【裝修個案】劏房你就見得多，合法去屋宇署入則你又見過未？（市區舊樓、三百呎、三十萬）

 

香港政府唔解決住屋問題，公屋俾晒新香港人，想買樓自住固然係遙不可及，想喺市區租個單位，好似小妹呢啲90後啱啱踏入職場無幾耐，諗都唔好諗。既然係咁，市場對於近市區嘅劏房需求就非常殷切，無他嘅，喺返工附近有個地方沖涼訓覺，邊個打工仔唔想丫。既然係咁，小妹今日就介紹下我公司早排完工嘅其中一個裝修個案，銅鑼灣時代廣場附近某單棟洋樓嘅碩果僅存天台單位，點樣變成合法劏房出租。

個案特色：

🔸合法劏房，屋宇署話OK，管理處都無得唔OK

🔸市區舊樓天台屋，303呎，變做四間套房分租

🔸得三十萬！你同我搞掂佢！

 

呢個業主嘅要求好簡單：「三十萬，幫我搞掂佢。」

對住呢類客，喺我哋呢一行真係又愛又恨：
愛嘅係佢要求明確，實事求是，得唔得都好，所有決定都會好爽快；
恨嘅係，少左討價還價，改下呢樣改下嗰樣，就少左機會加嘢，咁就少左機會賺更多嘅錢…

佢嘅單位，叫得做「碩果僅存天台單位」，樓齡就有番咁上下，實用面積得303呎，佢話要間開做四間套房，每間房都要有廁所！

而家呢個老細同師兄都係好敬業嘅人，做到就做，做唔到就拒絕，佢哋話做到，咁我哋就開工。

 

裝修前

 

未裝修之前，都係鬧市中一戶尋常百姓家，特別嘅係，佢係天台嗰層嘅一戶相對比較細嘅單位，從下圖可以睇到，真係通出去天台……

 

 

設計意念

咩話？劏房都同你講設計意念？其實呢，室內設計本身就係將住戶嘅需要，同裝修工程連結起來，唔一定要好fancy 好潮，唔一定要睇落蒙太奇先叫做設計！

小妹話自己叫裝修小妹，其實我嘅工作主要係室內設計，當然我哋呢啲喺公司做後生嘅，梗係要勤力啲，做多幾範，例如幫手聯絡埋師傅，跟進工程之類。

講番呢度先！

（廁所坐得入一個肥仔！）

 

睇過小妹啲相都知道，本身我自己都唔係真係非常咁瘦，而我有位師兄更加係屬於圓碌碌！

香港係發達地區，都市人生活忙碌，營養過剩而缺乏運動，我哋將心比己，都唔會將每間套房嘅格局整到飢民先住得入去，所以我都有俾心機去偷盡啲尺寸，至少令我嘅圓碌碌師兄如廁嘅時候都係坐到入去！（同埋可以關門！！！）

 

市場上好多新落成嘅單位，唔少都有「黑房」「黑廁」，即係有部份房間或廁所，無窗戶通往外面，令嗰度長期缺乏陽光照射，就算唔計陽光紫外線嘅天然殺菌淨味功能，人見得少太陽都無咁開心！

有見及此，既然呢度本身就係三面向外，小妹俾小小心機就可以將四間套房，分佈到每一戶連埋廁所都有窗戶！

（小妹畫嘅圖靚唔靚先？）

 

記住！屋再細都一定要有窗！

 

法例需要（及社區關係）

咁究竟係法例定睦鄰？其實係同一樣野….

話說當業主想搞劏房，管理處知道之後就鬼殺咁嘈，又話咩品流複雜又道友又黑社會又呢樣又嗰樣。

其實佢唔明白，租得呢啲市區劏房嘅，好多都係市區有工返嘅「正經人家」，因為無工返可以去偏遠少少嘅地方住，相同嘅租金可以租大啲，相同咁細就更加平好多。

不過算，有啲嘢爭論來都無用！

 

（多謝屋宇署嘅提點呀！我哋會交足文件架，放心啦！）

 

小妹嘅公司係做正行生意，我唔敢話自己紅燈都唔過馬路，但如果有機會被官府拉人封艇搞到花好多時間處理法律訴訟，咁不如一開始就做足少少！

香港對於裝修嘅法例其實唔係真係咁複雜，總之你要改動單位格局到一個地步，張平面圖同屋宇署嘅檔案唔同，官府知道左就可能搞你，咁所以，做之前就畫得好好睇睇佢，俾官大人知道你會點做，大人話得就會俾回覆你。

而乜嘢叫好好睇睇？小妹上網搵咗好多資料，問咗不同專業人士意見，最後覆核完無問題，就順利俾屋宇署認可專業人士簽名，所以做完成單野之後識多咗好多平時室內設計師一定唔會識嘅野，特別係識多咗好多繁複嘅法例，同埋風火水電煤知識！

咁之後就算管理處call 埋屋宇署來，我哋都可以好從容咁拿出文件來，「無咩事你返出去啦，我做嘢先喇……」

 

成品！

又要平又要有設計？咁師傅食咩？咁我又食咩？

都話左，老細係一個實事求是嘅人，佢一早就同業主講清楚：

「你要平？可以的。咁你就要預左，啲料唔會係上等，師傅亦都一定快手俾你，一日做兩日嘢，唔會慢慢修靚佢，你OK？」

 

（啱啱裝嗰陣，擺明淘寶貨，招紙都未搣！）

 

好似呢個洗手盤咁，小妹唔會呃你，絕對係淘寶貨，當然啦，用得嘅，唔漏水嘅。

仲有唔好諗住個坐廁係自動洗PATPAT 嗰啲！

 

（走廊、門口望入去）

 

（真係住得！）

 

就咁睇都幾靚丫？

我諗個業主諗法好簡單：「理得佢丫，啲人都係租一年半載，啲嘢咁足料做乜丫，反正換下個客之前又要我俾錢執過！」

當然啦，我都係估。

總之就係，我哋打開門做生意，你要平，無話唔得，但一定有啲位唔會最完美，一定有啲位甚至會令人唔滿意，要好少少？可以呀，用呢隻呢隻料，就貴咁多咁多，呢度呢度要修口靚靚，我約多兩三個師傅上多來三幾日，你OK 我OK 丫。

 

個案總結

🔹合法——小妹我識畫圖俾測量師簽名再俾屋宇署，業主放心租客都放心，唔怕半夜三更被人趕走！

🔹工程便宜、立即出租——業主求財！總之「收入 – 支出 = 利潤」！越快收租，越少支出，佢越開心！

🔹平得來都有人性嘅設計——廁所夠闊，每戶有窗，每個廁所都有窗！

 

想裝修屋企舖頭都可以搵小妹問下，歡迎去我page pm 我傾兩句！

WhatsApp: https://wa.me/85291325271
facebook messenger: https://m.me/decorgirl