男人係我嘅comfort zone——同佢地一齊總有被呵護嘅感覺

 

其實我一直都好羨慕男生之間嘅友誼。男仔之間嘅聯誼活動好簡單,可能就係每一晚一齊打機,每個禮拜出嚟踢一次波,之後再一齊食雞煲。通常坐埋一齊傾嘅都係打機呀、波經呀、AV之類,好少會講自己嘅嘢,更加莫講話傾心事,總之所有野就在心中。通常都係要到有大單野發生,例如某個朋友失戀,先會成班人買一兩打啤酒去海旁,一邊望住個海,一邊啤,再一邊聽失戀嘅朋友訴苦。感覺一切都係好簡單直接同單純。(當然呢個只係我認知中男生之間嘅友誼,如果有不同見解歡迎分享!)

至於女仔之間嘅友誼,相對就比較複雜同埋有機心。女人天生就擅於互相比較同妒忌,即使係幾好嘅朋友,彼此之間都一定會互相比較。喺FB同IG唔難發現兩個女仔面貼面嘅自拍照(最緊要係 #BFF),表面上就情同姊妹,事實上就喺度明爭暗鬥。從佢地嗰個似笑非笑chok出嚟嘅微笑嘴型,就知佢哋心入邊句對白「好明顯我靚啲囉!」、「我今日個妝化得好貼!邊似佢離哂粉呀!」、「我件衫係今季最新款!哎呀!你嗰件好似係上一季喎~」總之有女人走埋一齊就一定會爭妍鬥麗,鬥到你死我活。

同埋你睇戲一定見過有啲靚女會專登搵啲豬西做朋友,目的就係為咗企喺豬西隔離反襯出自己特別靚。我就唔會咁嘅,一來我唔係靚女,二來就係太醜樣嘅豬西我係唔會同佢做朋友嘅!但另一方面,我都會盡量避免同靚女做朋友,廢事自己會變咗嗰個映襯人嘅豬西啦!講真靚同唔靚都係比較出嚟嘅,你擺一個你識嘅靚女上電視同啲藝員比較,可能又會差一截。所以女人總係有意無意咁樣製造一個好嘅環境比自己表現,營造一啲虛假嘅優越感,講到尾都係自己呃自己。

仲有,你同得女人做朋友,就預咗佢哋會係你背後講你壞話。有時越好朋友嘅,其實背後就講得越多。因為有啲女人就係鍾意是非當人情,你同得佢越好朋友俾佢知道越多秘密,佢就會好似大聲公咁將你嘅秘密唱開晒。因為其他人知道條八婆有好多呢啲是非同埋秘密爆,就會因此而接近佢,去打聽消息又或者純粹八卦下。但係講真,你靠是非同埋八卦去維繫嘅友誼,事實上又有幾fd呀~你嗰頭講完人是非,轉個頭咪又係俾人講返!

同埋人與人之間嘅關係一定有「施」同「受」嘅角色(唔係攻受呀!)或者我講GIVE&TAKE會容易理解啲。感覺上好多女仔都係比較想引人注意同埋得到關心,所以好多時都係take嘅角色。有時兩個女仔對話,就好似自說自話咁,都係自己講自己嘢冇乜真正交流。我份人就好彈性嘅,對住要take嘅人,我好自然就會做GIVE嘅角色。但有時同佢地見完面,會覺得自己個心有啲攰,可能係因為俾得太多力去關心佢地,忽略咗自己本身都需要人關心。係呢個時候我就會好自然揾返啲男仔fd,雖然男仔唔會話好主動咁關心你(通常都係想溝你先會Haha),但佢哋好多都係好好嘅聆聽者,會好有耐性咁聽曬你長篇大論嘅廢話。其實有時自己心情唔好,有對象可以傾訴,抒發咗出嚟已經會舒服左好多。同埋男仔對住女仔,好自然就係會關心同埋照顧多啲,所以同佢地一齊總有被呵護嘅感覺。

其實仲有好多野可以寫,不過夜啦下次再寫!

 

 

作者:何夢

何夢
大學畢業後無業幾年,自稱專業廢青。而家塭到正職,決定疊埋心水全力邁向廢中之路。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 180474
Date: 2018-05-18 03:06:02
Generated at: 2020-10-27 20:28:07
Permalink: https://www.vjmedia.com.hk/articles/2018/05/18/180474/男人係我嘅comfort-zone-同佢地一齊總有被呵護嘅感覺