如果俾你揀，你會揀制度內改革，定係暴力革命？

我係一個細細個開始就好鍾意高達嘅人，周不時仲會煲返0079、Z同ZZ。喺大概一兩年前，有套作品叫鐵血的孤兒（叫孤兒仔），開頭好好睇，可惜爛咗尾，仲要班主角死曬。作為第一季推動劇情嘅主要人物，甚至可以話係成個故事都係佢搞出嚟，又有魅力又有心計嘅金毛突然好似食咗腦殘丸咁，搞死咗自己同跟佢搵食嘅主角群。所以個結局都幾爛下。

其實成個故事就係金毛想搞革命，結果被建制派收咗皮，再加上班主角慘死，好多人都話個結局好悲慘，好絕望。但係我反而覺得個結局係好有希望嘅。

如果話革命派嘅領袖係金毛，咁建制派嘅領袖就係白頭佬。佢哋嘅改革都係圍繞住一個暴力機關叫「末日號角」，類似一個第三方武力監管機構，逼使地球各國保持和平咁。但係因為時間太耐，連末日號角都開始腐敗，有世襲制度，冇家境冇血統難以上位。金毛本身係童妓嚟，後來被其中一個末日號角嘅掌權家主收養，先有機會上位，因為細個嘅經歷，佢沉迷暴力，成日想搞暴力革命。

與此相對嘅自然係白頭佬。白頭佬老謀深算，喺第二季取代金毛成為大魔王，而且又有主角威能，打殘主角群，最後因為掃蕩亂黨有功，權勢一時無兩，但係佢上咗位之後做嘅事，就係改革末日號角。點解佢會咁做？其實佢一早講過好似金毛咁搞革命係唔會成功，從建制改革先有希望。

但係，睇見白頭佬個頭咁白，都知佢年紀唔輕，點解佢咁耐都唔改革，偏偏整死咗金毛先搞改革？因為佢就算肯，其他掌權號人都唔會應承，到時佢就會變成另一個金毛。佢等緊嘅一直係金毛咁嘅人，對政權有真正威脅嘅人，呢個係佢成為英雄，獨攬大權嘅機會，然後佢就可以搞改革。

其實喺故事入面，作者一直都暗示白頭佬係建制入面嘅開明派。喺孤兒仔入面，一直都有講末日號角係有種貴族傳統，有家族背景有血統嘅人先上到位。所以劇情上，白頭佬一直都有兩個忠心手下，一個係黑人少爺仔，貴族出身，有人格魅力，但係行軍打仗非常無能，但係因為血統，佢可以跟住白頭佬學嘢，做佢「心腹」。但係白頭佬真正信任嘅手下係另一個，冇血統冇家境，行為粗魯野蠻嘅生番妹，因為有才能嘅關係被白頭佬提拔做佢心腹，平時就靠佢睇住少爺仔，費事少爺仔死咗，自己一身蟻。而呢件事係非常罕見嘅，所以軍隊入面有流言話生番妹都係靠關係上位，冇人諗過有人可以靠能力上位。

成個孤兒仔嘅世界，都有呢種上流問題，甚至窮人被欺壓嘅問題，火星殖民地嘅人就係被欺壓嘅一群。孤兒仔喺咁嘅設定下，佢嘅故事都圍繞住一個核心問題「點樣先可以改變社會，改革腐朽嘅政權？」
喺第一季入面，孤兒仔交咗一張幾熱血嘅答卷，佢否定咗交涉同和理非非，肯定咗武力抗爭，因為主角呢班咩都唔識，只係識做戰爭機器嘅孤兒仔嘅奮鬥，年輕政治家大小姐成功幫火星爭取相對公平嘅待遇，睇嚟第一季嘅結局好圓滿。

但係第二季嘅開頭已經否定咗第一季結尾嘅美好幻想，第一季嘅火星改革反而引起咗更多嘅戰亂，主角鐵華團眾人更加好似陷入咗一張大網，想唔打仗都唔得。一方面係因為火星嘅問題牽涉更深層嘅問題，即係末日號角甚至成個社會都好腐朽嘅問題，另一方面，似乎都係因為作者想否定暴力革命係會即時見效嘅可能性，暴力革命喺歷史上一係失敗收場，一係就要死好多人，好耐時間社會先會穩定落嚟。

呢個時候，金毛仔再次登場，畀咗個解決方法主角群，就係跟佢一齊搞革命，成功之後成個火星封畀佢。結果就如文章開頭講嘅咁，大部分都慘死。白頭佬成功掌權。喺呢到，作者交咗一份令大部分人唔滿意嘅答卷，就係否定暴力革命，肯定由建制內部改革呢條路。

而事實上，我都認為呢個結局對於孤兒仔嘅世界係最好嘅結局，因為白頭佬嘅成功，社會開始改革，而由於改革者唔係金毛，所以唔使經歷長時間嘅動蕩。再提醒一次，金毛係一個表面優雅，骨子裡崇尚暴力嘅人。唔知係巧合定係作者有意為之啦。

鐵華團係無名嘅英雄，雖然以金毛為首嘅革命派失敗收場，但係因為佢哋嘅出現，令到社會可以真正咁改革，一來白頭佬手握大權，二來，當有啲真正威脅到掌權者統治嘅事發生，掌權者都會反思佢嘅統治方法，選擇更好嘅手段，呢點都令白頭佬更易改革，甚至可能其他家族都希望有人為佢哋指點方向，更好咁保護自己嘅勢力。

所以，我點解話我由個結局睇到希望呢？因為雖然鐵華團成為咗最大輸家，金毛革命失敗，但係至少社會嘅改變肯定咗佢哋嘅犧牲，金毛泉下有知都會覺得自己成功咗。當然，一直想quit嘅鐵華團仍然係慘劇，佢哋一直都唔想理政治，搞革命，第一季死咗嘅肥仔都勸過團長收手，但係一旦牽涉入政治風波，一切都唔到你話事。水能載舟，亦能覆舟，靠革命起家發達，就要預咗承受後果，一係就贏到落尾，一係就輸到永不翻身。不過，至少佢哋嘅能力，令到孤兒仔嘅世界更好。

作者：哲學仔

一條哲學廢青

閱讀後覺得好，請多多讚好及分享～：）