插入之後,先至係惡夢嘅開始……

(絕非圖文不符)

 

作為男人,我真係好怕插錯嘢。 插錯嘢冇事,都仲叫執番身彩;插錯嘢出事搞出個大頭佛嗰陣,就真係喊出嚟。有時候你回頭望,就會覺得做咩自己嗰陣做咩咁衝動,鬼揞眼咁款一吓就插咗落去。 之後你以為冇手尾,點知就搞出一鑊粥。可惜,現實世界係冇時光機嘅,插咗之後中招就中招,點都係要硬食。

人類總是重複同樣的錯誤,雖然我插錯過好多嘢之後依然繼續插錯。 最近嗰次,更加恨錯難返……

當初,同之前嗰個都唔大夾。錢又洗得多,但反應又好似死魚咁。你唔滿意咩?佢又繼續一貫愛理不理我行我素。就好似手機上台張約期滿之前嗰半年咁樣,點都冇買機優惠又或者月費回贈。 咁啱果陣喺手機Swipe到個正嘅,咁梗係俾咗個like先啦。點知佢又揀咗同我match,主動得嚟又唔似出嚟跑嘅。一開始見面,就唔當你係兵咁要你破費 。之後見過幾次面,又覺得佢溫溫柔柔但又好受我果套。咁我梗係鼓起問佢,最後果樣嘢啦。

而個答案就係
OK 😊

果吓,我心情真係正呀喂!Swipe 中真係回你嘅已經好難。Swipe完仲可以幾次就約出嚟插,就梗係咩都硬晒。

果晚,就係我主場。我咩都準備好晒,所有嘢都鋪好晒。點知,插入之後,先至係惡夢嘅開始⋯⋯

 

 

一插之後,佢同我講hunting 做唔到多過5個電話;之前個sales 應承幫我執好個call center setting,結果插咗線果吓都係冇執好俾我,仲賴我俾個wave format 唔啱。咁我之後唔理佢,喺網上執完之後就梗係搵個sales 算帳啦,點知呢佢就係咁避我。

係,我講緊係我客嘅call center 由老電轉過去香港寬頻,將啲電話機頭插過去香港寬頻條新線。

天下男人都會犯的錯,大概就係相信個sales 氹你轉會時講嘅嘢。想你轉會果陣就咩都話OK。結果呢?冇幫我提早set好call center都算,打出去Caller ID 統一呢?走數;等候同留言系統呢?走數。要聽番對話錄音呢?加錢。E-mail留言上限呢?100個,仲要唔可以網上delete。大佬,我個call center一個鐘都成30個留言啦,而家咩年代,仲要網上聽完番言就走番去個電話系統度逐個逐個delete佢嫁?

而最經典嘅莫過於,你個IVRS 嘅greeting 聲帶,就只可以係網上設定。不過,只可以係2MB 嘅wav。但係錄果條請你留言嘅錄音呢?唔可以係佢個全英文portal搞掂,都係要靠把口對住部電話去錄。

我曾經好天真咁以為,魔童賣盤之後嘅1310,都一樣會keep住相當嘅水平。點知,跟進CS係人不在港嘅大陸人,你想搵佢真人鬧佢一鑊都唔得。由事發到而家已經兩星期,所有嘢都仲未執番好,個sales又避我。呢一次,我真係俾要Candidate WOW 佢嘅香港寬頻COO 黎汝傑 WOW晒。

再插香港寬頻?可以的話,不了。但我已經插咗,仲要插住兩年,人生……

 

作者:巫堃泰

巫堃泰
屯門區議會民選議員(2020-2023),香港大學法學(人權法) 碩士,香港機場發展關注網絡發言人。曾參與香港電台節目評論時政,並經營民間網上電視台。熱衷公共政策及管治研究,從過去到現在積極參與公民社會組織及倡議,創造多項時政惡搞產品,期望用創意改變社會。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 181709
Date: 2018-06-20 16:17:35
Generated at: 2020-06-05 16:50:36
Permalink: https://www.vjmedia.com.hk/articles/2018/06/20/181709/插入之後,先至係惡夢嘅開始