Steam 冷門game 介紹:Orwell 全民監控

 

Steam呢個遊戲平台十分好,為非主流遊戲提供多咗接觸大眾嘅機會。早幾年斯諾登爆出美國政府多種網上監控,至近日Facebook用戶私隱安全成疑,都令大家質疑究竟喺呢個年代,係咪一上網就等於要出賣晒自己所有資料。今次想同大家介紹嘅game叫Orwell,一聽個名,大家可能都會諗起著有《1984》、《動物農莊》嘅作家George Orwell,無錯,遊戲就係要讓大家感受一下當1984入面嘅全民監控反烏托邦成為現實,人人都可以成為喺網上成為老大哥之後,個世界係幾恐怖。

唔知大家有無睇過一系列外國memes,主要係講緊FBI就好似你最親網友咁,成日監視住你。喺Orwell入面,大家將會扮演嗰個最佳網友,你目的係要利用Orwell系統,查出恐怖份子嘅驚天陰謀。喺遊戲入面,所謂嘅Orwell系統可以理解成一個讓你無視任何密碼,想睇乜就睇乜嘅瀏覽器。而遊戲玩法亦相當有趣,你需要利用瀏覽器喺唔同嘅社交網絡呀、Blog呀、甚至係個人通訊去搜尋線索,而過程中係完全無視被查者嘅私隱。只要你認為嗰個人有可疑,就可以對佢進行全面監控,甚至連佢銀行戶口,電話對話都可以隨便監視監聽。

玩家喺遊玩過程中,可以體現到透過不斷揭人隱私尋找線索,最後砌出完整事件嘅快感。但快感過後,亦會反思,究竟以防止罪案之名,肆無忌憚咁喺人私人E-Mail、WhatsApp對話、甚至連電腦內嘅刪除檔案中尋寶,當中可以見到好多不關案情事嘅私隱,例如連對方情侶間嘅對話都可以一覽無遺,呢種行為究竟有幾大義凜然?遊戲聰明地會利用你嘅上司,佢表明上會指導你點樣有效地完成工作,但同時佢亦會不停灌輸你而家做嘅嘢係救緊人嘅訊息。佢會話你知救人時必然會有犧牲,如果只係犧牲其他人嘅私隱就可以阻止罪惡發生,令到無辜嘅人唔使死,呢種犧牲都係值得嘅。但遊戲同時又會以好多故事細節反問玩家,你肯定你做緊嘅嘢係防止罪惡,而唔係令到人間變得更壞更缺乏互信?

事實上,遊戲創作團隊都講過,佢哋整作呢隻遊戲唔係想帶出咩大道理,反而係想令玩家反思監控呢個問題。筆者覺得呢個遊戲除咗玩法創新外,如果有心其實仲可以仔細咀嚼下佢遊戲中嘅文字,你會發覺製作團隊嘅用心。一路玩你會覺得你係監控緊一個有血有肉嘅人,你從監控佢嘅生活大小事,會更加感覺到網絡世界嘅脆弱同危險性。斯諾登當年選擇匿藏香港,令香港人對美國政府網絡監控問題突然變得貼身、近日facebook事件更加直接影響到大部分網民。喺呢個時候玩下呢隻Orwell,相信大家將會有更多體會。

 

 

關於作者:沾屎

沾屎
花生日報創辦人之一,八十後講故佬,自稱人類行為觀察者。喜愛觀察人類,也愛抽水。 FB PAGE: https://www.facebook.com/comeonjames97https://www.facebook.com/PeanutsDailyHK

我有回應

則留言

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。