【愛情實況系列】老夫少妻?公司總有個八婆會幫你棒打鴛鴦. . . . . .

 

 

話說最近城中有26歲女準備嫁畀66歲富豪,雙方都睇落好開心。父女戀一如「厲害了」嘅領土,「自古以來」就有,唔係乜野新事物,我自己亦見過,不過就絕對冇26歲同66歲呢對咁幸福。

那些年,我響做野嘅地方識得一個女仔,乖乖女,廿歲出頭,人品好,又好學,得知OPEN U 收佢讀國際政治,就好興奮咁同我講,我亦好為佢高興。但係冇幾耐,就聽到一啲同佢有關嘅事,件事令佢好困擾。

原來個乖乖女有一個大佢廿幾年、做得佢老豆嘅中年男友,而且打算結婚。不過因為年齡差距大,屋企人激烈反對,要拆散呢對忘年鴛鴦。乖乖女唔知點算好,就周圍問人意見。佢太年輕,人生經驗有限,其實自己私隱,根本唔適宜周圍問人。何況,佢仲同一個心地極差嘅八婆講。個八婆表面上好似好關心佢,實則上一聽到呢啲就HIGH 過啪丸,亂咁畀意見嘅同時,仲即刻大大聲唱通街,令乖乖女受到更大傷害。

之後,乖乖女可能想避開啲衰人指指點點,就響眾人面前消失,自此我亦冇再見到佢。佢最後點樣抉擇,亦都唔知。響度祝佢有個幸福嘅人生。

最近嘅26歲女嫁66歲富豪呢件事,令我想起一啲問題:「如果當年乖乖女嘅男友有錢有地位,佢哋呢段父女戀又會唔會受到咁大壓力?會唔會一早開花結果?」

愛情,好多時真係離唔開錢同身份地位架!

 

做咗咁多年人,自問冇乜異性緣,感情生活平平無奇,但親眼見過同聽過唔少愛情故事,想分享出嚟。呢個系列所寫嘅故事,冇話蕩氣迴腸,更冇轟轟烈烈,有嘅只係日常生活中嘅平淡、貼身、貼心,原因係──全部真實,真實到可能已發生或隨時發生響自己或自己身邊嘅人身上。所有故事,一係我親眼見,一係相熟嘅、信得過嘅人親口同我講,絕冇老作誇張,亦冇出自報章網絡。至於喜唔喜歡睇,就同你鍾唔鍾意一個人一樣,主觀、隨緣。但點都好,各位看官大人睇還睇,千萬唔好亂估故事主角嘅身份,亦唔好對號入座,更加唔好估我係邊個,拜託!

關於作者:問世間

問世間
不善談情,但求懂愛;不作失實,但求寫實。

閱讀後覺得好,請多多讚好及分享~:)

我有回應

則留言

其他熱門文章

歡迎讚好我們的facebook page,免費資訊源源送上。