【真人真事】條件唔錯但十年冇拖拍(三)——不如你試下貼波?係打波

 

(圖文不符)

 

「吓⋯⋯咁我係咪要del晒啲相?」Ada有啲傷心咁問。

「咁又唔係,呢啲係你嘅歷史,冇必要刻意抹去。你而家開心,做人正面啲就得啦。如果有心stalk你,由你第一張相睇返上嚟,見到你嘅改變,都幾impressive呀。」講真,作為一位朋友,我都想Ada正面啲。

「好啦,Sam真係有道理嘅。但我以後up咩相好?」

「佢話過,佢stalk人係想了解人多啲。你可以諗下,你想人地了解到你咩?」

「呃,其實我嘅生活好枯燥,冇咩值得講⋯⋯上次同Sam食飯,我都係聽佢講多⋯⋯」Ada有啲慚愧咁答。頂,怪唔知得佢之前一識Gary,就講工作嘅是非啦,原來佢冇咩好講。

「有嘅,我地發掘下!」我拎咗張白紙出嚟,畫咗個mind map。

我喺白紙中間寫咗「Ada」,再拉咗三條線出嚟,分別寫上「ACO」、「樹仁」、「排球」,以我認識嘅Ada,至少有呢三方面可以分享。工作上,Ada係做ACO嘅,咁又真係好悶,冇咩值得分享,我先略過。學習上,Ada喺樹仁主修英文,佢話過學校太細,冇咩好玩,所以再略過。

「咁排球有啦掛?」我問。

「有嘅,打咗十幾年,雖然大學冇入校隊,但中學攞好多獎㗎。我有入球會,打過下乙組囉。同埋有做球證,有睇開女排賽。」Ada大概都講到啲嘢,我喺「排球」拉咗四條線出嚟,寫上「中學」、「乙組」、「球證」、「女排賽」。

「嗱,就咁睇你都有嘢講啦。有時打完比賽,可以share下啲相,鼓勵下隊員㗎嘛。如果撞到條仔都打開波嘅,一定有計傾啦。」我記得Ada話過,佢好鍾意自己隊波,咁share下都無妨呀。

「係就係,但得排球又好似太少⋯⋯」Ada諗咗一陣。

「你平時做開咩?有冇咩想學?」我再問。

「冇咩呀,買下衫、睇下戲、蒲下囉。冇咩想學。」Ada嘅生活同一般女仔冇咩分別,難搞啲。不過,我照拉多兩條線,寫上「電影」、「clubbing」。

「電影好呀,share啲你鍾意睇嘅戲啦,我諗冇咩人完全唔睇戲掛?去clubbing未必個個都受,你去都係想飲下酒、識下仔喞,調酒會唔會有興趣?」講真同人講你鍾意去蒲,大部分男人都會卻步,要包裝下。

「調酒?得喎。我都有睇過書,跟住調過一兩杯。」Ada好似搵到啲方向,拎起筆,刪去「clubbing」,改為「調酒」。之後,我地兩個越寫越多,Ada唔止搵到好多Instagram素材,仲發掘到新興趣。

後來,Ada 逐漸改變自己,Instagram記多咗開心嘢,成個頁面多咗色彩。同佢打波時,我睇得出佢個人都開心咗。佢之後仲因為打波,識多咗一兩個potential boyfriends,有發展下,雖然未成功,不過都叫有進步呀。

其實,好多奇女唔係冇桃花,只係佢地有問題,又唔知問題喺邊,先會成為奇女。如果真係搵唔到問題,不妨同男士交流下,問下佢地意見,或者會有幫助。同時,必須認識自己,愛錫自己,先有人錫你㗎嘛。

奇女加油!

 

【真人真事】條件唔錯但十年冇拖拍

(一)二十五歲眉清目秀身材豐滿性格爽朗,A0?

(二)——你ig 日日放負?

(三)——不如你試下貼波?係打波

 

作者:霏子

霏子
Fayly .Party Host .不務正業、自甘墮落 .香港大學主修文學及文化研究

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 180614
Date: 2018-05-22 06:16:12
Generated at: 2019-09-16 21:41:46
Permalink: https://www.vjmedia.com.hk/articles/2018/05/22/180614/【真人真事】條件唔錯但十年冇拖拍(三)-不