香港地，好多匿名網上討論區，我諗起早一兩星期，有位濕疹患者上連登問人點自殺，大批網友唔係叫佢快啲死就係笑佢忍唔到痕，到最後，事主真係先殺父母然後用佢開post 嗰陣講嘅方法自殺，咁就三條人命。匿名可以暢所欲言，定係唔洗負言責釋放人性卑劣，呢兩句係statement 定係question，我諗自古以來都解答唔到。
當我幾個月前知道輔仁其中一位台柱（筆名「霏子」，喺呢度大家叫佢YK」，有份經營一個以匿名為尚嘅新討論app「Gööp」嗰陣，我都好極力咁掩飾呢一點質疑。
（左：Kyle，右：YK）
呢個app 嘅admin 有五個人，四男一女，只有一位仲在學，其餘剛剛畢業，正宗就係傳媒標籤嘅不務正業廢青，訪問中途我特別帶出匿名言責嘅問題，估唔到喺呢度我得到好特別嘅回應。
22歲嘅Jeff，Global Business 畢業，聽到我嘅連珠炮發，佢突然收起左一貫嘅世界仔官腔，神色凝重咁話，「呢樣嘢我地都摸索左好耐……」「我地個app，一開頭就已經講清楚唔可以有欺凌，咁當然同好多安裝須知一樣，好多人都唔會睇晒就accept，而如果有人檢舉相關留言，我地見到係欺凌、侵犯私隱等等，初則hide 左個留言佢，嚴重就會封帳號。」我追問，咁客觀效果係點？佢哋隨即開俾我睇：
「哇真係架？」呢個就係我見到之後嘅第一個反應。我做左幾十年人，乜嘢良知愛心性本善，早早就被呢個社會磨蝕晒，不斷咁用小人之心去諗班大學生users，估唔到參與呢個社群嘅成員，比普遍嘅香港互聯網使用者更有愛心，Jeff 強調：「喺匿名嘅制度之下，我地嘅成員更加肯分享佢哋生活、學業、家庭、健康上面對嘅困難，而無論開心唔開心，其他成員都對呢啲遭遇嘅反應都好supportive。」
（左：Peter，右：Jeff）
社交媒體都係媒體，網絡社群都係社群，歸根究底都係資訊傳播都係連結人與人，我問佢哋有咩代表作，答案都令我好意外……
圓碌碌嘅Peter，佢哋稱之為魔法部部長，即係可以將意念變成現實，無錯喇佢就係programmer，佢隨即開呢一頁俾我睇：
然後佢好有自信咁介紹：「我地試緊唔同嘅新嘢，其中新搞緊『升學區』，唔係俾大學生睇，係俾計畫升大學嘅中學生睇…成員註冊嘅時候要用大學提供嘅email，當成員參與呢個升學區嘅討論時，就會顯示呢位成員係來自邊間院校，我諗對抱有疑問嘅中學生來講，係說服力大增。」
我本身都係港大校友，用校友email 註冊呢個app。我揀左升學區一個叫女同學唔好整容嘅派膠post，以匿名漢堡包嘅身份留言，可見我個名隔離出現HKU 標示：
「我最開心嘅都係做番啲對人嘅工作！」一樣係讀神科，讀Wealth Management 嘅Kyle 仲係一臉稚氣，佢去勻幾間大行做intern 之後發現到自己最想做嘅嘢。佢show 俾我睇另一樣過癮嘢：「我地最開心就係喺校園見到有人用我地嘅app，例如好似呢幾位CU 同學咁，喺山腳都開住我地嘅app 來相認搭的士」
另一項代表作，要數到去今年年初嘅Hysan 弔唁冊被亂寫，同埋隨後嘅欺凌事件，正正就係呢間Hall 嘅同學利用呢個app 討論，然後經fb 輾轉被大媒體引述，令事件曝光，詳情可以睇番呢一篇段段嘅引文。
Jeff 同Kyle 嘅所謂「讀神科唔打工」都可以尚且理解為「讀神科其實都係搵唔到工」，但Peter 其實真係推左份業內幾出名嘅長工offer，佢嘅諗法，係趁自己仲後生無咩家庭負擔，可以任性，所以想試一下同朋友創業，一班人嘗試實踐一件事。
我最關心嘅都係呢件好事點樣持續甚至係永續咁經營落去。幾個月來我間中都有關心下佢哋，經常用「老屎忽」嘅口吻追問學生妹YK：「你地搵錢搵成點？」。訪問當日，Jeff 好坦白咁反問我：「你會唔會覺得我地好離地？」當刻我都好直接咁答：「都係，haha」
（左：Jeff，右：YK，背後就係HKU iDENDRON 嘅logo，喺紐魯詩樓一樓）
佢哋呢次創業，名義上係先後獲得數碼港及港大幫助，但其實總共獲得的資助少過一百萬，五個人人均20萬都無，所以佢哋無真係出過糧，當講到呢啲位，佢哋異口同聲除左承認年少任性，更感謝家人唔追佢哋要家用。好彩嘅係佢哋而家仲可以以好平嘅租金租用港大嘅共用辦公室空間。
以搞app 或搞媒體嘅角度睇，其實佢哋已經有一定規模，甚至可以話上左軌道：有固定而且數目唔算低嘅讀者群，讀者群很專，絕大部份都係在學大學生，少部份大學校友，而且讀者群嘅參與度比好多社群都算高。身處呢個現況，一個五人團隊要搵番個fresh grad 價人工，其實唔難。
佢哋經營左一年多，已經完全體會到社會嘅殘酷，呢個殘酷，唔只來自大人建構出來嘅商業社會規則，更有來自同學。
「好多謝上屆中大學生會，佢哋係第一個以學生會名義幫我地個app，但唔係間間大學嘅學生會都咁認同我地，更多嘅係質疑我地只係一門生意，同埋唔想以官方名義為我地個app 背書變相要為呢度嘅言論負責。」世界仔阿Jeff 自信嘅笑容都掩蓋唔到佢心入面嘅無奈。
聽到呢度，一方面我對而家嘅大學生組織嘅怕事程度表示感概，另一方面就係非常欣賞佢哋無放棄過連結唔同嘢。
「相比於一年多前，我地要趁看更行開，深夜偷偷地喺智華館逐張檯擺低傳單宣傳，而家Gööp 十間大學都有屬於同學自己嘅專屬討論區，而家我地仲會開唔同嘅主題區域，並邀請城中KOL 參與其中。」
我有幸認識佢哋，其實係源自YK 嘅介紹。佢係輔仁其中一個最受歡迎嘅作者，喺浸大讀完中文就來到HKU 讀碩士，「讀中文就係泥古不化」絕對唔會喺佢身上搵到，反而佢外向嘅性格，為團隊帶來唔少歡樂，更重要嘅係機會。
「而家Gööpers 有時會自己約聚會，我見到嘅話都會盡量抽時間去下，了解一下會員嘅需要。」YK 鍾意笑，講到呢度佢都係笑到見牙唔見眼：「我一開始唔會特登表露身份話自己就係admin YK，但講下講下就會講起，咁大家都會有一副驚嘆嘅目光，然後多謝我地咁俾心機經營呢個社群。」
所有理想同埋價值，自己講出來梗係話自己好的，但係點樣將件事一步一步實踐出來，面對困局要搵方法突破，面對困難要令自己站得穩。
從幾個月前剛剛認識佢哋，然後合作搞左少少嘢，到今次可以更深入了解佢哋嘅諗法，我對佢哋嘅睇法都唔同左，學生妹唔再只係學生妹，開始有種OL 氣質，世界仔唔再只係世界仔，仲自覺要為團隊生死存亡把關。
題目睇落喺反問，其實佢哋已經口頭上答左，但商場上真正嘅回答，唔係用口，佢哋係落手落腳實踐緊，我都好期待可以喺業務上同佢地多啲合作。
為何今天好像剩下Mirror 一個偶團？
我去到2021年先唔再睇TVB——正向聯想 (Positive Association)
分手咪分手囉，三口六面講清楚好難咩？
【遊戲介紹】做個中世紀領主 《Going Medieval》極多玩法暗藏食人肉滿足饑餓度
薛定諤人生最尷尬的恥笑——薛定諤的貓實驗
寫於與舊單位分手之前——習慣化 (Habituation)
2018年7月8日
