男人係我嘅Comfort Zone——點解我會疏遠女性朋友?

 

呢幾年發覺自己身邊越來越少女性朋友。男性朋友同女性朋友嘅比例大概係七三左右,而且身邊女性朋友嘅性格都係比較男仔頭(未必係TB,但都係性格比較率直爽朗不拘小節),但係就無d會約埋一齊去食甜品,一齊瘋狂自拍,再 #BBF 擺上IG story 嘅女仔朋友。

一來我係一個唔識得同人維持長期友好關係嘅人,即使曾經日見夜見叫fd 過下,但一旦大家共事嘅日子過咗,我都唔會專登約人出嚟食飯(呢個原因同時應用喺男同女身上,咁點解女性朋友會少過男性朋友?)另外,我諗可能係我自己有意無意咁儘量將所有女性朋友疏遠。(終於肯講真心話!)

坦白講,我覺得女人好煩,然後我作為一個女人,我都覺得我自己好煩。成日忍唔住就會將人哋同自己比較,基本上而家喺條街度行過都有好多又後生又靚女身材又好皮膚又好嘅女仔,每次見到當然自然反應就係會𥄫,然後第二下就會諗既然世界上有啲咁靚嘅人,點解又老又肥又醜身材又差皮膚又差嘅我要存在係呢個世界?其實除咗要我映襯出其他人嘅美好之外,我唔係好諗到其他原因。(又喺度扮慘博同情!)

行街會出事,但其實碌FB 同IG 仲大鑊。因為人人都會喺FB、IG 曬自己最幸福最好嘅生活。當人人都係咁樣曬幸福嘅時候,你就會懷疑其他人嘅標準先至係一個正常人生活應有嘅標準,而自己根本就慘過袋底泥。

作為一個28歲嘅人,大學畢業出嚟做咗幾年野,都應該升左職或者轉左工再加左幾次人工,就算唔係做咩專業,月入兩三萬都好正常,放大假嘅時候飛轉歐洲,去英國行下博物館、去冰島睇北極光、去荷蘭隊下草…真係普通不過嘅事。邊度似我呢啲Loser, 上年先搵到人生嘅第一份長工,每個月賺緊一萬鬆啲嘅人工,死慳死抵幾個月就係為咗去日本風流快活幾日。

作為一個28歲嘅女人,你係應該結婚生仔,其實我都唔想咁諗,但係當隔日就有同齡嘅人被求婚、訂婚、結婚嘅post,就等於不斷咁提醒你正常人嘅人生去到呢個階段就應該做呢樣野咁。但其實我又冇話好想結婚,一諗起要對住一個人一世就覺得好悶,同埋嗰啲所謂一生一世嘅承諾,諗起都想嘔。同埋當好多人結婚嘅時候,其實都有人已結完婚再離埋婚添,令我再仔細啲諗究竟結婚呢樣野有咩意義,然後我真係諗唔到,所以我諗呢樣野都唔係咁適合我。

雖然話唔想結婚,但其實我想生兒育女。自小就缺乏母愛,但唔知點解好想自己做媽媽去養大自己嘅小朋友。雖然我覺得一世人對住一個男人會好悶,但我覺得付出一生所有嘅嘢去養育自己嘅下一代,再睇住佢地成長係我期待左一世嘅事,一定唔會覺得悶同埋唔值得。我有時會覺得我嘅仔女已經喺某處等緊我生佢出黎。當然講咁多都係FF,冇對象又點生仔呀!講真我都真係有諗過借種生仔,不過可惜身邊係好似連可以借嘅優秀種子都無XD每次見到有同齡嘅朋友生咗BB、甚至已經生咗兩個,有d小朋友已經大個都讀幼稚園,都覺得佢哋真係好幸福。跟住睇返自己,一方面會同自己講呢啲野冇得強求,但另一方面都會覺得自己離生兒育女呢一樣野越嚟越遠。

作為一個又肥又老又醜、冇樣冇身材、事業無成,感情生活冇着落嘅loser,為咗唔將自己同其他女人比較,所以只好喺網上unfollow一啲過分曬幸福嘅人,同埋喺現實生活上疏遠會令我心生妒忌嘅女性朋友。

講完點解疏遠女性朋友,都仲未入正題。聽日繼續寫,如果有人睇嘅話,訓先早抖!

 

 

作者:何夢

何夢
大學畢業後無業幾年,自稱專業廢青。而家塭到正職,決定疊埋心水全力邁向廢中之路。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 180178
Date: 2018-05-09 23:24:50
Generated at: 2020-11-29 08:47:10
Permalink: https://www.vjmedia.com.hk/articles/2018/05/09/180178/男人係我嘅comfort-zone-點解我會疏遠女性朋友?