【塔羅個案】邊個講出「分手」兩個字,邊個就係萬劫不復嘅千古罪人

 

分手嘅原因,有好多種,但係我會主要將原因分成兩種範疇:

一、因為變心而分開;
二、因為兩個人之間嘅問題而分開。

第三者呀、出軌呀呢啲,平時都寫唔少,有興趣嘅朋友可以去搵返我啲舊文睇下;不過,我自己就覺得,青春期根本唔知自己要乜嗰啲 Puppy Love 就唔計啦(喂)。今次篇文,我想講下第二種分手嘅個案。

Elly 同 Stephen 識於微時,拍拖進入第五年,外面人睇,覺得佢地「幾穩定吖」,倆口子從不爭吵,和諧而平淡,好聽就叫和平,說穿了就是平淡似水。

咁無野的,天下間無乜邊段感情係由頭到尾都火辣辣,畢竟庸碌生活,會磨人心智,面對工作、環境轉變,心態自然都會有所變化,想法亦都會唔同。當然,我會稱之為一種成長,畢竟沒麵包就談不了愛情,這是他媽的香港啊。

重點是,兩個人是否願意在忙碌生活背後,都花時間去理解另一半心理上嘅變化。如果兩個人一直可以緊隨住彼此的腳步,想法和價值觀始終相近,咁樣,呢段關係,當然可以柔情似水走到尾。

不過,Elly 本身就係一個比較自我而單線條嘅人。自我嘅意思,唔係話佢唔理人感受;單線條,亦唔係曲線話緊佢蠢。只不過,一段感情,安安穩穩,Steven 一直對自己「想做嘅」「想要嘅」盡量滿足,Elly 慢慢變得安於現狀,去思考未來嘅每一步、或者,講返近啲,就算只係諗今個星期六去邊,都只係以自己所想為出發點。

至於 Steven,佢係一個包容度極高嘅人。女朋友話要去文青 Cafe,唔緊要,去囉;女朋友話去旅行要行藥妝,唔緊要,去囉。只要係自己唔討厭嘅,佢都肯去做。

只不過,正正係因為咁,Elly 慢慢忘記咗,其實 Steven 鍾意嘅係乜,佢想做嘅,又係乜。

我曾經話過 Steven。假如你女朋友心思無你咁細密,你無可能完全唔出聲,就 Expect 知道你心中所想;有啲關係,一個眼神,或者已經可以交換一啲默契;但係,亦有一啲人,真係好單純地,需要你畫公仔畫出腸,先至知道你諗乜的。

既然 Elly 係需要畫出腸嗰種,Steven 一直對自己嘅事情,上至喜好需要、下至工作目標,都無坦白同女朋友講過嘅話,你無得 Expect 大家好似 Keroro 軍曹咁 Kerokero 就交換哂所有資訊的。

Steven 聽咗我嘅意見,終於鼓起勇氣,同 Elly 嘗試講下自己嘅事。

好可惜 Elly 唔知係慣咗唔去思考,定還是好怕任何新事物會影響呢段「旁人睇落應該夠鐘結婚」嘅關係;面對住 Steven 轉工、轉方向、有新嘅工作目標,Elly 選擇逃避。可能係因為 Steven 工作嘅新方向係一啲佢唔熟悉嘅範疇,所以佢當時聽完 Steven 說話之後,回應左一句:

「我唔識嘅野唔駛話我知啦。」

Steven 再次黎到我舖頭,將呢件事話返比我知,我苦笑,Steven 都苦笑。

Steven 嘅新工作目標,需要時間去經營,而老老實實講句,佢都只係剛剛三十出頭,結婚,唔係唔得,但如果比多啲時間佢儲錢、喺工作上站穩住腳,到時先諗,會對大家更好。

但係,Elly 面對住 Steven 嘅變化,開始驚,驚自己成盤數會亂、會錯。佢開始 Send 啲婚紗網站、結婚網站過黎……唔通真係開心齊分享咩,當然就扮哂輕描淡寫咁向 Steven 施壓啦。

Steven,開始反感。

已經講咗結婚唔係唔得,已經講咗大家嘅關係其實有少少價值觀同想法上嘅距離,咩都未改善到,你家下仲提早逼我結婚?

「我都想佢係可以支持我行落去嘅嗰個人,但係佢而家比我嘅感覺,就只係想快少少搵人幫佢埋單咁。」

Steven 話咁講好似好衰,但係,亦都係事實。自己未有錢、未有樓,唔通真係個個月清卡數維生?Steven 話知道女朋友想要海外婚禮,「咪玩啦,我而家點得?」

於是,佢同 Elly 再畫出腸咁講多次;可惜,雙方取不到共識,Steven 講出分手。

喺分手之後我再見到 Steven。雖然大家都知情分手其實難免,因為女方根本唔明 Steven 嘅難處。當然,你都可能會諗,Steven 拖左人地幾年青春,一個屈尾十講分手,Elly 點算?

無錯,大部份人喺女方高調話自己「被分手」之後,都暗暗咁樣評價 Steven。但係,Steven 呢幾年黎付出嘅心機同時間,唔通就唔值得被欣賞同尊重咩?

如果 Steven 勉強同 Elly 結婚,只係因為怕分手比人話所以結,而唔係因爲愛情、想同 Elly 過下半世咁結婚,對 Elly 又真係好咩?

因為講分手嘅係 Steven,所以佢而家成為左千夫所指嘅角色。無人去問過佢嘅想法同感受,亦無人嘗試去理解分手嘅原因係咩。

有人問我,我就會講,但是無人來。

「我只係唔想阻佢更多青春,既然佢係以結婚為本,就應該比佢去搵個可以同佢 ready 結婚嘅人。」

我望住 Steven 無奈苦笑嘅落寞模樣,不禁嘆一口氣。

 

【塔羅牌個案分享】

後生女教友畀已婚傳教士搞大個肚唔認數
「我想分手,佢話唔好,不如去開房;然後我覺得佢仲愛我」
你話想生仔我咪唔避孕囉,我家下有咗你就叫我落?
名校老師婚外情的故事
四年入面,我睇住個客拍拖、結婚再離婚。
女人就黎三十歲仲係 A0 係咪就叫有問題?
中女不諱言「我有 SP,但我唔會同我老公離婚」
老師的成功要訣:識人、埋堆,攀附權貴;作育英才已經行唔通。

 

 

作者:神婆

神婆
非典型占卜師,唔神秘,無形象,除了鐘意聽客人講故事,夜間興趣係打機睇動漫同撚貓。https://www.facebook.com/FortunaMessage

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 181838
Date: 2018-06-26 16:19:52
Generated at: 2020-02-18 21:51:31
Permalink: https://www.vjmedia.com.hk/articles/2018/06/26/181838/【塔羅個案】邊個講出「分手」兩個字,邊個就係