【扮工奇聞】被害妄想症的兩母女

 

今日,想講下兩母女的故事:

出來社會工作,不經不覺廿年,一直都認為識做嘢好重要!所謂『識做嘢』,是『辦公』而不是『扮工』,只要認真努力工作,假以時日,你一定會得到回報,但係呢兩母女,確確實實地令我體會到,原來呢個世界,識人好過識做嘢!

五年前,阿媽因為認識高層而加入公司行政部,負責影印 filing 寄信等文職工作,翌年佢個讀 IT 嘅女阿 Yan 又係因為呢位高層而破格入了會計部,職位係 Assistant Executive。

一年過去,一個連甚麼是 debit/credit 都唔知嘅 Yan,就係咁,喺會計部浸咗一年,年尾做 appraisal 時,我好認真地同佢傾。。。

我:其實有無諗過跟住點?

Yan:我都唔知呀,不過喺度做好開心。

(下刪一些不太入肉的交談)

我:老實講,我覺得你做嘢係有心機嘅,不過,我覺得你唔太鍾意數字,想唔想轉 IT?

Yan:ummmm 都可以諗下。

我:你想做 Finance 都得,不過要開始搵啲 course 讀下,起碼要知咩嘢係 debit/credit 先。

Yan:好,我會的。(面露感激之情)

傾足個半鐘,眼見身邊無人比意見佢,我好想告訴佢我的經驗/經歷,我唔想佢行冤枉路呀!

與此同時,份 appraisal 是高分的,因為 Yan 做 filing,scanning,拆信確實係做得唔錯!

一個月之後,Yan 告訴我她報了會計課程,兩個月之後會考 LCC & I。

我:好,比心機,有咩唔識就問啦。

兩個月、三個月、四個月、半年過去,間唔中都有問下 Yan 課程及考試情況,每次都係無答案,算吧!自己都做過後生,都明白咩事的!

又一年,今年做 appraisal 之前,高層問我:今年有無諗住升邊個?

我:有,我想升 Fion,佢做咗九年,今年讀埋個 part time degree,可以上 Senior。

高層:好。有無諗過升埋 Yan?

我:無,佢未得,如果要升,起碼要識 debit/credit 先!

高層:但係佢做咗兩年喇喎!

我:咁不如你話我知點解要升?

(當然我係比人 hea 答啦!最後結論係高層會同 Yan 傾,睇下佢想點喎!)

江湖從此多事了。。。首先,阿媽出手,佢開始周圍唱,近至隔離位新同事遠至荃灣舊同事!

原來大家都知呢兩母女有「被害妄想症」喎,大部份聽到阿媽講是非的,都會過嚟話我太天真太傻太後知後覺!

媽:我個女無遲到無早退無請假,咁都唔升佢?

(不遲到不早退不是應該的嗎?同埋佢有攞大假去旅行喎?你仲話個衰女自己去唔帶你去喎!)

媽:高層都話升架,係佢唔抵得我個女嚟咗之後,個個都淨係搵佢!

(佢負責派票喎,唔搵佢搵邊個?仲有,明顯地高層都認同未得啦,如果高層要升你個女,有人可以阻止咩?)

媽:Fion 做啲嘢錯哂,係我個女幫佢執手尾架咋!

(Yan 連 Financial Statements 都未識睇喎,執咩手尾呀?)

比個媽唱到通哂天,Yan 焗辭職,搵到新工後。。。

媽:我個女就醒呀,明知會比人炒,梗係自己辭職啦!

(講得啱!)

媽:我個女好叻呀,個新老闆好睇佢呀,陣間收工要趕住同佢去買 suit 呀,唔似得啲人當佢係草呀!

(定係個女當你係草?)

媽:我個女間新公司好多嘢學呀,返工梗係要學嘢架啦,唔通返工仲要你返學考試咩?

(仲有好多好多三幅被難聽說話,有機會再講!)

輪到個女啲歪理,表面上,阿女係斯文怕醜彬彬有禮的,但原來同事話我知,佢係粗口爛舌刁蠻任性公主癌 (足夠下次開篇新稿再講) !

噢,好懂得掩飾呀,我確定自己係一個死蠢,世事未被我看透!

原來第一年我同佢傾,佢已經同人講話我想迫走佢!

(明明你面露感激之情的?)

又原來,佢覺得如果我要佢讀書考試,係要升咗佢先!

(典解嘅?)

又又原來,佢覺得我做大嘅,要識睇佢性格,如果我想佢考試,係要每個星期每個月咁迫佢架,佢覺得我只係講下,唔係真正想佢考試呀!

(我第一次同你傾,你話我想迫走你,如果我個個星期迫你考試,你會唔會話我想迫你自殺架?)

講真,我為了這件事流過幾滴眼淚的,女人何苦為難女人呢?作為一位媽媽,不是有責任要教好子女嗎?作為一個高層,不是要有獎有懲秉公辦理的嗎?

 

P.S. 阿媽依然健在,大部份人都被佢欺凌過,個個都唔鍾意佢,但係個個都怕咗佢,佢做錯嘢,無人會話佢,有人會幫佢補鑊,所以佢自以為自己做嘢做得好好!你話吖,係唔係識人好過識做嘢喇?

我身邊那位智者立刻有回應:睇嚟唔係兩母女問題喎,好明顯係你高層同腦細出事啦!

 

 

作者:沒有句號

沒有句號
在職媽媽,出來社會工作超過20年,見證了人性的可愛與可恨,很想把這些故事寫下來。

閱讀後覺得好,請多多讚好及分享~:)

其他熱門文章

  • Client 問我點解自己係「仆街磁石」(上) by Professor Chan
    佢自從中學由女校畢業之後就無試過單身⋯⋯連一個月都無。每次同一個男仔分手,佢好快就會同另一個人一齊,佢話佢已經唔記得單身係咩感覺。…
  • Client 問我點解自己係「仆街磁石」(下) by Professor Chan
    依家,你重新行一次,你由出世到依家呢廿五年嘅經歷。好似一段Video咁,由過去,由開始播放,播放到依家呢一刻⋯⋯你可以由得唔同嘅片段喺你個腦入面播放,唔需要去控制佢,一路播一路同我講你見到咩。」我講。…
  • 【國安法自保】除左刪fb post 之外,你應該做乜嘢? by 白木乩
    對於「唔怕」嘅人,已經唔需要睇落去,就義係高尚嘅,歷史會記得你,雖然好多人唔記得左歷史係由勝利者書寫。…
  • 香港人就係純樸到連日本人都可以喺度橫行霸道 by 白木乩
    就算係日本老母來到香港,無左其他日本人嘅目光,無左其他日本人文化監察,無左其他日本人鬧佢「打咩」、「巴加丫囉」、「渣媽」,出名桎梏出名壓抑嘅大和民族,都係會個性解放,係「個性」解放。…
  • 傷J人 by BEAR 兒
    低胸女徑自朝吧枱走去,被緊身裙包裹着的身體玲瓏有致。她走到男人旁邊,向酒保說了幾句,就在吧枱俯身等着,屁股翹得高高的。有容笑了笑搖頭說:「小婊子還挺厲害的。」…
  • 陳偉霆注定是香港人的一道傷口 by 阿享
    陳偉霆現在很紅,紅到他可以和香港完全切割。近年在大陸很紅的人,再怎樣也會偶爾在香港出現。佘詩曼因為《延禧攻略》爆紅,之後成了廠家寵兒,屢屢在香港大小活動出現。同公司的謝霆鋒,容祖兒等,雖然重心在大陸,但也會在香港開show,出歌。就算勢頭同…
歡迎讚好我們的facebook page,免費資訊源源送上。

文章資訊

ID: 180289
Date: 2018-05-12 05:45:59
Generated at: 2020-07-07 01:43:09
Permalink: https://www.vjmedia.com.hk/articles/2018/05/12/180289/【扮工奇聞】被害妄想症的兩母女