咩係銀團貸款 (Syndicated Loan)？

我諗好多人都未聽過咩係銀團貸款 (Syndicated Loan)，因為基本上佢只會出現係比較大型既貸款交易中。照字面解，佢既意思非常簡單，係指多過一間銀行參與同一單交易，並共同參貸俾借款人。

Syndicated Loan 出現既原因係為左分散風險。試諗下一間公司要借 USD200M（依個銀碼對於企業銀行部黎講係十分普遍），如果要一間銀行全部借哂 USD200M，風險或者太大了。所以呢，最好就係搵多幾間銀行一齊參與，每間借 USD50M，今既可以做生意又唔會咁大風險。

係 Syndicated Loan 既流程中，客戶一般會先約見幾間大型銀行商討價錢、借貸條件等，當大家達到共識後，果幾間大型銀行會拎到承銷商 (Underwriters) 既身份，並進一步以同樣既借貸條件、但較低既價錢向其他銀行 (Participants) 銷售一部分既貸款。依個方法可以幫助客戶拎到大額貸款、又可以免去客戶需要同數十間銀行傾借貸協議既煩惱（可以參考 Deal Team 的分工 (3)：談判的藝術）。

Underwriters 要成功向 Participants 銷售其實唔係一件易事，Underwriters 需要非常了解各個 Participants 既參貸偏好、貸款市場既流動性等，以確保係拎到 Underwriters 既身份後能夠成功賣出部分貸款。

Syndicated Loan 其實仲有好多可以探討既地方，例如1) Underwriters 賣得唔夠多點算、2) 由 Underwriters 放款先定等埋 Participants 先一齊放款等等，而且 Syndicated Loan 所需要既法律文件遠遠比普通貸款為多。

好多銀行都非常重視銀團貸款 (Syndicated Loan)，因為路透社 (Thomason Reuters)丶彭博 (Bloomberg) 每年都有一個排行榜記錄各間銀行做左幾多單銀團貸款、同埋用咩身份去參與。為左係銷售客戶 (Pitching) 既時候顯示到自己間銀行有幾勁，每間銀行都希望爭取拎到承銷商 (Underwriters) 既身分，表示自己有能力帶著一大班參與行 (Participants) 向客戶參貸。所以係國際大行做Syndication Team 既老闆係行內都比較出名，點解？咁多間 Participants 都等佢分啲生意黎喎，簡直係米飯班主！

講番張圖，佢係2018年上半季亞太區 (除日本) 承銷商排行榜 (日本係獨立一個市場，因為日本銀行基本上霸佔左當地99.9%既參貸機會)。頭十位既銀行有中資 (BOC丶CITIC丶ICBC)丶澳資 (ANZ)丶英資 (HSBC丶Standard Chartered)丶日資 (Mizuho丶BTMU)丶星資 (DBS)丶台資 (MEGA)。

上面既銀行除左係自己既根據地非常強勢之外，多數會有另一個據點。例如日資丶Standard Chartered丶DBS 係東南亞非常強勢，HSBC 係中國超多生意等等。

唯獨係中銀 (BOC) 今年係各個市場都非常強勁，遠遠拋離第二位既澳新銀行 (ANZ)。不過係我印象之中，雖然 BOC 係勁，不過未致於可以大幅拋離其他對手咁多。唔知有冇 BOC 既朋友可以講下點解 BOC 今年可以咁勁呢？

作者：Banker J——企業銀行家

90後，之前係大型銀行做MT (Management Trainee)，Rotation去左好幾個部門，最後落戶 Regional Corporate Banking RM，專職併購融資丶飛機融資丶項目融資等。做左幾年，對各個部門既分工略有認識。依架，去左另一間Bank既Investment Banking Division做Structured Finance了。

閱讀後覺得好，請多多讚好及分享～：）