我又唔靚仔,又無錢,仲要有愛滋,我地分手啦!

 

(photo via cc Flickr user Guillaume Paumier)

 

測試員:你測驗結果呈陰性。
Rex:有冇睇清楚呀?
測:一條紅線,冇錯。
Rex:會唔會張試紙出錯,要唔要做多次?
測:如試紙呈陰性,係100%準,唔需要做多次。
Rex:可唔可以同我partner講我都係陽性?
測:先生,其實呃唔到㗎,做唔到確診紙。
Rex:我好怕冇左佢。
測:呢d事情,我地都唔係第一次聽。頭先,我幫佢測試時,佢都有同我講,如果你冇感染,佢就會同你分手,唔想害你。不過我有同佢講,感染者呢,唔使呢一世都冇性生活既。只要係性行為時,做足d 安全措施,確保唔感染對方,係絕對有方法既。只係,未詳細講,諗住幫你做完測試後,先一次過同你地講解。
Rex:真係有方法?
測:係呀,不過我要先確定你唔介意佢受感染,希望同佢繼續一齊。
Rex:係。
測:我一陣同你地講解完病理同方法,睇下可唔可以令佢留低。
Rex:希望佢聽你講。
測:我地去返隔離房。

 

Rex:我冇事。
Jacky:太好啦,如果你因為我而感染,我會內疚一世。(強忍眼淚)我地之後做返朋友,我唔想害你。
測:不如兩位先聽我講解一下基本病理先,同埋一定有效預防方法,之後再考慮繼唔繼續段關係。
Rex:你聽左佢講先啦。
測:首先,治療愛滋病既藥物呢,而家已經好進步,一日食一至兩粒,副作用好快適應,持續keep住食藥,一世唔病發。健康壽命呢,係有可能同Rex一樣,分分鐘會比佢長命既。預防方面,只要感染一方食藥,令體內病毒指數壓抑至undetectable,就會失去感染人能力架啦。但係,當然啦,唔係叫你唔用套呀,因為你唔用套,仲有機會中梅毒之類既其他性病。
Rex:有方法,會冇事架,你放心啦。
Jacky:萬一有咩出錯咁點?我覺得自己好污糟,唔配同你一齊,成為你負累。
Rex:頭先同事咪講左,你肯醫,健康壽命同我一樣,點會係負累呀。就算畀你感染,我都唔介意,我唔會因為一個病而放棄你,一齊面對啦。
Jacky:你畀d時間我,我真係介意自己,比我好嘅人多的是,點解要為我犧牲?
Rex:點可以話係犧牲?係愛呀,我地一齊依三年都唔足以證明?(都忍唔住喊)
Jacky:你畀d時間我考慮。

兩個月之後。

Rex:我究竟要做d咩你先信我真心鍾意你呀?愛滋病,有咩咁大不了呀?
Jacky:我又唔靚仔,又無錢,仲要有愛滋,我諗唔到點解你會鍾意我。
Rex:由頭到尾都係你自己睇唔起你自己,依兩個月我做盡野去證明我愛你真係好攰……你咁想我走,得啦,我地分手啦。
Jacky:拜拜。

Rex跟Jacky最後分手收場,Jacky一直不能接受自己,不相信感染者會被愛,事後斷絕跟Rex聯絡,還患上焦慮症,大大影響生活。

類似情況一直於不同感染者身活上發生,這並非個別個案,自我歧視比直接被歧視更常見,感染者將外界標籤內化,往往會首先選擇放棄自己本來所擁有的東西,大大影響日常生活。

 

 

關於作者:愛滋健康關注社

愛滋健康關注社
創立於2016年12月1日。我們是一班由愛滋病病毒感染者和我們的家人與伴侶一同成立的病人組織,目的是協助感染者處理由感染身份帶來生活中各樣困難,推動感染者社群助人自助,同時透過本社,將感染者聲音帶入社區,讓大眾更了解。我們除支援個人需要和困難外,還致力推廣愛滋病教育、消除歧視工作及推動社會各界對愛滋感染者政策關注與支持。

閱讀後覺得好,請多多讚好及分享~:)

我有回應

則留言

其他熱門文章

歡迎讚好我們的facebook page,免費資訊源源送上。