自我閹割式的犬儒

The Banana Gayllery 發佈於 2018年5月26日

 

雨革個陣,我地成日聽到人講:
因為唔想激嬲共產黨,
所以你地唔好衝。
因為唔想挑戰共產黨,
所以升旗個陣唔好搞破壞。

於是就有左糾察既出現,
佢地美其名為管理秩序,
但實則意圖係想糾正每個獨立個體嘅行為。

於是佢地唔俾人衝,
佢地譴責人地暴力,
唔俾人講粗口,
唔俾人搞喊細路仔。

我心入面好討厭依種犬儒。
共產黨都未出聲,
一班糾察就企出黎高高在上咁指指點點,
教公眾點樣做先最好,
彷彿佢地睇通睇透共產黨心入面諗緊啲乜,
知道晒共產黨有乜會開心,有乜會唔開心。
所以當佢地做左共產黨心入面條蟲之後,
佢地就會為左討好共產黨而篤灰,
仲要去警察度落口供,想佢地眼中做得唔好嘅人去坐監,
覺得佢地影衰自己,
覺得佢地抵撚死。

到2018年,
佢地因為怕激嬲或者唔尊重共產黨,
連一句講左幾十年既「結束一黨專政」都自我閹割,
提都唔敢提,
依種自我閹割式既犬儒註定左依班人既失敗,
仲要係兵敗如山倒。

到早兩日,
我又見到同志形象糾察嘅出現,
彷彿佢地自己個人嘅主觀價值,
就代表左整個主流社會既價值,
佢地好似清楚知道晒社會各階層對一件事嘅睇法,
知道乜野叫做社會公眾各人眼中嘅好同唔好。

我先唔評論係地鐵互閹係啱定錯,
但我最睇唔過眼有啲講法,
係話「你地唔尊重個社會,
憑乜野要個社會尊重你?」
然後就上綱上線到「有啲基佬強姦細路呀」,
咁會影響到公眾對同志既形象。

依種論調其實好危險,
上綱上線有邊個唔識呀?
高高在上咁話人地做得唔好又有幾難呀?
佢地口中有好多冠冕堂皇嘅說話,
但心底入面永遠唔會講出口嘅個句其實係:
「屌,咪撚影衰我啦,仆街。」

當有人覺得同志唔尊重個社會個陣,
我真心想問一句點樣叫做尊重個社會呀?

如果班老人家覺得兩個男仔拖手係唔尊重個社會,
咁全部同志都應該為左尊重人口老化問題嚴重既香港,
而永世不得拖手?
咁如果班老人家覺得男仔修眉、
化妝同著粉紅色衫係死基佬,
唔尊重個社會呢?
咁如果我地又好似你地上綱上線到伊斯蘭國家咁,
個社會法律都認可同性戀係要處死架呢?

我細個陣唔鍾意玩車仔,
淨係鍾意攞住阿 Ken 同 Barbie 玩,
阿爸成日都鬧我咁樣唔啱架,
但到底乜野叫啱乜野叫錯呀?

我想講嘅野好簡單,
每個人都係為自己而活架,
每個人嘅生命都只需要對自己負責,
大家鍾意拖住自己男朋友行街又好,
鍾意係地鐵錫自己男朋友都好,
都係你嘅自由黎架,
你只需要對自己既行為負責就夠啦。

對於個班形象糾察,
我希望你地高抬貴手,
唔好對別人既選擇同人生指指點點啦,
留番個空間俾人地喘息下,好嗎?
仲有,對於自己人嘅指責夠架啦,
到底我地幾時先會學識去團結呀?

明明自己人就係一班命運共同體,
假如有一日大家終於不再分高下,
不再互相指責,不再怕被連累,
終於學識團結一致,
個股力量絕對大到可以改變政策,
影響我地自己嘅生活同未來。

 

作者:焦總的蕉很腫

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 181358
Date: 2018-06-10 16:57:34
Generated at: 2019-03-19 10:42:27
Permalink: https://www.vjmedia.com.hk/articles/2018/06/10/181358/自我閹割式的犬儒