金田一可否不要太寫實

 

 

漫畫有時真係唔好太寫實,特別係啲深入民心,陪住唔少人成長嘅角色。如果太追求真實,有時真係會傷透讀者嘅心。近日日本動漫界又掀起一陣翻炒風,例如龍珠相隔多年後嘅新作評價好壞參半;又例如百變小櫻認真製作廣東話對白令唔少香港fans十分高興。不過我今日想講嘅係,有死神之稱嘅高中生名偵探金田一一,亦都推出新作,不過唔同以前嘅係,佢由不老症年年高中,搖身一變已經變咗個中年人。

唔少7、80後應該記得當年由堂本剛同友坂理惠主演嘅電視劇版《金田一少年事件簿》雄霸整個亞洲市場,原來睇返套試係1995年上演,距今已經二十幾年。呢二十幾年來都有唔少人希望兩人可以重做金田一同美雪呢兩個角色,亦據聞金田一原作者亦都十分鍾意呢個idea,以此為靈感而寫出漫畫新作《金田一中年事件簿》。對於我呢啲睇金田一大嘅人嚟講,見到金田一同我一樣終於步入中年,其實最初都相當興奮,好想知人到中年嘅金田一同美雪已經生咗幾多件,佢嘅仔女會唔會係小學名偵探呢?

可惜,喺新連載入面,金田一同美雪仲未結婚,作者亦都未詳細交代佢哋而家係咩關係,只係知佢哋仲成日會聯絡。好啦咁我呃住自己先,佢哋兩個可能唔想結婚姐。咁你又諗已經37歲嘅金田一,就算無做到警察精英,起碼都係東方福爾摩斯,係個有名私家偵探呀。Sorry,長大後嘅金田一選擇咗喺一間公關公司工作,佢仲對查案相當反感。嚟到呢度,我真係有啲傷感,可能都同金田一一樣到咗三字頭,都明人生係好無奈。漫畫未交代金田一中間發生咩事令佢咁討厭查案,但常理去諗佢中學嗰陣已經成日見死屍,長大後想轉換環境都唔出奇;又或者佢曾經受過好大挫折,令佢唔想做偵探。雖然理性上覺得呢個安排好合理,但情感上總係唔想接受。

而令我覺得最到肉最無奈嘅一幕,就係成為咗公關公司職員嘅金田一,對住啲無禮客人需要吞聲忍氣。有個從事公關工作嘅朋友睇完呢一幕,亦都同我講,「喂會唔會太寫實呀大佬,我平時工作都有好多不快啦,我真係唔想見到細個仰慕嘅漫畫主角,要同我有相同遭遇」。的確,年輕時嘅金田一雖然懶散、咸濕、唔長進,但一查起案嘅時候佢都會表現出佢聰明勇敢嘅一面。大家都一直覺得,金田一仲後生,佢將來一定會成大器啦。點知到作者終於肯畫金田一中年嘅故事,長大後金田一嘅缺點依然存在,相反佢就一直拒絕再表現佢嘅優點。睇到呢度,突然又諗起如果拍真人版嘅時候,要堂本剛飾演中年版嘅金田一,其實可能仲傷fans心,會寧願有啲美好事物永遠存在喺幻想中就夠。

當然,漫畫連載都係剛開始,金田一喺最近劇情已經開始返查案。作為睇住金田一長大,到自己都變成中年人嘅筆者嚟講,都好期望金田一會重新振作,做返個有生氣嘅人,最起碼都希望佢喺而家再遇返宿敵高遠遙一,都唔會畀對方笑佢唔長進呀。或者作為讀者,都會將感情投射喺金田一身上,喺呢個生活艱難嘅年代,都希望心愛嘅角色唔好同自己一樣變成為生活營營役役嘅大人。就算金田一選擇唔再做偵探都好,都希望佢變返一個善良又勇敢嘅主角。

 

 

關於作者:沾屎

沾屎
花生日報創辦人之一,八十後講故佬,自稱人類行為觀察者。喜愛觀察人類,也愛抽水。 FB PAGE: https://www.facebook.com/comeonjames97https://www.facebook.com/PeanutsDailyHK

我有回應

則留言

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。