【塔羅個案】女性客人曾受情場挫折,而家終於結婚原因有洋蔥

 

 

唔少網友反映話我分享嘅個案都騎騎尼尼,有時會質疑事件嘅真實性;不如又咁講,如果只係將景常搵工問前途之類嘅人生掙扎寫出黎,或者你地又唔會睇得咁過癮架啦噃(笑)

我只能夠講,一樣米養百樣人,未做呢份工之前,或者我都無諗過天下奇人奇事如此多;如果自己生活平淡,雖未至於幸福,但或者都係一種福氣。

不過,我都唔想做一個只會報憂不報喜嘅人,今日就同大家分享呢個令我聽完覺得好窩心嘅故事。

Karen 今年三十出頭,眼圓圓,笑起上黎幾甜,所以有時佢放假無化妝黎搵我,你話佢係 Fresh Grad 我都信架。佢同好多女性朋友一樣,每當感情上遇到不安或疑問,都會黎搵我開牌,一搵,就搵咗我三年;而呢三年入面,我可以話係陪住佢經歷哂佢上一段感情嘅所有低潮位,亦見證住佢而家搵到幸福,有時,都不禁令我感嘆時光匆匆。

曾經,佢都同好多港女一樣,對結婚充滿憧憬,亦覺得「男朋友要條件好」;而呢啲所謂條件好,不外乎對方工作係啲金融行業呀、學歷高呀、屋企背景好等等。當時佢同一個叫做專業人士拍拖,不過男方就自知自己條件唔差,亦因為年輕,所以頗為自負,認為自己隨時有得揀、隨時可以換畫;關係中「責任」二字,對呢個男仔黎講,似乎難懂了些。

個男仔玩交友 App,同女性發曖昧短訊,Karen 忍;男仔星期五六晚晚出去飲嘢唔覆機,Karen 忍;男仔單獨同另一個新識嘅女性朋友去旅行,Karen 都忍。

不過,當經歷過無數次爭吵,Karen 收到另一位女性傳來「八婆你同佢分手,佢話要同我一齊呀」連同一啲親密合照嘅示威短訊之後,Karen 終於知道要清醒。

呢段關係入面,Karen 其實一齊好努力,佢都唔係坐定笠六等嫁的,男仔阿媽想有人陪飲茶去醫院覆診,男仔一個電話,Karen 就仆倒出去;男仔飲醉半夜三更搵上門,Karen 都一言不發幫佢善後。

不過,呢次情傷,令 Karen 好懷疑「感情」到底真正運作模式係點,所以,佢想法改變了,乜嘢三十歲前要結婚嘅社會問題,算了,唔諗了,唔 make sense 的⋯⋯一旦人放開了某啲執著,生活就輕鬆了些。

Karen 後來開始讀 Master,喺讀書嘅地方識咗位男士,大家算幾啱傾,同埋因爲大家有共同興趣,男士好快就對 Karen 展開追求。Karen 個心雖然有好感,但係同時好擔心又會再次出現同樣故事。

「我個 ex 以前一開始就講到咩都同我好夾,一開始都對我好好……」Karen 苦笑,「但如果結果係唔好嘅,不如做朋友算啦。」

「我又唔係咁諗。」我望住眼前正牌皇帝同埋皇后嘅牌,不禁微笑,「我認真地覺得你可以試下同佢發展。」

Karen 可能因此得到信心,終於同男士開始交往,不過個心始終半信半疑,就算明明兩人相處愉快,「但係,我唔敢諗將來。唔係佢嘅問題,係我唔相信自己。」

事隔將近一年,呢段時間 Karen 少咗黎搵我,咁其實係好事黎的,個客生活順利先唔會成日黎搵我,所以,當佢某日於短訊中話想上黎「請妳食野吖」嘅時候,我個心冒起一個問號。

Karen 拎住一件蛋糕上到黎(大家都好鐘意買蛋糕比我,我是被你們養胖的),臉上帶住不能掩飾的喜悅,手指上一點閃耀。

我笑,「有好事發生?」
Karen 露出甜笑,「我要結婚了。」

無錯,男子向 Karen 求婚了。睇到呢度,你可能會問,又話 Karen 無信心,人地一求婚就嫁?

「我一向唔會 Check 男朋友電話,我覺得咁樣做好乞人憎。」Karen 娓娓道來,「咁佢有兩部電話嘅,一部私人,一部係公司;有人我同佢去街,佢有公事,要 Mark schedule,我幫佢用佢部電話記低,先見到佢個 calendar 入面,每個月有幾日 mark 咗記號。我問佢係咩黎,佢好怕羞咁話,佢有記低我幾時 period,一到嗰幾日,就去啲近我嘅地方食飯,同埋提醒我唔好飲凍嘢,食飯都揀啲舒服啲嘅地方食。」

我聽到呢度,心中暗喊一句 Jesus。

「我聽到佢咁講,我真係喊,一直以黎佢粗枝大葉咁,成日唔記得交電話費要我幫手交;但我無諗過喺我呢啲事上面,佢咁細心。嗰一刻我同自己講,係佢了,係呢個人了。」

我笑,真心好愉悅咁笑。會做到咁樣嘅男仔唔多,會將女朋友嘅事如此放在心上,呢份細心,實在難得。

Karen 一路講,一路笑,仲有少少眼濕濕,「所以佢嗰晚約我食飯,拎札花出黎,我已經喊,係咁點頭,佢忍唔住笑話『我都未講』。」

我望住 Karen,忍唔住拍拍佢隻手,「希望你幸福。」

「我會呀,我相信,今次我信了。」Karen 笑得好開心,「多謝你當時比勇氣我。」

唔係呀 Karen,比勇氣你嘅,係你未來老公,同埋你自己。多謝你比我分享你呢個故事,在此,真心希望你結婚後都一直順利開心:)

 

【塔羅牌個案分享】

後生女教友畀已婚傳教士搞大個肚唔認數
「我想分手,佢話唔好,不如去開房;然後我覺得佢仲愛我」
你話想生仔我咪唔避孕囉,我家下有咗你就叫我落?
四年入面,我睇住個客拍拖、結婚再離婚。
中環高薪厚職女強人求愛篇:我一覽眾山小,但係⋯⋯
女人就黎三十歲仲係 A0 係咪就叫有問題?
中女不諱言「我有 SP,但我唔會同我老公離婚」
男性客戶:「又話香港女多男少,點解我無女仔鍾意?」

 

 

關於作者:神婆

神婆
非典型占卜師,唔神秘,無形象,除了鐘意聽客人講故事,夜間興趣係打機睇動漫同撚貓。https://www.facebook.com/FortunaMessage

閱讀後覺得好,請多多讚好及分享~:)

我有回應

則留言

其他熱門文章

歡迎讚好我們的facebook page,免費資訊源源送上。