我決定辭職,因為. . . . . .

 

 

打工仔轉工係好閒嘅事,基本上個個人都轉過四、五份工以上,每次決定辭職我都諗得好清楚,而且堅決唔食回頭草,除非公司真係加好多好多好多錢畀我(暫時未試過),無計啦有時人總會為錢而低頭,講真,打工都係為錢啫,唔通同你談情咩。總括嚟講,其實辭職來來去去都係得以下幾個原因。

 

無嘢學無進步

每日都做打雜、影印、scan嘢、filing、碎紙,又或者係工作一成不變,以marketing為例,細公司無乜event搞,可能做一、兩年基本上都已經掌握晒,人總要為自己增值同埋進步,學到新嘢自己都會開心同滿足,無嘢學,唔通真係一世做細位做到老咩?不過做多幾年嘢,個人就會開始覺得攰,已經唔會再有Fresh grad嗰種想學嘢嘅熱誠,可能只係想舒舒服服,每日準時收工,唔係個個都咁有事業心嘅。

 

腦細/上司難頂

腦細/上司難頂基本上係預咗,遇到好嘅真係仲難過中六合彩,之但係有啲腦細真係變態到令人容忍唔到。以前做過美容業嘅copy writer,個腦細真係可以日日叫唔同人入房畀佢鬧,明明跟足佢要求做,佢可以即刻變金魚,得三秒記憶話自己無講過,情緒化兼無理取鬧,我懷疑佢有燥狂症。我都有阿爸阿媽生,為咗生活係要賺錢,但係我都唔需要咁樣比你鬧囉!最好笑係一遞咗信佢就想留我,態度勁好,痴線。

 

遇著一堆極品同事

就算腦細/上司衰都好,至少可以同同事呻下,但係如果同事衰,返工就會好唔開心,一唔開心就好難再留喺呢個鬼地方。你諗下你對住同事嘅時間仲多過你對屋企人,好多工作都係要溝通同合作,講team work,遇著啲A字膊/齋吹水唔做嘢/乜都話唔知唔識/專擦腦細鞋兼爭住領工/勤力但次次錯到七彩要你執手尾/鍾意講是非同挑撥離間嘅同事,真係會激到嘔血。

 

勁多OT無晒私人時間

有啲工嘅工作量真係可以大到你唔信,當你唔係人,或者係機械人,做到隻狗咁仲要無補水無補鐘,凌晨放工,第二朝一早又返工。點解咁嘅工都會有人肯做?啱啱畢業無經驗囉,當學嘢囉,後生仔女要捱囉,醒目嘅好快就會發現原來自己剝畀人削緊,就會跳槽,所以普遍流失率好大。返呢啲工真係會捱壞身子,周身病痛,極唔建議留低。

 

人工福利唔好

返工為乜?為錢囉。如果一份工係年年唔加人工、無雙糧、無花紅、無病假、唔係五天工作、得七日大假,我諗唔會有人肯做囉。基本上而家好多工都已經係五天工作,仲有各種唔同嘅福利,例如紅白假、M痛假、生日假、任食零食、公司旅行等。

 

熟悉我嘅讀者都知道我已經講咗好耐話想轉工,因為差不多兩年無加人工,仲無病假,後來我仲同埋阿姐講,但佢話就嚟出花紅,叫我等埋先,唔好蝕,出完花紅佢就同我講就嚟加人工,等埋先,唔好蝕。就算加唔加人工都好,如果我搵到份啱嘅都會走,因為我唔想再等下一個兩年。

 

 

關於作者:小盛女

小盛女
80後中環打工妹,誓要追求work life balance的生活,並當一個幸福的食家。FB PAGE:https://www.facebook.com/littlevibrantgirl

閱讀後覺得好,請多多讚好及分享~:)

我有回應

則留言

其他熱門文章

歡迎讚好我們的facebook page,免費資訊源源送上。