【塔羅個案】男性客戶:「又話香港女多男少,點解我無女仔鍾意?」

文教 / 最新文章綜覽

 

我都幾經常聽到有男性客戶咁同我講。你見到呢個題目,你會心諗「喂咁你就檢討下啦」或者「超,香港啲女咁,送都唔要啦」之類。

唔理你係邊種諗法,假如你以單身為樂嘅,當然無問題,因為人生最緊要活得充實,而充實嘅原因唔一定等同你有無配偶。

不過,亦有部分男性係好渴望關係的,以 Mike 為例,佢自稱社交圈子好闊,唔介意識新朋友,「我本身都好多兄弟」甚至認為自己「我識講嘢,同埋都算靚仔吖」云云。

「但係,我就係無女朋友,或者咁講,我次次追親嘅女仔,都會拒絕我,然後避開我。」Mike 神色好沉重,雙手握緊,好似而家講緊朝鮮半島主權問題一樣,「香港明明男仔少啲,點解咁都無女仔鍾意我嘅?」

「咁你呢種心態,同啲女仔一味要結婚,所以求其搵個碼頭嘅做法係一樣架咋噃⋯」我有少少無奈,關係唔係應該要互相欣賞嘅咩?點解喺 Mike 口中,好似變成佢想要「拍拖」,所以求其搵個女仔塞落去都得咁嘅?

我之所以咁講,係因為 Mike 追女仔嘅密度好高,呢個 Reject 完佢,佢就即刻有新目標可以再進攻。

「我咁有誠意,應該會打動上天啩?」Mike 開始忿忿不平,「我身邊啲兄弟呀,性格差過我、個樣差過我,個個都有女啦。我追女仔好比心機囉唔該,我又會送小禮物,又會突發去接人地放工比驚喜人地……」

「你意思即係你追緊人地嘅時候就走去接人地放工?」我呆一呆,即係咁,人地個女仔鍾意你,你同佢去尖東海旁同大陸人逼佢都開心架啦;但如果人地對你無(或者未有)好感,你玩「突發接放工」咁驚……嚇嘅事,真係好咩?

「我想表現我長進同埋係真男人吖嘛!」

我個心,出現咗五百個黑人問號;我個樣,忍得好辛苦先控制到啲面部表情;而我把口,就忍唔到了,「同學你認為做呢啲表面嘢就係顯示自己好 Man 同埋好長進?唔好意思,你認真?」

「喂,咁香港啲女仔係咁膚淺架啦!」

Mike 完全唔知道呢句說話會辣著幾多女性……而重申,我都係一個女性。我望住枱面 Mike 副牌,佢原本黎問兩位異性(Yes,係兩位)對佢嘅感覺如何,而當中有一位,對 Mike 目前印象是幾好的;但係,當佢再問「如果主動出擊,邊個會易啲成事」呢條問題嘅結果,一個就反牌皇帝,一個就塔,簡單黎講就係叫 Mike 返去食風。

原本我都奇怪點解會有咁嘅結果,但係,當慢慢了解到 Mike 對拍拖以及對女性嘅想法之後,我……我無補充了。

「咁點算呀?我幾時先會有女呀?」Mike 好戲劇性地趴喺我枱面,而我,不自禁向後縮咗一下。

「隨緣囉。」你明唔明我有幾無奈先會答出一個咁 Hea 嘅答案?「夾硬黎嘅,你都唔會開心啦係咪?」

Mike 非常失落地離去,而我,好 Mean 咁樣,喺櫃桶拎張張滴露殺菌濕紙巾,抹一抹頭先佢成塊面趴落去嘅枱面。唔好誤會,我為下個客人著想咋。

 

【塔羅牌個案分享】

後生女教友畀已婚傳教士搞大個肚唔認數
「我想分手,佢話唔好,不如去開房;然後我覺得佢仲愛我」
你話想生仔我咪唔避孕囉,我家下有咗你就叫我落?
名校老師婚外情的故事
四年入面,我睇住個客拍拖、結婚再離婚。
中環高薪厚職女強人求愛篇:我一覽眾山小,但係⋯⋯
女人就黎三十歲仲係 A0 係咪就叫有問題?
中女不諱言「我有 SP,但我唔會同我老公離婚」

 

 

關於作者:神婆

神婆
非典型占卜師,唔神秘,無形象,除了鐘意聽客人講故事,夜間興趣係打機睇動漫同撚貓。https://www.facebook.com/FortunaMessage

我有回應

則留言

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。