閨密，唔知點解，好多女仔都興玩呢味，而呢味嘢嘅威力同殺傷力有幾大，睇下前南韓總統朴槿惠就知。佢因為縱容自己嘅閨密好姊妹干政，唔單只冇得做總統，仲搞到要踎監，相信佢英明嘅老豆朴大統領泉下有知，都會激到彈起。之但係，所謂一物治一物，無論閨密嘅威力有幾大，如果受到另一股力量入侵，都好難頂得順，呢種力量，叫做「愛情」。
好姊妹如果各自搵倒愛情，最多見男友多過見姊妹，唔一定會破壞閨密嘅關係。但如果一對閨密好姊妹，同時鍾意一個男仔，就會複雜好多。遇到呢種情況，就好睇個男仔點樣處理呢段三角愛情加兩個閨密嘅特殊人與人關係。處理得當，就可以嘅保愛情又保閨密，但真係好難。處理不當嘅話，好易害到一對閨密反目成仇，就算唔係咁，所造成嘅傷害都好難彌補。呢種惡劣情況，借用高官一句話：「我見過，我真係見過。」
喺N年前，我識得一對閨密，呢度姑且叫佢哋做「閨密A」同「閨密B」。佢哋嘅關係，曾經比親姊妹更親，見親佢哋，都係孖公仔，兩個人之間，乜都講得，幾乎冇所謂秘密。不過，點親密都好，兩個人，始終都有分別。閨密A比較自我，好多時要其他人就佢，閨密B就比較就得人；閨密A個性明顯硬朗，閨密B就相當溫柔賢淑，只要唔觸及佢嘅做人原則，就唔會表現強硬一面；閨密Ａ識烹飪但唔算叻，閨密Ｂ就廚藝一流，我食過，冇得頂；閨密Ａ樣貌普通，閨密B就好靚女。
喺呢度，我唔係要強行比較，因為人始終各有所長，冇話邊個比邊個好，但現實就係，閨密Ｂ集大多數男仔喜歡嘅優點於一身，好多條件唔錯嘅男仔都拜倒石榴裙下。難得嘅係，佢從來唔會將自己當係公主或娘娘，從冇收兵，唔鍾意，就謝絕，唔會玩人攞着數，時下港女真係冇得比。
講咗佢哋咁多唔同嘅地方，亦要講吓相同嘅地方。兩個好姊妹，都非常聰明、非常有內涵、非常重感情、絕對唔貪錢。對於愛情，兩個都好一致，佢哋唔會要求個男仔有車有樓，只係需要人品好、有才學、夠專一、溫柔體貼，如果外型有翻咁上下，就更理想。可惜，正正因為喺愛情方面嘅要求太相似，就出現日後嘅感情創傷。
登登登櫈，男主角出場嘞。佢真係完全符合兩姊妹嘅最高要求，外型官仔骨骨不特止，喺學問方面，上知天文下通地理，學貫中西既博且淵，真係一個令人佩服到五體投地嘅超級大才子。所以，當呢位男神才子出現喺佢咃面前嘅時候，問題就嚟嘞。
好多女仔明裡暗裡都對呢位男神才子有意，包括呢對閨密。男神才子拒絕晒所有女仔，只鍾情於一個──閨密B。點解佢只係鍾意閨密B？大家自己諗。
鍾意閨密B唔係問題，而且兩個人的確好登對，但有兩大問題：（一）閨密A已經向男神才子表露愛意，唔會一開始就主動離場，男神才子要想辦法令閨密A放棄；（二）男神才子正準備向閨密B展開攻勢，但閨密Ａ同閨密B形影不離，就變成佢追求閨密B嘅最大障礙。
為咗解決以上兩個問題，男神才子用咗一個同佢學問完全唔相配兼且非常低B差勁嘅方式──用十分惡劣嘅態度對待閨密A。先係唔睬佢，後來就進化到一見閨密A行近就直接喝令佢走開，等於向閨密A講：「我好討厭妳，妳行開，唔好阻頭阻勢。」男神才子咁搞法，真係極度粗暴咁踐踏閨密A珍貴而真誠嘅芳心。
男神才子實在太過份，我作為男人都覺得佢完全幫唔落。喂大佬，人哋始終係女仔，咁做好侮辱、好傷佢心，而且我所認識嘅閨密A，亦係明白事理嘅人，絕對唔會死纏爛打，對朋友亦好有道義。佢鍾意你，你唔鍾意佢，用關心、溫柔、感謝嘅方式講清楚就得。我相信，如果當日男神才子用呢個方式處理，閨密A一定會好大方咁成全男神才子同閨密B。可惜，男神才子用咗完全相反嘅方式。閨密A原本唔知點解心目中理想嘅戀愛對象會突然變成咁，好疑惑，亦好傷心，有時自己會偷偷地喊。而當男神才子喺閨密A面前勁追閨密B嘅時候，閨密A先至如夢初醒，芳心徹底粉碎。
閨密A終於因愛成恨。佢唔係恨男神才子唔鍾意佢，而係恨男神才子對佢連最基本嘅應有尊重都冇。一次，男神才子寫咗一啲講自己會關心其他人等等一類感性嘅嘢，閨密A見到，即時當住其他人面前，好狠咁鬧咗一句：「哼！虛偽！」
睇到呢度，或者有人會以為呢對閨密會因為男神才子而反目成仇。如果咁諗就大錯特錯，佢哋兩個先唔會為咗男人嘅錯而反面咁低B。閨密B雖然接受咗男神才子嘅追求，但絕對唔會有異性冇人性，見到自己最好嘅閨密咁傷心，而且話晒同自己有關，難免內疚，唔知點算好，唯有傷心埋一份，好多時自己靜雞雞喊。閨密A亦好識做，知道閨密B終於搵倒一個適合嘅對象，就成全呢個好姊妹。佢哋仍然係朋友，只係再冇以前咁親密。始終大家都各有各嘅生活、各有各嘅人生。至於男神才子，始終係個好人，經過呢件事之後，佢認真檢討自己嘅錯，喺待人接物上，明顯有所進步，呢方面，佢真係應該多謝自己曾經深深傷害過嘅閨密A。
經過一段時間之後，閨密B同男神才子終於正式步入教堂。婚宴當晚，閨密A好大方咁出席。佢雖然受過唔應該有嘅傷害，但已經唔再懷恨，仲好大方咁祝福一對新人。見倒呢個情景，我只係覺得，男神才子當日嗰種粗暴態度，係佢愛情路上永遠冇辦法抹走嘅污點。
今日，男神才子同閨密B係一對恩愛夫妻，生活幸福，羨煞旁人。至於閨密A，就一直單身，但千萬唔好以為佢單身好慘，佢自由自在，工作穩定收入高，正在享受人生。閨密A證明一樣嘢──女人單身，唔需要男人，一樣可以好幸福。
最後，我要奉勸男人一句：「女仔嘅芳心，係世界上其中一樣最好嘅嘢，如果有女仔對你獻出芳心，即使你拒絕，都請你用尊重、愛護、感激嘅態度對佢，踐踏芳心，絕對唔係一個男人應該有嘅行為。」
為何今天好像剩下Mirror 一個偶團？
我去到2021年先唔再睇TVB——正向聯想 (Positive Association)
分手咪分手囉，三口六面講清楚好難咩？
【遊戲介紹】做個中世紀領主 《Going Medieval》極多玩法暗藏食人肉滿足饑餓度
薛定諤人生最尷尬的恥笑——薛定諤的貓實驗
寫於與舊單位分手之前——習慣化 (Habituation)
2018年7月30日
