【書展呈獻】為左搵食,34D人妻出噴血寫真?

(圖文不符)

 

書展就到,各種各樣話題又開始炒作起黎,呢啲都唔知係咪宣傳策略之一黎既。當然,自己早已身處局外,無從置喙,不過就寫野黎講,自己都係一個信念:

寫老散又好,寫短中長故都好,就算唔好講到咩不朽之事業,表達偉大思想感情既工具,甚至可以令到讀者發人深省,改變佢地既人生之類,但都會想讀既人有啲野可以停低諗一諗。我成日覺得,可以啟發到人思考既,不論文筆如何,都係一篇好既文章。就算果樣野本身係人人都知道,你都可以提供一個不一樣既角度,可能你講既野完全大錯特錯,荒謬之極,但係如果可以吸引到人出黎加以駁斥,呢樣都係一樣功德黎。

有啲人會批評依家某啲人寫既野極之商業化,好似寫黎一心就係為錢,我成日覺得呢啲批評始終都無真正針對問題既根源。大家都會喜歡用二元分法,譬如賺到錢既文章就一定唔係文學式者談唔上藝術之類。唔通大家仍然覺得要好似幾百年前果啲音樂家同詩人咁,必先生前潦倒,要咳住血咁係床上完成一啲當代根本無人睇既野,直至佢死後聲明大噪,咁先可以進入啲咩經典既殿堂?邊個想窮?邊個想寫完啲野完全無人睇一卷卷咁掟落垃圾桶?咪痴線啦。

我唔係想幫任何人開脫啲乜。而係都係果句,所有野都係雙向既,有啲既讀者,就有啲咩既作者寫出黎迎合大眾既口味。你話產業鏈都好,話一整個ecosystem 又好(好似好聽啲),作者唔駛開飯?出版商唔駛開飯?仲有如果追求質素要用到既插畫,編輯,校對,公關,宣傳等等。除左文筆,有幾多人會欣賞埋排版,紙質等等。唔好話賺大錢,你連可以維生都做唔到既野,邊個人肯付出,幫你地雕欄玉砌呢。有無諗過,可能仲有好多想寫詩寫文藝既野既人,為左搵食,而要日日係娛樂版寫啲咩34D人妻出噴血寫真嘅報道?

我地可以批評,幾時都可以批評。話呢個垃圾,果個又係白痴,如果我寫我都寫到啦(但叫佢寫佢又話唔會益你)。覺得唔好,千祈唔好收埋自己歎,最好好似哲仔咁大肆宣揚,逢人說項,咁先對社會有好處。而我更加會鄙視果啲錢又唔願意花去買書,然後平時睇完人地寫完野連like 都唔肯俾一個,之後又話:屌書展真係愈黎愈無野好睇喇。其實都唔係架,我成日都見到特賣場好多中西文學經典,不過年年果堆書都係度無咩點郁過渣嘛。

好喇,唔客氣既說話講完。祝大家有個愉快既世界盃週末啦。

最後利申:唔好再問我有無食女或者有咩八卦。小弟不才。一直以窮矮毒肥柒五字行走江湖,相安無事。

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 182039
Date: 2018-06-30 15:52:09
Generated at: 2021-07-24 10:27:38
Permalink: https://www.vjmedia.com.hk/articles/2018/06/30/182039/【書展呈獻】為左搵食,34d人妻出噴血寫真?