如果我有個阿哥就好喇. . . . . .

 

最近入戲院睇咗套泰國片《大佬可以退貨嗎?》係講個妹讀書做嘢都好叻,阿哥就一事無成,形成極大對比,阿哥唯一做到嘅就趕走晒阿妹啲男朋友,當中有笑有淚我唔劇透太多。明明我係獨女,無兄弟姊妹,從來都無機會感受兄妹情係點,但係仍然比套戲感動到,有兩幕都忍唔住喊咗出嚟,可能係因為我本身都好容易睇戲睇到喊啦。

其實我由細到大都好想有個阿哥,細個可以陪我玩,有事又會幫我出頭,會保護我,當然,想像都係美好,聽朋友講通常啲阿哥都係大食懶,要阿妹做阿四。獨身仔女係永遠都唔會體會到嗰種血濃於水嘅感覺係點,兄弟姊妹會鬧交,甚至打交,爭嘢玩,細嘅不憤要著舊衫,大嘅就會話阿爸阿媽偏心,但係我相信佢哋係唔會有無隔夜仇,好快就好返,大個咗有事亦一定會幫手。

可能因為我得一個人嘅關係,所以都好鍾意同朋友一齊玩,亦試過有所謂嘅契哥,但感覺當然好唔同,後嚟亦知道呢啲關係根本從來都唔單純。

「你就好啦,有個阿哥。」我說。
「一啲都唔好囉,佢成日都恰我㗎,點我夜晚落去買宵夜,又要我做晒啲家務,我就寧願好似你咁喇,無人同你爭,阿爸阿媽淨係錫晒你。」朋友阿花說。
「但係如果你有事,佢一定會同你一齊解決。」我說。
「咁都係嘅,我同佢都係口硬心軟。」阿花說。

Mike都有幾個兄弟姊妹,細個會搶薯片食,爭打機扯頭髮,而家大個咗關係仍然好好,相反,我細個啲零食係擺喺度無人食,可能搶嘅零食先會特別好食,機我都有得打,不過自己打真係好悶,除非有朋友嚟。吃不到的葡萄永遠是酸的,獨身嘅總會羨慕有兄弟姊妹嘅,反之亦然。

「第時如果可以,我諗生兩個會好啲,佢哋會無咁悶,大個咗又可以互相照應。」睇完戲我說。
「你唔係話怕痛怕麻煩怕無錢怕養唔起唔想生嘅咩?」男友Mike說。
「我都係一時感觸講下啫,到時先算啦哈哈!」我說。

 

 

關於作者:小盛女

小盛女
80後中環打工妹,誓要追求work life balance的生活,並當一個幸福的食家。FB PAGE:https://www.facebook.com/littlevibrantgirl

閱讀後覺得好,請多多讚好及分享~:)

我有回應

則留言

其他熱門文章

歡迎讚好我們的facebook page,免費資訊源源送上。