是咪做得sales 都有個格?

 

 

最近公司請咗個女sales,基本上佢係一人之下,萬人之上,直屬腦細們,聽講佢好猛料,做過好多大公司,業積好好,即係好跑到數。外表細細粒粒,笑得幾甜,講嘢高八度,好嬌嗲,女腦細話男人最受呢套,迷迷下就好易落搭傾得成生意,女老屎忽話淨係佢同人打招呼同自我介紹都已經睇得出佢好老練。

「Brenda 你好,我係Eva 呀,今日第一日返工,以後請多多指教。」

講完之後甜笑同主動握手,看似簡單,但佢做得好自然,加埋佢自信嘅眼神,真係有個勢喺度。個人覺得佢都幾夠薑,因為佢由第一日返工開始,每日都會遲到大概十幾分鐘,返到嚟仲要慢條斯里咁化妝,跟住嘆早餐,閒閒哋都用咗粒幾鐘,勁就勁在無人夠膽投訴佢。

佢郁啲就話要請假,大概每個星期一日,去廁所又去勁耐,搞到其他同事焗住去第二層嘅廁所,食飯時間又唔跟大隊,話約咗朋友要早啲食,總之唔跟規矩,自由奔放,直情係一隻無腳嘅雀仔,完全係唔休做咁款,或者做得top sales 就根本唔驚比人炒,東家唔打打西家囉,總之自己有料就無有怕。

sales 幫公司搵到錢就大晒,所以基本上個個同事都會比佢點,應該話會盡量配合佢,而佢叫人做嘢都好客氣,男同事都比佢搞到暈陀陀,大部分女同事就對佢敬而遠知,經常喺背後話佢係奸妃,份人好假又專害人。可能我職位唔高,對佢無乜威脅,所以佢暫時都對我都好nice,有時仲會教下我嘢。

做Sales 仲有一個共通點,就係好吹得,有時交低啲project 畀佢,佢都會將個話題帶到無雷公咁遠,原本十分鐘嘅嘢講咗成半個鐘,我唔係介意同佢吹水,但係其實我呢啲小薯仔真係好多嘢做,唔似得佢,淨係出去食飯見客。

「其實望真啲佢都唔係好靚啫。」
「你睇!佢有肚腩㗎!」
「著到咁性感肯定又想姣腦細啦。」

身為女人,就會知道女人真係可以好mean,受男人歡迎嘅女人係甚少可以同女人相處到,只要佢做錯一件事就會一沉百踩,唔知佢可以喺度做幾耐呢?

 

 

作者:小盛女

小盛女
80後中環打工妹,誓要追求work life balance的生活,並當一個幸福的食家。FB PAGE:https://www.facebook.com/littlevibrantgirl

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 181854
Date: 2018-06-27 04:56:45
Generated at: 2019-08-20 23:02:09
Permalink: https://www.vjmedia.com.hk/articles/2018/06/27/181854/是咪做得sales-都有個格?