【神婆趣談】女性被狗公煩可以上網叫春;但男性被痴女纏就只能夠自己忍(?)

 

Ricky 係我一個熟客,識咗佢都好一段日子;佢身高一米八,瘦長身型,驟眼睇有幾分似日本昭和時期男性偶像野口五郎。 Ricky 有一個要好嘅女朋友,兩人互相扶持,恩愛非常;工作方面,Ricky 雖然年紀輕輕,但憑住佢一番努力,喺佢嘅行頭總算闖出一番名堂,絕對係一個叻仔。

睇到呢度,你可能心諗「做咩事?炫耀文?」或者「咁佢仲有乜嘢需要問牌?」,咁係因為 Ricky 係一個非常小心嘅人,有時業務上有啲新念頭,佢都會黎開牌問啲意見。

不過,前排我同 Ricky 閒談到一半,佢個電話畫面突然亮起,接下來係一連串嘅短訊;而 Ricky 一望到堆短訊後,馬上既無奈又唔耐煩地嘆氣。

「有麻煩事情出現?」我半八卦半關心地問,「既然都開咗牌,有咩問題不妨一口氣問埋。」
「嗯嗯,唔關工作事,呢件事唔需要開牌的,只係好煩而已。」Ricky 搖搖頭,「神婆,有無時間聽我少少牢騷?」

剛巧當日時間鬆動,我點點頭,好嘆咁拎起我杯茶,示意 Ricky 慢慢講。

「雖然咁講好似有少少唔好意思,但係有條……Errr,我意思係有位女士……最近不斷想約我同埋聯絡我,去到一個痴痴地線嘅地步。」Ricky 苦笑,「重點係,我有女朋友是很公開的事,我亦好直接地同佢講過,大家之間無發展可能性。奈何佢仲係咁。」

「痴痴地線?」我失笑,「佢做過咩黎?」

「A 小姐就做生意嘅,年紀大我少少。佢都明知我有女朋友,但係都係咁 Send 啲好 Over 嘅短訊過黎。例如係問我『你同女朋友真係無唔開心?』『你真係覺得佢對你好?』呢種問題,一來好唔尊重我同我女朋友,二來好無禮貌,三來,好煩呀大佬!佢有一排係日日 Send 呢啲過黎,做乜啫!」

我露出一個不以為然嘅表情,「佢啲短訊好似咀咒緊你快啲分手咁樣。」

「根本就係!佢對上一次喺 Facebook 見到我同我女朋友食飯打卡,居然打電話過黎囉!我 Cut 線,佢再打,打咗五六次,最後佢 Send 咗個短訊黎話咩『我會等你分手的』咁樣,痴…線架!」

Ricky 大大聲地爆咗句粗口,而我對眼……真係反白眼反到去關島了(點解係關島?因為我最近有客喺關島結婚!係呀講你呀,恭喜哂~)

「點解你會識埋哂啲咁嘅女性朋友嘅?」我沒好氣,「講真,我佩服佢喎,幾坦白吖!」
「喂呀。」Ricky 笑出聲,「本來佢係黎搵我睇下有無生意可以合作到嘅,但生意飯食過一次之後,我覺得大家無合作必要,而且話不投機半句多,所以一路都無再理佢。」

「即係話佢自己一直對你單機?」我有少少驚訝,因為 A 小姐既然自己做生意,我原本認為佢都係啲女強人、好 Tough 好 Cool 咁嘅形象(OK 我睇太多日劇了),如果 Ricky 從一開始就無比個 Signal 佢嘅話……佢哪來的自信,覺得自己三言兩語可以令 Ricky 愛上自己呢?

「不如你自己睇。」

我從 Ricky 手上接過佢嘅電話,睇下 A 小姐呢個月黎對佢嘅「攻勢」到底有幾咁密集。結論係:好密集。Sorry 無咩高潮位安排比大家,因為 A 小姐講嘢都真係幾無禮貌,喺明知 Ricky 有女朋友+同 Ricky 並唔熟嘅狀態之下,我見到呢啲說話:

「喂買咗野比你,幾時拎?」
「我約你你唔比面?」
「你女朋友真係好咩?」

我睇到呢度,由於類似嘅內容太多太長太 odd 太 offensive 太自我中心下略五百字,而我見到 Ricky 全部都 Say「No thanks.」,呢度要注意番:呢句仲要係無 Emoji、有 Full stop 呢種「擺明唔想同你講嘢」嘅超生外英文回覆呀吓!Ricky 都做到咁,A 小姐又何必?

「不過算啦,我女朋友聽完呢件事之後笑到癲咗,因為太有娛樂性喎。」Ricky 眼神中流露出一絲憐愛,「無令佢唔開心就得啦。」

「要放閃嘅就走啦你!」我笑住整理枱面嘅牌,「咁你諗住點呀?繼續由得佢?」
「唔啦,同你講完之後,我都覺得自己到而家都未 Block 佢真係好傻仔。」
「就算傻,都係一個受人歡迎嘅傻仔,叻吖。」我調侃一句,「下次再見啦!希望下次有生意方面嘅好消息,唔好又招惹到呢啲事了。」
「同你講完好咗好多,其實前排真係覺得好 Annoying,但係男人老狗上網講呢啲,我覺得我會比人公審多過被同情。唉。」

咁 Ricky 又真係有先見之明呀~

 

【塔羅牌個案分享】

後生女教友畀已婚傳教士搞大個肚唔認數
「我想分手,佢話唔好,不如去開房;然後我覺得佢仲愛我」
你話想生仔我咪唔避孕囉,我家下有咗你就叫我落?
名校老師婚外情的故事
四年入面,我睇住個客拍拖、結婚再離婚。
中環高薪厚職女強人求愛篇:我一覽眾山小,但係⋯⋯
女人就黎三十歲仲係 A0 係咪就叫有問題?
中女不諱言「我有 SP,但我唔會同我老公離婚」

 

 

關於作者:神婆

神婆
非典型占卜師,唔神秘,無形象,除了鐘意聽客人講故事,夜間興趣係打機睇動漫同撚貓。https://www.facebook.com/FortunaMessage

閱讀後覺得好,請多多讚好及分享~:)

我有回應

則留言

其他熱門文章

歡迎讚好我們的facebook page,免費資訊源源送上。