世衛話打機會成癮?呢堆「病徵」你嘅家人朋友同事中幾多樣?

 

是咁的,呢排個個都講「成癮」(主要係電玩成癮同賭博成癮),咁啱敝人入咗戒癮呢行十週年,循例講兩句咁囉。而又因為「我唔想寫論文」,所以我會跳過哂啲references同statistics嘅。當然我唔介意有人畀funding我寫遍好好睇睇嘅出來,下次。

就咁嘅,世界衛生組織WHO上星期宣佈會將「電玩成癮」好似「賭博成癮」、「物質成癮」咁正式納入國際疾病分類編碼ICD-11嘅精神及行為障礙章節。咁新聞報完囉咼,就有一大堆人tag9自己啲朋友笑佢哋打機打上癮啦、家長又同啲細嘅講「嗱都話打機打上癮架啦」,差在未有人建議將電子遊戲列埋做違法物品禁止持有及使用嘅啫。好彩衛生局同社工局連日來接受訪問睇過都係比較謹慎,咁拙文就補一補充有關「成癮」就算了。

用一般人嘅「常識」去睇,都未必會覺得電玩、賭博、甚至酒精係好似白粉(海洛英)、冰毒(甲基安非他命)一樣嘅「成癮物」。之但係點解佢哋會同上面呢啲坊間叫嘅「毒品」放埋喺同一個醫療診斷範疇之下呢?要答到呢個問題,我哋首先要知道醫學上同心理學上嘅「成癮」同一般人講開嘅「上癮」有咩唔同。舉個例子,我哋「知道」白粉係會上癮嘅,係同時建基於日常生活入面見到聽到嘅海洛英使用者、一系列關於白粉生心理上癮機制嘅醫學研究、同埋媒體(多數但不限於傳媒)報導廣告等等。賭博成癮同電玩成癮都係喺同樣嘅脈絡之下產生出來嘅診斷:(1)社會上有啲人對某個行為有常人難以理解嘅偏執(2)學者對呢個行為作大量科學研究(3)發現人類喺做呢樣嘢嘅時候、之前、同之後生心理有明顯改變而且主要係因為呢樣嘢(4)呢個行為嘅生心理影響符合醫學上「成癮」嘅定義(5)再重複驗證後確認列入「成癮」嘅醫學診斷(6)為患上呢個「疾病/障礙」嘅人提供合適嘅醫療支援。

雖然上面嗰幾個步驟唔係啲乜嘢官方程序(話咗冇references冇statistics),但大約可以畀讀者(即是你囉)睇到「點解社會要有呢個診斷」:(1)真係有一啲人嘅生心理係會因呢個行為唔同咗嘅,就算你其他70億人唔會都好;(2)呢啲影響唔單單係習慣咁簡單,仲可能牽涉到腦神經層面嘅改變;(3)呢啲影響有一個普遍可被觀測、預計、介入嘅模式,謂之「成癮/障礙」;(4)列入醫療診斷下受困嘅「成癮者」可以接受更合理嘅介入同處置,例如醫療資助(澳門永久性居民戒癮治療喺公立部門同NGO係多數免費架)。所以你係會見到點解啲醫療診斷係會日新月異去到第十一版仲改緊而唔係一本天書用到老,為咗適應猶如港女一樣五時花六時變嘅彈性。之但係對一般人嚟講,上面呢啲同下面將會講嘅「成癮」並唔係「常識」來。「成癮」本身係複雜到連醫療、社工同心理同事都需要去到專職先會深入接觸到嘅專科來。咁所以如果你見到人打機就同佢講「喂打機會上癮架」、見到人四年一次買世界盃就「喂你賭波呀?一陣上癮就死啦」、「喂你成日都去蒲唔係酒精上癮呀嗎」,係情有可原嘅。而接落嚟下面講嘅「成癮」,希望會令你瞭解多少少。

首先,「成癮」有生理上亦有心理上嘅反應(你將會見到好多Why Not Both)。例如最出名嘅白粉就兩樣都係最勁嗰個程度咁滯。一個人類如果對某樣嘢「上癮」到一停咗就心率不正血壓上升標冷汗抽筋發燒氣喘好似M到一樣咁辛苦嘅,呢啲就叫做「戒斷症狀」Withdrawal:「成癮後一旦戒斷時身體出現之生理反應,而且重新使用後症狀即消退」。又有一啲人係慢慢你會見到佢愈用/做愈多去到一個程度你會覺得「嘩點解你可以食到咁多?」/「嘩你究竟放咗幾多時間落去?」而佢會答你「好似食/玩極都唔夠咁」,呢種增加用量嘅特性叫「耐藥性」Tolerance:「重複使用後身體適應用效致使需要更高用量才可達致同等效果」。以上兩個係「成癮」,特別是「物質(藥物及酒精)成癮」,非常常見嘅指標。而當然就著各種物質同個人唔同嘅生物化學組合個呈現都會有啲唔同,例如上咗酒癮你叫佢就咁停唔好飲佢有大約5%機會猝死。去到一啲所謂「軟性毒品」如大麻,呢兩樣生理指標就未必有所謂「硬嘢」如白粉咁明顯(雖然多少其實都有),而「成癮行為」就更加難(難唔代表冇)去量化同觀測到生理反應。之但係,我哋仲有「成癮」嘅兩個決定性指標:「渴求」Craving同「損害」Impairment。

「渴求」有個好易理解嘅俗稱:心癮——「無時無刻、無法遏止、不理後果去追求用/玩某一樣嘢」。幻想一下:你由起身到瞓覺每分每秒都諗住同一樣嘢、工/學都唔返不顧一切就為咗嗰樣嘢、一諗起嗰樣嘢就興奮莫名心跳加速、一冇咗嗰樣嘢喺身邊就抑鬱焦慮世界末日咁,呢樣就好可能係你「上癮」嘅嘢。有一啲更仔細嘅例子就好似「我知我有問題但係我停唔到」、「我再落去跳硬IFC……5000和A!」、「吓聽日九點mid-term咩?我想合格但我要公會戰咼」呢啲睇得出完全停唔到落嚟嘅癥象。而且現代科學昌明,腦神經研究發現咗呢種「渴求」唔只係你Long D Puppy Love見少日嗌生嗌死嗰種諗諗下嘅程度,而係對比下一種明顯異常嘅腦活動來。另一方面就有研究指出一啲自控較差(通稱衝動Impulsive,有腦神經科學測量定義)嘅人會比較容易「上癮」同時「損害」會比其他人更嚴重。雖然未完全清楚自控同成癮邊樣係因邊樣係果,但係慢慢一啲心理上面嘅元素都開始可以觀測同歸納。最後嘅「損害」其實係近乎所有精神/行為障礙診斷都必然包含嘅要素來:「其症狀明顯影響生理心理社會上之健康及日常生活」。你知道有啲人職業就係打機aka電玩雜誌編輯(想知澳門電競喺2018年耶加達亞運消息請碌落最尾),而佢哋明顯係會比一般人打更多嘅機,所以呢個指標喺診斷上就非常重要:「單係個行為本身並唔係重點,因為呢個行為而影響到人生先係要診斷要治療嘅主因」。

睇咗兩大段「成癮」嘅基本範疇,讀者可能都睇到一個「成癮者」同普通一個「鍾意打機嘅人」係非常之唔同。雖然診斷準則仲未正式公佈,但都希望讀者明白一個精神/行為障礙診斷係幾咁複雜(嚴格嚟講按照本地法例診斷只能由醫生作出)。我都仲未講到研究上「電玩成癮」好多時會伴隨臨床上嘅「抑鬱」同「焦慮」作為兩者嘅調適coping出現,好可能令到診斷更困難同需要更專業嘅人員去進行。好多時衛生部門納入新嘅精神/行為障礙目標係為去汙名化令真正受困嘅人可以得到更適合嘅支援,但如果冇清楚解釋點解呢樣嘢係精神/行為障礙(FYI,M到都有相關嘅精神障礙診斷)同點樣去納入障礙,反而令到社會上好易出現不必要嘅「標籤Labelling」。呢種標籤雖然好多時無傷大雅,但實實在在咁係顯示緊「你呀,其實唔明佢哋個苦況」嗰種無知。幻想一下:一個人食住抗抑鬱藥頂住副作用好努力令自己唔好去死,見住啲冇病冇痛求其喺Content Farm 01上網做幾題選擇題走來講佢「抑鬱」,真係無言以對輕笑三聲架。但點都好,WHO此舉,最少令有需要嘅人更易得到支援,而需要承擔嘅風險(例如過度診斷),亦都清清楚楚「預咗架啦」。

通常呢類文呢,會貼埋求助機構嗰啲嘅,但我冇理由貼自己嘢架嘛。所以呢;

有時做好事呀,係要承擔風險同覺悟架。
「鬼叫你係專業人員。」

 

作者:Erick

閱讀後覺得好,請多多讚好及分享~:)

其他熱門文章

  • 【龍緯汶與南亞小女童】孌童變戀童,社民連杜振豪引述「兒童性自主」即係乜嘢取態? by 容樂其
    當個讀緊小學嘅細路女,被反對派同路人搞,佢地唔係立即出來譴責,而係顧左右而言他,又扮曬野喺度剖析下個社會,玩下思想實驗,玩下講理念,突然煞有介事同你講,兒童可以有性自主架。…
  • 溝俄妹的技術研究 by 技術官僚主義者
    平心而論,俄妹同香港女仔嘅主要分別,係佢哋平均得分較極端:大部分唔係高過70分,就係低過40分;香港女仔係完全相反。大部分人在40至70分區間,成日見啲女有80分,已經俾窮ABC狗衝。因為中庸之道嘛。好似係。即係高過70分會俾同事/同學鬧死…
  • 雞蟲同埋鳳姐都睇唔起龍緯汶。 by 容嬤嬤
    護士姊妹見得社會陰暗面多,佢好感概呀,呢單野,一聽到就義憤填膺嘅,反而係啲爛身爛勢嘅人,妓女嫖客會睇到嬲;而嗰啲道貌岸然嘅呢?就唔知去左邊。…
  • 桃色醜聞都有分檔次嘅年代——姚子羚係受害者??? by 白木乩
    網絡流傳,今次姚子羚係「受害者」,即係咁講啦,個情郎話搞離婚,不過原來瞞住佢仲有第二個,夾埋即係四個人咁多,而俾相蘋果嘅相傳係個大婆咁話。…
  • 龍緯汶社區服務的不道德軌跡 by Su子
    先是送禮物、貼著一起拍照;後來主動當孩子的保姆,以增加二人一起單獨相處的機會;到父母已經完全信任,就買三點式的泳衣給孩子,更一起在更衣室拍照;再常常邀請女童到自己家中過夜、於床上擺出各種特別的姿勢一起拍照;然後,終於得到了和女童二人一起外遊…
  • 大學平凡事——想出軌就出啦,講乜吖你 by 蛋捲蝦子麵
    成日話兩個人相處需要互相忍耐,無一個完美嘅人可以配合到天衣無縫,無兩個人相處嘅時候可以無摩擦。但係究竟宜家嘅呢一個人係咪值得自己去忍耐,去等待,定係抑或應該搵過另一個人呢?呢啲問題嘅答案肯定係無解嘅,因為愛情本身就無標準答案,只係睇吓兩個人…
歡迎讚好我們的facebook page,免費資訊源源送上。

文章資訊

ID: 181800
Date: 2018-06-25 05:31:38
Generated at: 2019-05-21 15:56:37
Permalink: https://www.vjmedia.com.hk/articles/2018/06/25/181800/世衛話打機會成癮?呢堆「病徵」你嘅家人朋友同