睇睇香港人親手製造個乜L 嘢嘅網絡世界?

【今日書展】

#忽然emo一下

我開page,好似都有十年啦。而家好多新作者,想出書,出版社都會問佢:你有冇page?你個page幾多人?冇page?你搵唔搵到陶傑、呂大樂、健吾、林日曦幫你寫序?唔得呀?不如下次先再傾?

其實,係網路玩左咁多年,我block過唔少人。冇禮貌既,對我相識唔好既(即係鬧黃之鋒痴鋒、話周永康搞亂檔講粗口嗰啲),我都有block,條list長到你都唔係好信。

因為,我知道我起個page出黎,我既讀者,要既唔係呢啲冇質素既留言。

 

(無營養留言截圖為編輯所加)
有興趣追POST 可按此……總編表示真係好浪費時間)

 

我搞咁耐,一個page有廿幾萬人睇,我好感恩。但一個page有廿幾萬人睇,唔代表你可以人身攻擊佢既朋友,甚至對我作出無理指控,炒花生,而不斷咁既抵毀人。再加上嗰啲廣告agency 火上加油,從而人格謀殺一個人。

呢十年,我係網上面睇左好多好多野,我只知道一件事:好多人話果啲人係仆街,但佢對我好好,我都會記得,果啲人對我好好。(我唔會講某網總編既)(編按:係啦你唔講就唔會有人知你講我 <3 )。而有啲人呢,好多人話佢好好,但佢只要對我做仆街事,我都唔會當佢係好人。

如果一個人,寫左一啲野,你覺得係論點有問題,文明既人,係可以同佢斟酌論點,以事論事。但後尾我發現,呢個世界既人,論點拗唔贏咩?先鬧性取向(邊個知名人士我唔講啦),再唔係就話人肥閪(邊個左膠page我唔講啦),再唔係就話人白卡(即係精神病呀,講邊個我唔講啦),一係就話十幾年前幾樣衰之類。至於所謂誠實,就更好笑。嗰啲暱起無名無姓既acct 後面既人,你要求人誠實?

 

 

所以,網路世界發生既事情,我都唔可以太認真。尤其是,以前,我地都以為網路可以為人帶黎幸福,帶黎革命、令世界更近,令人與人更和諧。但好可惜,其實唔會。

更好笑既係,當我地係度恥笑緊所謂抖音會摧毀一代青年之時,在網路沉迷食花生既人,其實同睇抖音玩抖音既人,有咩分別?咪又係覺得,娛樂係免費既,搵啲人娛樂下我,之後hit and run?

之後你取笑x國人?笑什麼笑,你也只是x國人,你也有文革基因。陶傑的小農社會論,不是蓋的。

 

 

作者:健吾

健吾
專欄作家、記者、編輯……商業電台節目《903國民教育》、《光明頂》主持,香港中文大學日本研究學系講師。著書超過40本。email:[email protected] |Facebook: facebook.com/kengopage |微博:t.sina.com.cn/kengowrites

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 182755
Date: 2018-07-18 00:38:14
Generated at: 2022-01-19 05:35:21
Permalink: https://www.vjmedia.com.hk/articles/2018/07/18/182755/睇睇香港人親手製造個乜l-嘢嘅網絡世界?