李嘉誠與香港大學(的鬧鬼傳說. . . . . .)

小城小事 / 最新文章綜覽

 

一九九四年,耗資百萬嘅莊月明文娛中心(CYM)喺港大建成,連接咗理學院同主校園嘅道路,對於好多學生嚟講,最有印象嘅除咗有HKU第一食堂——CYM之外、就係有個百佳嘅啊姐成日問你有冇儲分,仲有嗰條有上冇落嘅電梯。呢棟典雅而幽靜嘅大樓,貫穿港大師生二十幾個寒暑,但係大家佢嘅真相又認識幾多呢?

大家好吖,我哋係Professor⋯⋯Kong U。

今日就等我哋解答呢個傳說嘅真相。一九九零年,香港富商李嘉誠嘅老婆莊月明,離奇過身,外界對佢嘅死因一直充滿疑點,而李嘉誠亦絕口不提,令人懷疑當中係咪另有內情。莊月明老豆係香港第一代鐘錶大王,對當時仲係窮褲仔李嘉誠嘅發跡有好大幫助。喺莊月明死左之後,李嘉誠就捐錢起咗呢棟莊月明文娛中心,同埋佢旁邊嘅月明泉。當時李嘉誠選址,第一係因為莊月明本身係HKU嘅Alumni,求學時期就住喺位於月明泉嘅Old Hall。第二,CYM背靠大平山,面向維港,正對李嘉誠舊居,喺風水學上一個絕佳嘅地方。但同時一直有人話喺CYM見過莊月明嘅靈魂,鬧出唔少嘅傳說。

 

 

莊月明嘅大樓係以十字圓拱型設計,四面都有各自嘅通道,好似李鄭屋漢墓咁,儼如傳統棺材、墓葬嘅設計。大樓入面嘅玻璃以圓形、交叉、方形等等作為基礎圖案,貫穿成座大樓嘅外窗、欄杆,所構成嘅圖案形同道教、符籙嘅標記,配合埋不依傳統設計嘅灑水系統就形成咗金錢劍嘅形狀,作震攝鬼魂之用。呢啲特別嘅符號喺成座大樓都隨處可見。

據說莊月明喺非常貪靚、妒忌,但經常要用輪椅代步而唔開心。CYM嘅設計就好似唔想莊月明離開呢棟大樓咁。CYM樓高六層,以一條電梯貫穿,但呢條電梯係有上冇落,落去嘅話只可以用樓梯,而且樓梯方向不斷旋轉,即使正常人都會覺得極唔方便。CYM嘅扶手更加係特別闊,好難捉實,仲用咗上等嘅棺材木——柳州木製成。而據說靚女行過呢度總係會特別容易仆親,唔知⋯⋯係咪引起咗其他「人」嘅妒忌呢⋯⋯?但其實CYM係有為輪椅人士設計𨋢嘅,不過只可以上落一層,之後再轉另一部,極之麻煩。CYM入面唔少廁所都係零零舍舍高咗兩層,除左三樓嘅廁所之外,其他都好似要將輪椅人士拒諸門外咁。而三樓嘅廁所都非常特別,推門入後門之後,就係一條又一條嘅窄路,然後不斷向內迴轉,自轉五次之後先可以到達廁所。廁所門口嘅指示牌喺一個矮而且半坐女性嘅公仔,一推門就係一副只可以照半身嘅鏡。相傳喺夜晚嘅時候,你去呢個廁所總會聽到一把女嘅笑聲喺女廁傳出,問⋯⋯:「我靚唔靚啊。」

 

 

CYM入面係有百佳,同一般超市一樣都係早開早收,但開左無耐就突然改為入夜後就收鋪嘅傳統。事後嘅職員講返,當晚有一位坐輪椅嘅女人入嚟買完嘢唔畀錢,但當職員追出去之後竟然空無一人,水盡鵝飛。及後相繼有唔同職員遇過差唔多嘅事。自此,呢間百佳就變得好唔一樣。

 

 

同CYM同根同生嘅月明泉喺對正莊月明嘅舊居,喺每日嘅唔同時候會噴出三條水柱,中間嘅較為高,而且以三長兩短嘅pattern咁出。月明泉旁邊嘅風水石刻有「月明泉」三隻大字,字體詭異,用色妖冶,入夜之後「泉」字左邊嘅兩點會突然變得唔再顯眼,而出現另一隻 ⋯⋯ 字 ⋯⋯

 

 

幾年前CYM重新裝修同加建,大樓上面嘅圓頂已經不可見,只剩低下半部嘅圓頂部份,屋內設計大體無意,唯一唔同嘅係,CYM由「圓頂」變成「黑箱」,好似為呢個傳說再加添一層神秘嘅色彩。

 

本文由Gööp宣傳大使 港大周柏豪、港大方力申 撰寫

 

 

作者:Cube

Cube
手機程式Gööp的吉祥物,一般出沒在香港大學,受遊客和小朋友歡迎,時常被誤會是晴天娃娃行走版。https://www.facebook.com/goop4groups/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 182805
Date: 2018-07-19 05:15:06
Generated at: 2021-09-18 12:37:17
Permalink: https://www.vjmedia.com.hk/articles/2018/07/19/182805/李嘉誠與香港大學(的鬧鬼傳說-)