城大3M 樓層廁所之謎——女廁曾發生命案,要改為男廁以陽鎮陰?!

小城小事 / 最新文章綜覽

 

講到城大,大家自不然會諗起QS ranking乜乜乜,再唔係就行中門GDP唔過3點點點…⋯但係﹗但係﹗大家又有無諗過城大3M嗰層嘅廁所都流傳住一個謎……

 

 

城大3M廁所一直流傳住一個講法,就係3M嗰層係全男廁,而且部份男廁仲要係無尿兜,所以唔少男同學係準備辦人生大事之際,見到咁嘅情況都會導致交感神經興奮,造成瞳孔放大及支氣管末稍擴張、心跳加速、血壓上升、加速體內儲藏能量代謝、減少皮膚及腸道血液流量、並增加骨骼肌及心臟血流量,即係俗稱嘅神經緊張,質疑自己究竟係咪入錯女廁。

為咗深入核心嘅內圍,我地喺Gööp道就出咗一個叫做「3M廁所傳聞,有無人知咩事?」嘅Post,希望可以拋磚引玉。

 

 

有眼見到同學都提到一啲關鍵字:女仔、地盤工人。但…⋯絕大部分同學係唔知道當中嘅內情,只係有好多花生友留名想知多啲。我地就抱住「人人為我,我為人人」嘅精神,犧牲小我,大膽假設,細心求證,深入虎穴,加上超常人嘅第六感,同埋鍥而不捨嘅求真精神,終於將呢個謎解開咗﹗

就住點解「3M無女廁」呢個問題,我地發現到其實3M嗰層原本有女廁嘅,而且總共有三個講法︰

 

1. 3M女廁曾經有命案

據聞女廁曾經發生過命案,而受害者嘅冤魂一直留係廁所入面,所以搞到入面陰氣重重。為咗辟謠,校方一不做二不休,直接將嗰個女廁改做男廁,用陽氣去鎮住啲傳聞。

 

 

2. 3M嗰層曾經有命案

據聞曾經有女同學係3M廁所時遇到靈異事件,原來曾經有建築工人係3M樓層喪命,而廁所,尤其女廁係聚陰之地,所以就流出咗呢個傳聞。

 

 

但係,經過我地一而再,再而三嘅考究之後,就發現呢個講法幾有問題。我地翻查翻報紙,發現二零零八年城大的確發生過工業意外,而當中的確有一位工人不幸喪生。但係,呢單意外係發生係康樂樓(即係而家嘅中國銀行大樓)六樓,同3M樓層都真係幾遠遠遠遠下,同埋兩邊係通唔到過去。所以呢個講法極有可能只係捕風捉影,將兩件事串埋咗一齊姐。

 

 

3. 3M女廁係非禮熱點

為咗了解真相,我地不惜犧牲小我,潛入虎穴向資深老師打探消息,發現真相只有一個﹗其實3M嗰層原本有女廁嘅,但因為係位置上屬於地庫地段、而且又係後樓梯,仲要係好易比街外人入到嚟,集齊咗犯案者最愛嘅罪案三元素,所以僻靜嘅3M女廁就成為咗偷窺犯嘅熱點。校方為咗保障女同學嘅安全,所以就索性將女廁換牌,直接改做男廁。而後來網典亦有提及過呢件事,咁睇嚟都好接近事實真相啦。

 

 

最後嘅最後,我地本住大無畏精神親身走訪參觀蒞臨3M所有廁所,見到而家嘅3M有男廁,亦都有女廁。我地再次用盡僅餘嘅顏值搵到位男同學做探子,幫我地進入男廁刺探,經證實男廁係有尿兜嘅。

 

 

3M嗰層而家有男女廁係校方悉心嘅安排,因為一大班百幾二百人上lecture,中途break要去上人生大事,就可以有分流啦,坐下面嘅同學就去3M解決,坐山頂位嘅同學仔就前往4樓,咁大家就可以暢通無阻咁解決人生大事。感謝校方貼心嘅安排,感謝主!

 

本文由Gööp 宣傳大使 城大排骨精、城大痴線佬 撰寫

立即下載Gööp https://goop.ai/getgoop

 

 

作者:Cube

Cube
手機程式Gööp的吉祥物,一般出沒在香港大學,受遊客和小朋友歡迎,時常被誤會是晴天娃娃行走版。https://www.facebook.com/goop4groups/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 182934
Date: 2018-07-21 18:10:24
Generated at: 2021-09-18 13:42:16
Permalink: https://www.vjmedia.com.hk/articles/2018/07/21/182934/城大3m-樓層廁所之謎-女廁曾發生命案,要改為