女權份子憑乜嘢覺得自己高人一等可以阻礙球賽?

 

我相信世界盃之於職業足球員乃至全球嘅球迷都有極特殊嘅意義,唔同於球會嘅比賽,喺世界盃,你係代表自己嘅國家去比賽,去爭奪四年一度嘅殊榮,為國家爭光,亦為呢個比賽增加一份額外嘅意義,就算唔睇足球,只係呢份使命已經令人肅然起敬。更何況,能為國家捧回大力神盃本身就係每個足球員嘅夢想,對於其足球生涯嘅意義係無可取替嘅。

但係,喺尋日,克羅地亞嘅球員搏曬老命咁進攻,希望扭轉敗局嘅時候,就有四位女觀眾扮成保安定唔知警察咁,闖入球場草地,逼使球賽暫停,雖然為時不足一分鐘,但進攻節奏嘅嘢停咗就係停咗,冇人估算得出呢下短短嘅暫停對賽果造成幾大影響,可能微不足道,亦可能重如泰山。

有人就透露,呢四位唔係一般嘅球迷,而係女權主義者,今次係一次行為藝術,又或者係示威行動,係為「政治囚犯」發聲,更稱讚今次嘅行動為比賽生色不少。

我就覺得今次嘅事件至少反映咗有一部分嘅女權主義者係唔識尊重他人嘅,或者至少覺得自己係比他人高一等。咩情況下,一個人會犧牲他人嘅嘢去促成自己嘅目的呢?係喺覺得自己嘅目的比他人嘅嘢更重要嘅時候?

唔係,咁仲未夠。係喺覺得自己嘅目的係重要到可以犧牲他人嘅嘢,又或者他人嘅嘢唔重要到可以被犧牲嘅時候。

而誠然,班女權主義者明顯覺得佢哋追求緊嘅「公平、公義」係可以犧牲人哋四年先有一次嘅機會、咁多位球員、領隊同其他人員嘅付出同努力、人哋國家國民嘅期望、比賽嘅公正性等等。

如果仲覺得自己嘅行為係恰當,他人嘅犧牲係理所當然嘅話,覺得只係一場比賽云云,我就覺得班人真係唔識何謂尊重。
其他人對於佢哋嚟講原來只係可有可無嘅工具,人哋作為足球員嘅榮譽可以任意踐踏。

或者有人話,人哋係為咗公義所以示威,目的係高尚過世界盃嘅。然而,以公義之名就可以隨意踐踏他人重要之物咩?我哋係咪只需要理結果,唔需要理手段呢?

如果要理手段,咁你點justify話幾百萬人嘅夢想係expendable嘅呢?

如果只需要理結果,你今次行動嘅結果係咩呢?你根本講唔出有咩實質嘅結果,令到呢班人嘅犧牲係值得嘅。

呢件事最令人心寒嘅,係原來有班人為咗自己追求嘅公義,係唔會理自己嘅行為傷害咗其他人,亦唔理其他人嘅價值。

以大多數之名隨意踐踏少數人嘅價值,以大義之名隨意貶低他人畢生追求之物,咁樣嘅價值觀係同自由社會相違背嘅。

今次嘅事,唔值得令人興奮,而係要反思,反思自己係咪要不擇手段,任意傷害他人嚟追求自己嘅公義。如果班女權分子覺得世界盃只係普通嘅、多啲人睇嘅球賽,咁真係無知得可怕,缺乏同理心,難以理解他人嘅價值,咁嘅人拎住公義嘅大旗橫衝直撞,就好似幾歲細路拎住發射核彈嘅大掣咁,教人不寒而慄。如果佢哋明知世界盃對某部分人何其重要,都依然選擇咁做,咁即係冇尊重過人,咁嘅人話追求公義,真係天大嘅笑話。

 

作者:山城小豬伯

總編話佢:「真人係幾靚仔嘅」

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 182699
Date: 2018-07-16 23:02:37
Generated at: 2020-02-17 12:19:01
Permalink: https://www.vjmedia.com.hk/articles/2018/07/16/182699/女權份子憑乜嘢覺得自己高人一等可以阻礙球賽?