如何成為護士?(包括登記護士與註冊護士)

 

 

呢篇野係寫俾考完DSE,有志投身護理界既所有同學。
十幾歲既我真係乜都唔識,果時網路上既資料又少又散,希望今次呢篇野幫到同學仔啦~

 

首先,講左EN同RN既分別先。

EN,Enrolled Nurse 登記護士,課程修讀兩年制的課程就可以畢業,大部份院校入學條件只需要舊制CE 有Full Cert 或新制DSE 五科2級或以上(四個核心科目再加一個選修科),如有同等學院亦可。

係醫院,EN同RN既工作其實冇乜分別,只係唔可以做同IV(靜脈輸入)有關既護理程序,亦唔使做IC。而且部份地方係唔需要管藥櫃、核對針類藥、對血(輸血前要兩個RN核對)。
但係EN一旦做得耐,響Ward(病房)一樣要孭team。

而EN通常都會去院舍:如老人院及殘障院舍工作,人工亦會比醫院管理局(HA)開得高,但由於有HW(保健員)同PCW(護理員)幫手,好多時EN係院舍已經係管理層,責任亦相對大。當HW同PCW有野唔識、搞唔掂都係搵你。

 

現時EN既訓練課程有:

  1. 社福界登記護士(普通科)/登記護士(精神科)
    以前係由社福界委託醫管局去訓練,畢業後需要為社福界核下既安老服務、康復服務、家庭及兒童服務或感化服務的社福界非政府機構或私營機構任職,否則要退還兩年學費。
    而家就改左俾OU訓練。
  2. 醫管局核下護士學校
    現時剩返葛量洪醫院護士學校,中文授課,不需要學費。
    HA train 係淘汰制度,每個考試(筆試同實習試)3次機會。
  3. HA Supporting Staff EN Course
    呢個課程係俾響HA做左一段時間、有學歷既同事申請去讀,通常係PCA同事。
  4. OU護理學高級文憑(登記護士)
    授課以中文為主,英文一般的同學可以考慮。
    聞說OU既老師好有心教,但學費係咁多個EN課程黎講最貴。
    我筆者當年同個ICU同事一齊去IN,但係最後大家都冇offer~
  5. 養和醫院
    聞說每月有6千生活津貼,專收靚女,套制服都係最靚。
    讀完有資助可以去返港大讀part time RN。
  6. 聖德肋撒醫院
  7. 仁安醫院
  8. 浸會醫院

私家醫院唔熟,只知大部份都需要學費,而且授課以英文為主。

係呢度要講一講,天下沒有白吃的午餐,免費的課程都好不容易。

而且要有心理準備,EN課程既節奏好快,notes上既野其實唔係好夠,好多野要自己做research、實習時多問多做。

雖然係兩年,但實際上堂時間好少,大部份都係實習。

 

至於RN(Registered Nurse)註冊護士,一般都係HD程度以既課程,修讀年期為五年,課程內容比EN深及多,自然入學要求較高。係2000年因為政府大推「護士專業學位化」,所有護士訓練交由大學處理,所以現時RN課程以大學程度為主。而隨住Nursing 越黎越多外國護士參與研究、做學術去改善病人既護理,所以亦發展到有Master 及Doctor 課程。

RN讀上去仲可以向專科發展,我地會叫呢啲專科護士同事做PRCC姑娘。
現時RN做得耐,讀完Master 又可以晉升做APN(Advanced Practice Nurse)資深護師,所以RN要求高、課程又困難D,但個發展會比EN多元化。

現時RN既課程有:

  1. 香港理工大學
    Nursing 名校,筆者識好多呢度出黎既姑娘都又叻又有愛心。
  2. 香港中文大學
    收生成績高過港大,但Year 2 收好多ASSO 或其他途徑入既學生。
    實習時共事過好多次,好多回憶~
  3. 香港大學
    據說係唯一願意收文科學生既大學RN課程。
  4. 香港公開大學
    醫管局護理學高級文憑
    多人爭,仲難入過大學,因為佢地收人唔止係睇成績,感覺似舊年代既諼士學校制度。
  5. 伊利沙伯醫院、明愛醫院、屯門醫院三間護士學校訓練,三年制。
  6. 東華學院護理學學士
    而家做野地方有個佢地既實習生,見佢好乖好幫得手~
    詳情野冇問,剩係知學費貴同上堂Power Point 教書。
  7. 明愛專上學院
    好新,暫時未識有同事係呢間畢業。
    2017平均收生分數為19.8分。

此外,雖然大家都認為RN比EN人工高,但其實係私營市場,EN既工作配對係比RN多,因為EN人工較低,而且私人看護既工作,一般EN已經可以勝任。所以EN其實仲有條freelance 既出路,如果有左小朋友,都係一個唔錯既選擇。
筆者識幾個EN媽媽都係咁,小朋友返學時做下私人看護,到放學就去湊返小朋友,既可工作又唔會錯過小朋友既成長。

但畢左業、staff 左都仲未完架~每兩年就要續一次牌,要有足夠Continuous Nurse Education points 先可以續牌。

 

Nursing 課程爭取入學已經好難,讀書同實習亦都唔易過。因為護士除左自己野,仲要每個醫療同事既範疇都知少少,先識得點幫病人安排要咩同事幫手,即使醫生都會mark 底,但我地始於係對我病人最多、最長時間既人,所以基本讀書能力一定要有。

實習除左實地將你課堂學既野應用出黎、響其他staff 身上學點係醫院工作之外,仲係學點做人。你咩都唔識唔緊要,人地預左你係學生、唔會期望你幫到啲咩,但禮貌、態度、修養一定要好,唔好係個咁高壓既工作環境入面仲要增加staff 既壓力,人地唔教你野好正常,因為佢冇收你錢;人地教你野要好好記住,唔好覺得理所當然。

有啲院校冇老師帶,只安排Ward 入面其中一個staff 做你mentor。初時一定好徬徨、唔知點算好,唯有自己主動去問、去學。世上咩人都有,有人會對你好、有人會對你唔好,但唔好因為係實習遇到不公就懷疑自己,因為出黎做野,仲多呀。

想做護士,最重要有愛心。
知識同技能好易學,但如果你個人冇愛心,只係為錢揀呢行,咁你會好痛苦。因為入院既病人心情通常唔好,有人會發你脾氣、亂投訴、甚至上下其手,亦有好多無理取鬧既家屬、獵奇系同事或頤指氣使既大夫,要受既氣唔少得過飲食業。仲會有好多奇奇怪怪、不能為外所道既困難。
因此,護士都可以話係百屌成材既專業。

所以,想做之前諗清楚你既起點係為乜,寫低佢當護身符咁隨身攜帶,當遇到就黎擊潰你既挫折、就黎想放棄既時候,拎出黎睇下佢,問下自己個初心係點。

正常有成績、有家底既人都好少揀Nursing,因為世上有太多比Nurse 好既專業,正如AL揀Bio Group 而唔棄Maths Group,你一定係有啲野想做。

份份工都辛苦,但如果你信仰於自己既工作意義,你會冇咁易懷疑自己既價值。

都祝福每個想投身護理界既你都可以早日達成理想~

 

作者:Su子

香港土生土長的八十後,曾立志讀好書去服務社會上最卑微的人,開始工作才發現所謂的「卑微」源於剝削,堅持在自己能力內減少不公卻漸漸明白自己的無能為力。喜歡音樂、電影、博物館、漫畫、閱讀、生物學、心理學。在營營役役的生活中,試圖在文字中找回自己。

閱讀後覺得好,請多多讚好及分享~:)

其他熱門文章

  • 【遊戲攻略】解鎖二三艘潛艇教學 《Monster Hunter Rise》刷國王獨角仙悶到瞓著 by 滅盡殺手
    早兩日我哋嘅一篇小知識技巧篇入面有提到要盡快解鎖收集道具必備嘅潛水艇,雖然做村任好快就會有第一隻潛水艇,但係要 […]…
  • 「媽劇停」之苦 by 小盛女
    最緊忙緊咩?忙緊請人,你無睇錯,我終於可以請人喇!唔使再一個人頂晒所有嘢,好感動!起初我滿心歡喜,以為會有好多CV send過嚟,點知原來10份都無,仲要有幾份係印度人,我唔係歧視佢地,只係唔識中文真係搞唔掂,好難勝任「媽劇停」嘅工作。…
  • 【邊度囡囡最好?】日本妹世界第一 by Ban Na Wong
    日本妹擁有純潔既氣質,動人既笑容,楚楚可憐既眼神,返到屋企會同你講「哦街li」,較埋熱水俾你沖涼,煮好飯等你食等等,嗚呀真係頂唔順,好想..........以上呢D,日本妹稱之為女子力…
  • 香港警察的政治智慧 by 健吾
    當時特首梁振英叫盧偉聰向習近平交代香港犯罪率情況,盧偉聰即說道:「現在我們的犯罪率是1978年以來最低的一年。」習近平指出香港社會情況變得複雜,人口亦愈來愈多,但犯罪率反而有所下降。盧偉聰答道:「要感謝我們內地的公安部對我們的支持,沒有他們…
  • 《彼岸島》絕對是我人生中看的其中一套最令我無言的漫畫。 by 鵝鑾鼻燈塔
    如果你沒有看過,恭喜你,你的人生是完全沒有任何損失的。這種比狗血更狗血的劇情,永無休止又不斷無限loop的橋段,看了也想把自己雙眼也插盲。簡單來說,主角不論做了甚麼,也無法打死早已不死的吸血鬼之王,只能眼看自己的同伴一個又一個的死去(有時甚…
  • 【轉工適用】Reference Check 又黎料啦 by HR 扮工週記
    Reference check 一般會喺個 Candidate 拎咗 Offer 之後做,公司會跟據 Candidate 俾嘅資料,然後向以前嘅僱主查詢所提供資料係咪屬實。不過唔係所有公司都會做,一般某啲特定行業或者有少少規模嘅先會去做。其…
歡迎讚好我們的facebook page,免費資訊源源送上。

文章資訊

ID: 182552
Date: 2018-07-12 18:11:05
Generated at: 2022-07-03 00:01:11
Permalink: https://www.vjmedia.com.hk/articles/2018/07/12/182552/如何成為護士?(包括登記護士與註冊護士)