫個男朋友揀日子,呢個思路我真係嘆為觀止呀!

 

【四、最老套嘅:搞大個肚】

呢個就大家聽得多啦,整穿個套又好、扮安全期、扮有食避孕藥⋯⋯唔理係咩方法啦,但呢種結婚原因就相信大家聽得多啦。唔小心大肚,同埋有預謀地扮唔小心大肚,係兩回事黎架⋯⋯各位姐妹呀,唔值得架,千祈唔好傻妹地以為大肚=結婚=幸福呀,三樣嘢完全無關係架~

 

女士們學到嘢未?男士們又會唔會內心淆一淆?Err⋯⋯無嘢嘅,輕鬆啲,願天下有情人終成眷屬,Super!

 

【塔羅牌個案分享】

 

關於作者:神婆

神婆
非典型占卜師,唔神秘,無形象,除了鐘意聽客人講故事,夜間興趣係打機睇動漫同撚貓。https://www.facebook.com/FortunaMessage

我有回應

則留言

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。