豆豉眼本來沒人叫她豆豉眼,究竟是誰在標籤她?

 

你覺得,幾多歲先叫長大?而長大又係咩呢?長大,係咪等如知道世界好大,人有好多種,正正邪邪,各式各樣都有呢?

如果你而家十二歲,六年後,你就十八歲啦。你覺得十二歲同十八歲既自己,有咩分別呢?如果你而家二十七歲,六年後,你就三十三歲啦。三十三歲既香港人,又應該係點既呢?

 

問我,陳麗斯

 

我一路都以為,長大係一件好困難既事,因為,我從來都覺得,長大,需要經歷。而一個可以笑住回答,講一聲,我係我既人,係點既呢?

咩叫我呢?

我既意識,係點建立既呢?

經過時間洗禮,我地會唔會變呢?會變,係咪錯呢?好多人都話,香港男仔唔會長大,佢地永遠都係男仔。有啲男仔去到四十歲都會玩模型,有啲去到三十幾都會用千幾蚊買一張903年代復刻版既閃卡。男仔,去到幾多歲,都會有頑皮,跳脫既時候。所以,好多人都會話,男仔唔會長大。

 

長大 王菲

 

而咩叫男人呢?係最近大紅既日劇《大叔的愛》入面,就有兩個角色,都被描畫成「大人應有的模樣」:一個係鍾愛春田田既部長,另一個係阿牧的前男友政宗。兩個人因為都全身而退,所以先可以令全部人都想看到的春牧配成立。只要有一個人「沒有擺出大人應有的模樣」,這對美眷,都唔會成立。

原來,係大人既世界,「成全」,就叫成熟既戀愛。

 

成全 林宥嘉

 

人係社會生存,就得面對另一個人。你要面對另一個人,一個社群,就自然會有標籤。以前,好多人都話一d 非建制派既政工作者,好中意問人「你有冇坐過監」,彷彿坐監係一種社運cv,你冇坐過,就等如不及格。而坐過監,又等如咩呢?好多人都會話,坐過,就有好多工作做唔到。因為,好多專業界別都唔會接受人有案底。坐過監,就係一個標籤。

但有時候,好多人為左生存,又會自己將一個標籤蓋係自己頭上。例如,最近就有一個沐浴露廣告,叫人停批評,欣賞美,就話兩個不視為主流美女既人,一個畀人叫pizza 面,一個畀人叫豆豉眼,於是就想顛覆對主流美價值觀既想像,希望人留意所謂多元審美觀咁話。唔知點解,網路好多人回應。可能係因為,最近真係冇咩好講,於是講起廣告,大家都好似好有反應。正如梁天琦話齋:

在一個群體中提出某種主張,群體中必然會出現支持和反對的意見,分歧會以不同的方式呈現。同樣道理,即使同以改變社會為己任,社會運動的參與者亦會因為各事的緩急輕重而有所分歧,甚或是分裂。在實現民主之前,也許我們必須先實踐民主,理解各種分歧,珍惜彼此的差異,並以此為凝聚更大力量的契機,只有獨裁才容不下其他的聲音。

理解各種分歧,珍惜彼此的差異,先可以有更大力量。

呢個廣告,一劈頭就叫人「停批評,欣賞美」,其實係咪亦都係將佢地認為係啱既美學概念,植入大家腦中呢?唔好忘記,呢個係一個沐浴露廣告。任何廣告,除非你係平霸果種「買啦買啦買啦!」之類既硬銷hardsell過程,否則,任何廣告,都會有暗示,都有潛台詞。

沐浴露廣告帶出既潛台詞,就係「將污糟既野洗走,將乾淨帶畀身體」。咁樣將「美學標籤」,將「pizza面同豆豉眼」當成一種美,然後叫人停批評,欣賞美,又係咪毫無討論空間呢?討論又係咪批評呢?最好笑既係,唔知點解,係網路引發左討論之後,果位豆豉眼姐姐係面書回應。原來,從來都冇人話佢豆豉眼。咁就好好笑啦。即係,原來為左賣廣告,廣告商將一個從來都冇係呢個人身上出現既標籤貼係佢身上,然後就叫人唔好「標籤」佢,係咪太過強人所難呢?抑或,原來有錢,為了完成廣告,就可以安心將一個標籤放係自己身上呢?

 

正常黎講,呢個沐浴露呢條橋呢,應該係「全球通用」既。佢地賣緊既,real beauty 係universal ,係好多元所以香港係execute 呢條橋既時候,應該有責任要令個故仔完滿,而唔係令品牌更尷尬。

 


 

簡單黎講,廣告製作人應該簽一份保密合約,模特兒係唔應該將廣告既討論內容拎出黎講,以免影響品牌形象既。而家,一邊呢個沐浴露叫人唔好標籤人,要停批評,欣賞美。另一邊個模特兒出黎話,原來從來都冇得到過呢個標籤,係廣告公司為左拍廣告先將呢個標籤硬塞畀佢。即係,好似果啲本來唔肥既男仔,為左拍減肥廣告,夾硬塞肥自己,然後就話自己肥好慘被歧視,然後搵左xxx 同我減肥之後我就從此以後過著美好快活既生活一樣。

虛偽到不得了。

當然,每個人活著,都需要各式各樣既虛偽。我明既。因為,大家都知道,唔虛偽,生存唔到。

 

 

作者:健吾

健吾
專欄作家、記者、編輯……商業電台節目《903國民教育》、《光明頂》主持,香港中文大學日本研究學系講師。著書超過40本。email:[email protected] |Facebook: facebook.com/kengopage |微博:t.sina.com.cn/kengowrites

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 181623
Date: 2018-06-17 23:08:37
Generated at: 2022-08-20 13:58:37
Permalink: https://www.vjmedia.com.hk/articles/2018/06/17/181623/豆豉眼本來沒人叫她豆豉眼,究竟是誰在標籤她?