【裝修奇談】點解仲有人信「超低價全包」可以做到裝修?

 

正所謂一分錢、一分貨,小妹我並唔係話平嘢一定無好嘢,但係有時都要諗下個價錢個合理性吖。早前我公司接左一單幫人執漏嘅生意,事主(講到好似警訊咁)就係因為貪平,結果搞出個大頭佛。

事主,一於再次稱呼佢為陳生啦!呀陳生一家幾口輪左幾年終於排到公屋,第一次入自己單位,就已經見到一地都係宣傳單張,「$88800裝修全包,即刻入住 OK」之類,甚至有A 餐萬八B 餐三萬八。佢二話不說,問都唔問,慌死自己會蝕底咁樣,搵咗其中一間做「全包」嘅裝修。

結果,對方係好快完工交樓呀,但係,陳生望見間屋就覺得有啲唔對路。全屋電線拉完都唔啱位,牆身啲灰都唔係平滑嘅!

「邊忽叫做裝修完呀?淨係舖好地板油過牆就叫完工呀?」

當呀陳生怒氣沖沖咁同我地講佢被人呃嘅時候,我個心諗,咁,八萬幾蚊,老老實實,你要求啲咩先?人地話全包,你又無問人地包啲咩,唔通以為人地會貼埋張真皮三座位梳化俾你咩。

「我都無咩要求架啦!點鬼知佢會整得咁肉酸!」

咁當然我地唔會話佢被人呃啦,因為佢當時張單上面,寫「基本裝修」全包:牆身油漆翻新、剷去原漆底、防潮漆、新鋪地磚、沙紙打磨,咁咁咁咁,原來都係將啲工序寫曬出黎,充曬大頭、扮曬咩都包但其實係好普通既基本野。到最後至少個地板目測係用得嘅,我心諗你都算好彩。

 

(市面上充滿超低價裝修套餐)

 

陳生見過鬼怕黑,搵我地求救時,終於知道裝修呢家野,貪平嘅話,中伏機會真係好大。我地去佢個單位睇過,除左要拉過晒電線,牆身要重新剷過油過,另外幫佢間返開「客廳」同「睡房」,廚房無吊櫃用又要整過,廁所水龍頭開水時下面漏水,即係又要執。

其實,公屋單位我地都幾經常接觸,但係,如果從一開始就俾我地(或者其他有少少良心嘅行家啦)去做嘅話,的確可以做到好靚、好 Decent、令你有龍竇狗床嘅 Feel(誤)。

不過,如果係陳生呢種個案,老老實實,並唔會平啲架,時間亦唔會快得去邊(因為工序上係同由頭開始裝修無分別)。好似陳生今次呢個 Case 咁,一共都要收佢接近二十萬,仲要計平咗比佢添了~(因為佢介紹左另一個客比我地 XD),至於佢之前用左嘅八萬幾,除左水喉唔係好需要重舖,其他都差唔多一筆勾銷,都咪話唔慘。

所以,裝修的確係平有平做、貴有貴做,不過,如果人地個價出奇地低,你都真係問心,會唔會有咁大隻蛤乸隨街跳先?同你非親非故喎?係咪先!仲有呀,「基本裝修」呢個字眼可以好 Tricky 的,唔好怕自己長氣、煩都唔緊要,一開始問得清清楚楚,咁就唔駛自己受氣啦,係咪?

嗱,如果有需要裝修嘅朋友,真係可以考慮搵我地架 LOL 小妹是勤力的孩子~

 

 

作者:裝修小妹

裝修小妹
一個女仔,喺呢個男人嘅世界......

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 181950
Date: 2018-06-29 05:57:09
Generated at: 2020-03-29 20:02:27
Permalink: https://www.vjmedia.com.hk/articles/2018/06/29/181950/【裝修奇談】點解仲有人信「超低價全包」可以做