吖你班仆街仔第一日返工唔識入紙落影印機?

 

最近有一宗死因研訊係講一單2015年喺瑪嘉烈發生嘅事故。睇聆訊內容,好老實講,醫生、護士、職員,其實全部都有責任,可能份工打耐咗麻木咗,可能太多症處理唔來,可能間醫院工作步驟無寫好,可能醫院本身都唔係處理好多呢類症,原因有好多好多,但就係一連串嘅小問題,最後發生呢宗悲劇。

好多人講中醫垃撚圾,針灸係安慰劑,唔寫化學式講陰陽就係迷撚鳩信時,往往將現代醫療體系睇得太簡單。要維持一個有效嘅醫療體系,其實係一環扣一環,每一個步驟都要有一啲容易被人跟從同嚴謹嘅準則畀人去做,結合起來先為之「有效」。呢單醫療悲劇,嚴格嚟講可能每一個職員都無做過一啲致命錯誤,每個人都差少少差少少,最終就斷送咗兩條非常寶貴嘅生命。

可以預料,喺「社會」角度,喺「科學」角度,呢件事無人要負責,事實上對於社會對於科學嚟講,每日都有人死,唔會為個別人同事而悲慟。但人之為人就係有情感有同理心,此案淨返個老公一個人孤伶伶,邊個畀公道佢?邊個解釋畀佢聽呢個世界有因果,有公義,凡事係有規有矩有解釋?你可唔可以好客觀科學咁走埋去同佢講一句「係不幸」就算?最終法庭可能判嘅係死於意外,死於不幸,死於不明,頂多畀啲建議醫院,醫院又有心無心地跟進下咁。但當時每一個職員嘅果少少怠惰,最終邊個還返個公道畀個家人,畀個死者?

我開始覺得自己有一股好難抹去嘅,對呢個社會嘅一種好強嘅憤怒。憤怒係源於對呢種「無人錯,但就最終不幸」嘅無力感。我好明白,無理由懲罰一班「技術上無做錯」嘅醫護人員,你罰咩?跟足程序㗎,無話一定要探熱,無話一定要驗果啲係咪羊水,一發現羊水乾咗即時推咗上房,血小板指數低時照樣問血庫拎血,血庫一樣可以指數「未夠低」為由唔畀血㗎,邊個做「錯」?但無人做錯最終結果係不幸,莫大嘅不幸。

就好似教育咁。個個都講到自己幾咁想小朋友「有個快樂童年」,老師又咁講家長又咁講。而現實係,兩面都話係對方搞到小朋友學習好很大壓力。即係大家都想小朋友好,大家都唔想畀壓力,最終小朋友但就最大壓力。

又例如咩大工程啲濕鳩日日新鮮日日甘嘅事故。而家都唔叫事故唔叫延誤添,搭車遇到果啲叫「額外行車時間」,紅隧塞車甚至無報道嘅價值。點解條隧道塞成咁都唔當問題無人去解決?原來塞車唔係一個要處理嘅問題?而啲大工程嘅事故,原來又可以唔查唔理,「我話OK就OK」?我知實際上工程好多參數係預得好安全,可能呢個時候好多工程師笑緊你班香港人做乜咁緊張,就算剪晒啲鋼根都唔會冧因為計好晒數。但個問題唔係會唔會冧啊,係點解會剪根,點解會唔用個「高參數」去做嘢啊。最後可能又係不了了之,啊原來無人做錯嘢無人要負責,係啲鋼根自己唔生性生短咗呵呵呵咁。大佬,連城大冧天台咁大件事,都可以當無事發生過啦。

社會上咁多大事,件件都可以圍威喂,但係我哋日常生活遇到嘅,大家又錙銖必計。吖你班仆街仔第一日返工唔識入紙落影印機?批鬥!搭車得住個位唔畀班廢老打尖?批鬥!返工遲咗三分鐘?曠工!批鬥!你寫EMAIL有GRAMMAR MISTAKE?批鬥!

我屌你老母你個香港社會。

 

作者:林非

離經,不欲縛於經書舊說,欲自成一家自成一經。八十後,以追求人生自由之道為己任。

閱讀後覺得好,請多多讚好及分享~:)

其他熱門文章

  • 【LEGO快訊】LEGO迷你兵團正式登場 by 阿九
    講左好耐嘅 LEGO 迷你兵團終於都喺紐約玩具展前席正式登場!暫時公佈嘅產品總共有 5 款咁多,而當中以 75 […]…
  • 【劏房生活實錄】連打飛機/捽碟都怕被鄰居聽到. . . . . . by 一百八十呎
    上次講過我同隔嚟屋只係一板之隔,夜晚瞓覺連人哋呼吸聲都會聽到。人哋屋企又有小朋友,可想而知,捽碟的話我一定要帶耳機。試過唔記得戴,一開就大大聲「澳門首家線上賭場上線啦」,嚇到我心都離一離,人哋唔知以為我沉迷毒海都唔好啦。…
  • 【引爆中國】(二):中國沒有不分裂的本錢 by 薰華
    上次講到葛劍雄《統一與分裂》提出,中共政治政確下嘅標準計,中國歷史上只係統一過81年,而依照傳統中國所講嘅統一嚟計,其實中國亦都只係統一過950年。咁即係話,無論你中意由夏后帝啟開始計、由成湯開始計、由周召共和開始計、由秦始皇開始計,定係由…
  • 【口罩知識】99% PFE 就等同 N95 口罩? by Tango Chan
    PFE(Particle Filtration Efficiency)則是顆粒過濾效率,以 3M 為例,他們會利用 0.1 μm 的微粒及 28 lpm 流速來測試外科手術口罩的過濾性能。而普遍來說,這項測試容許使用 0.1 – 5.0 μ…
  • 【引爆中國】(一):中國只係統一過81年? by 薰華
    「支爆」呢個term,筆者都聽咗好幾年,然而每次話支爆,結果都好似不了了之咁,直至今年武漢肺炎大爆發,有朋友就開始盤點下現時中共所面對嘅所有問題,發現係歷朝歷代滅亡前夕嘅事件嘅大集合。既然係咁,筆者亦都想講下到底歷代嘅統一同分裂,背後究竟係…
  • 【引爆中國】(三):統一之後…… by 薰華
    今日唔係想講秦漢之際喺中原發生嘅事,而係睇下喺我哋呢頭,嶺南一帶發生嘅事。…
歡迎讚好我們的facebook page,免費資訊源源送上。

文章資訊

ID: 181937
Date: 2018-06-29 01:09:29
Generated at: 2020-02-24 16:38:14
Permalink: https://www.vjmedia.com.hk/articles/2018/06/29/181937/吖你班仆街仔第一日返工唔識入紙落影印機?