我愛港女!港女萬歲!

 

兩年幾前開始,公司崗位轉左,我要去做D開山劈石既dirty work,少不免成日飛黎飛去。

每飛完一次,又或者係羅湖落馬州之類過關出黎,踏足番香港既地域,我都會有一層深D既感受,就係:

我愛港女!港女萬歲!

真係唔係講笑,喺香港國際機場出番黎,就算迎面而來即刻亦有一堆飛機場趨近,我都真係拖住個死人行李同埋疲勞既身軀,我都仲會打識得從心底咁笑出黎。甚至心入面即刻講一句:屌,真係好平呀!仆街!

但係就係呢D人,會令我知道,我已經返左黎香港。

係外國,的確好多樣靚身材正既金髮美女。而係贏國,更加唔駛講,點都會贏架,十四億人口,要見到靚女,除非你真係插盲自己對眼先出街,否則去開會,去商業大廈,總會有機會撞到一兩個。

但係靚又點呢,大波過自己個頭又點呢,好似李泳泳咁又點呢。一要講另一隻語言,例如英文,就已經成件事隔左三萬公里咁遠,有D仲要係意籍法籍,其實你唔識意大利粉或者法文,大家都只能夠君子之交,唔好諗住真係交心。西方社會可能都仲好D,如果要對住贏國人講贏語,就更加之想一句起兩句止。就算對方幾可愛幾想同你繼續傾都無用,係自己已經先行無癮左。

可能真係基因問題。但陶傑DNA既野,你係香港以外講,都無人明你UP乜。

你諗下,有時想講一聲屌,然後對方又會意會呢下屌唔係真係屌只係開玩笑既屌,然後又識得同你屌埋一份又互屌,呢下中間既大腦思考同埋推進交流係幾深層次。我相信就算咩人工智能Alpha Go Deep Learn 都好,都有排未計算到究竟幾時屌你係開玩笑屌,幾時屌你係真屌。

而有D真係唔係單係粗口可以解釋到。同一個地方長大,就係有D野會share common ground。雖然我地呢D五十後同依家D靚妹,已經係好撚大代溝,勁過中國同美國果個幾千億貿易逆差,但係從走E道,出關,然後出機場,搭巴士,排隊,見到一大堆港女係度用廣東話向佢地班兵落命令,感覺真係好親切,好撚地道。

我會意識到自己身處既,係香港,唔係異鄉。廣東話呀!我聽到廣東話呀。即使可能港女著黎著去都會係MK風,韓國風,講野說話唔正有懶音,甚至會見到班港女係度西面,開口屌佢男朋友,甚至直接講「我唔係想食呢D呀今晚你明唔撚明呀死蠢!」果陣,我心中真係會即刻俾LIKE。我甚至會有零點幾秒會都願意相信:平胸著衫,真係會好睇D。係得香港先獨有既魅力黎,其他地方都唔會做到!!

我覺得自己可能已經痴撚左線。但係當你成日都離開家園,然後搞完一大堆垃圾做左一堆無聊野老細仲要屌你果陣,jetlag 又會搞到你幾日訓唔到覺,一切都已經好似世界末日The Day After Tomorrow 果陣,你會發現返屋企,見到自己人,始終會feel much better。就好似返屋企見到塔嫂咁。塔嫂唔會話煮麵俾我食,甚至可能只係頭也不抬咁講句:捨得返黎啦?肚餓自己叮公仔點心食啦~BYE~~~

但港女始終係港男心目中,係不能取代既存在。

我愛港女,港女萬歲。因為塔嫂都係港女,所以我愛死佢。

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 180538
Date: 2018-05-19 22:40:11
Generated at: 2021-07-23 17:26:56
Permalink: https://www.vjmedia.com.hk/articles/2018/05/19/180538/我愛港女!港女萬歲!