扶手電梯殺人事件

 

屋村商場下行扶手電梯停止運作，一名中年男人倒地，雙腳仍然喺梯級上，前額嘅傷口將電梯盡頭嘅金屬蓋板染成鮮紅。

男人四肢呈不規則彎曲狀態，身軀向天弓起，身下壓住一個六歲男童。

我跪低，用力將男人翻身，抱起細路，佢全身攤軟，傷勢難辨，拍極佢都冇反應。

我手震，探探兩人嘅頸動脈，腦裡現出兩幅零起伏嘅心電圖。

周圍冇其他人，我拎起對講機：「控……控制室，快啲Call白車！」

我無法忍受自己同兩具屍體喺一齊，跑返控制室等待救援。

黑西褲濕而溫熱，貼住皮膚極之難受。

我抖幾下大氣，打電話畀老婆，「我今晚要遲啲先返到嚟，叫阿仔聽啦。」

我諗起老婆個眼瞓樣，「唔好嘈醒佢啦，聽日仲要返學——」

「佢扮瞓咋，次次等到我返嚟佢先肯瞓嘅。」

笑聲，腳步聲，開門聲，鬧仔聲，然後係阿仔把聲。內容唔重要，我只想聽到佢把聲。

收咗線，我開始喊。兩個生命就喺我眼前逝去，其中一個同我個仔一樣咁細個。

然後，我聽到白車聲，我拍檔發叔死都唔肯喺清場之前出去。

我沿路折返，發現頭先步出咗兩軌漸行漸淡嘅血色鞋印，我對鞋底嘅血，早就乾透。

救護員同警察到場，我坐喺商場一角嘅硬凳上，被數次問話，但我情緒未平伏，語無倫次。

「兩名死者係父子。案發時候係夜晚十點五十五分，鋪頭閂晒門，冇其他人，冇閉路電視，唯一嘅目擊證人係商場保安。」

「可能係機件故障，或者係人為整停部電梯，但急停掣上面搵唔到指紋。」

我聽到兩個阿Sir向後至嘅Madam匯報，其中一個差佬向我行埋嚟。

「先生，好啲未？」

我勉強點頭，「我頭先巡緊更，突然『呯』一聲好響，我跑到去，就見到一大一細跌低咗……我冇電話喺身，就叫同事報警。」都斷咗氣，唔通送去醫院就可以得救？

「你睇唔睇到部電梯停低嘅一刻呀？」

我搖頭，「雖然我有急救牌，但嗰陣時佢哋已經……」我忽然意識到雙手染滿血，急急抹喺白恤衫上，血花四散，「你哋會唔會告我救唔到人㗎？」

「唔駛咁驚，如果救唔到人就要畀人告，法院實迫過醫院啦。部電梯最近有冇咩問題呀？」

「應該冇。」我一再諗起近年多宗電梯意外，「肯定係偷工減料，真係化學……」

「呢方面專家會再研究。唔該晒，一陣間麻煩跟我哋返差館錄個正式嘅口供。」

發叔坐喺我隔離，畀人問完話之後，就轉向我，「我聽日就寫信辭職，死咗人，點喺度做落去呀？」

「仆街，今日明明輪到你巡更同鎖梯，我幫你硬食咗喇。」

「搵日請你飲茶囉。」發叔雙手合十，肯定慶幸自己唔係發現屍體嘅人。

突然，強光一閃，兩個記者居然用相機對住我哋，我大鬧：「唔好影我！唔關我事！」

「部電梯幾耐冇維修過呀？同隔離屋苑單意外係咪同一個承建商？個細路係咪被個男人壓死？……」記者啲問題仲多過差佬。

我擋住鏡頭，想跑出商場避開佢哋。

幾個差佬衝埋嚟，攔住我，「其中一名傷者救得返，話係你整停部電梯！」

 

記者擁埋嚟，連環閃光，我諗起審訊室傳聞中嘅迫供大光燈。

「細路救唔返，大人就冇乜大礙，伙記喺醫院同佢錄緊口供。」

我被帶上警車，頭先向我問話嘅差佬講：「落假口供，冇罪都變有罪。」

「我一時糊塗……係我撳停部電梯，但我冇罪……」我垂低頭。呢個時間我本來沖完涼上咗床，聽日休假，或者我會嘈醒老婆做下運動。

白恤衫上，血跡酒紅，旁觀者睇到實會以為受傷嘅係我。

我開始回憶成件事。真相喺記憶裡面，但記憶好似血鞋印，充滿坑紋。

白色警車轉過幾條顛簸嘅街道，到達警署。走入警署口供房，白枱白凳白光燈，我坐低，背脊、雙手都驚到冒出冷汗。

「案發經過係點？」

我每講一句，都停一停，等警察筆錄，「公司規定十一點鎖梯、清場，跟住就收工，原本由我同事負責，但佢去咗廁所，我唔想遲走就自己嚟。去到條梯，有兩個人喺一樓，我等埋佢哋落樓先。

「大人篤住手機企定定，但個細路跑落嚟，後尾大叫，佢對鞋攝咗落電梯條罅度，我見咁危險，就同個男人單聲，然後撳停部梯。

「救返細路之後，個男人突然衝落嚟，衝力大到將我撞暈咗。我再起返身嗰陣，發現佢兩個已經斷咗氣。」

口供紙上字跡龍飛鳳舞，警察冷冷問：「點解你一開始又話睇唔到有人整停部梯？」

「驚囉。就算係為咗救人……單嘢點都有少少關我事。」我將臉埋喺雙手之間，殘留血嘅味道。

我抬起頭，心一沉：「係咪會告我誤殺㗎？」

我得到嘅只有另一個質問：「你撳掣之前，有冇提醒男傷者？」

「有，我話：『小心！我要撳停部梯。』佢本身見到個仔對鞋攝住咗，好緊張添㗎。」

記憶嘅坑紋質問：「你肯定係撳掣之前？定喺警告期間，已經撳咗掣？」

我忽然變成一個觀眾，喺半空俯瞰自己當時一連串嘅動作。但腦裡播放速度太快，聲音同畫面斷裂，要再慢啲，倒返最開頭，再睇過……

定格於每一微秒，烏低身幫細路整鞋嗰陣，個男人絕對係喺我撳停部梯之後，隔咗一陣先仆落嚟嘅。

冇錯！咁重要嘅細節我點可以錯過？我絕對一清二楚。

「部梯停定咗之後，個男人行咗幾步先叉錯腳。二百磅壓落去，幾歲人仔點頂得順？唉，真係陰公……我畀佢撞到攤攤腰。」我背脊忽然隱隱作痛，更加印證我嘅記憶。

循例講多兩講之後，就落完口供，但基於有人命傷亡，我被拘留。我打畀老婆，避重就輕又將件事講第三次，我叫佢同個仔唔駛擔心。

當晚，我瞓喺床板上眼光光，腦裡又將腳印重新踩過一次次，每次都將坑紋填滿一啲，直到只剩餘兩攤圓滿嘅血泊。

我夢見墮梯嘅人係我，卻喺夢中為無辜捲入事件嘅保安而哭泣。

但現實卻係歪曲事實嘅狡辯等住我：「我個仔冇攝到對鞋入電梯！」

 

嗰個責死自己個仔嘅男人弓住身，彷彿從此抬唔起頭。

佢雙眼注滿恨意，掘住我：「我個仔冇攝到對鞋入電梯！當時保安烏低身，根本係瞌緊眼瞓，唔為意梯上仲有人就熄咗部梯。」

我喺被告席激動到捉實鐵欄，好想大叫：佢講大話！

檢控官自以為正義：「控方呈上證物，經過檢驗，死者嘅拖鞋並無捲過入電梯嘅痕跡，所以急停電梯嘅理由完全唔成立，呢宗意外純粹係因為被告嚴重疏忽。」

全場嘩然，庭上啱啱仲向我深表同情嘅觀眾都轉風向，一筆抹走我嘅傷痕。

一幕幕畫面平空浮現，擋住我嘅未來：判官敲定我人生嘅喪鐘、喺監獄畀真正嘅惡人糟質、我個仔長大成我唔認識嘅人……

律師要求休庭三十分鐘，同我對話。

「無論你係咪講真話，我作為你嘅律師只能夠相信，但我希望你講嘅『真相』唔好有任何犯駁位。」

我舉起三隻手指指向天，「我發毒誓，我只係想救個細路。」

「你諗真啲，仲有冇咩細節漏咗？」

我合埋對眼，揞實對耳，努力諗……但件事已經成幾個月前，莫講話細節，連事情大概，我都只係背書咁背。

我越急，個腦越係空白，忟憎到全身嘅血液好似燒滾咗，「我唔知呀！我唔知呀！我嗰陣踩足全日，對眼放空等放工，我根本唔知自己做過乜！」

我怒吼過，冷靜返，總算重播到事發經過。

但撳停梯、提醒男人企穩、細路話攝住對鞋、男人仆低……每一件事都喺同一刻獨立發生，好似一串斷咗嘅珠鏈，每粒珍珠各自觸地而上下彈跳，零碎、混亂。

無分先後，無分因果，偏偏呢兩樣魔鬼卻主宰我嘅命運。

「總之，部梯停咗，我烏低身想幫個細路。我點估到係假㗎啫，佢咁講，我咪咁信。」但連我都開始唔相信自己……

律師踱步，「個男人當時有咩反應？」

「如果唔係有人瓜咗，我連佢係男定女都冇為意啦！」我捉住頭髮，頭皮好痛。

律師望實我，「記住，你唔可以答『唔知』，你好清楚自己做緊乜，就算唔係，都要扮係！」

我混混噩噩再次走上法庭。場邊，老婆勉強對我笑一笑，個仔有啲怕醜，但一啲擔心都冇，佢仲未到懂事嘅年紀。

如果我入獄，我生命中最重要嘅人，會唔會離開我，搵過第二個人依靠？

律師開始盤問責死自己個仔嘅男人，「請問意外發生時，你做緊咩？」

「咪喺電梯度企定定等囉。」

「點解你當時唔係同個仔企埋一齊？」

罪魁禍首眼窩深陷，臉容緊繃，「我個仔好叻仔好活潑，自己行落去先。」

「你有冇睇實你個仔行？」

罪人眼神閃縮，「有。」

「你講大話！你當時根本乜都冇留意！你玩緊電話，你發緊吽哣，當你意識到自己做緊乜嗰陣，你個仔已經死於你嘅疏忽！

「死者極有可能係扮攝住對鞋，想博你望佢一眼，而我當事人誤信咗，佢嘅好心的確導致不幸，但真兇，係你！」

我興奮得握實拳頭，指甲深陷於掌心。估唔到法援都有好似包公咁明辨是非嘅律師！

旁觀者被說服點頭，同我一樣都覺得怒火中燒，一日都係呢個不負責任嘅父親！

檢控官大叫反對：「反對辯方律師作出毫理根據嘅猜測！原告人當時做緊咩，同被告係咪職業疏忽完全無關！」

「我只係想提醒各位，真兇係原告人，佢為咗自己良心好過啲，選擇將責任推畀我當事人！」

律師步步進迫，仗義執言，最後講出關鍵：「最重要係，證人指出我當事人『烏低身』，但佢並唔係眼瞓，而係想幫死者抆鞋。基於疑點利益歸於被告，請判我當事人無罪。」

再多嘅法律程序，我都唔太記得，我只記得責死自己個仔嘅男人一殼眼淚、一殼鼻涕，喊到聲音沙啞。

搞到無辜受牽連嘅我都開始同情佢。我忍唔住諗，責喺兒子身上嗰刻，身體會有咩感覺？

佢離開證人席，彷彿走出兩行血路，血正正喺佢身上流出嚟。

理所當然，我被判無罪，我乜都冇做錯，只係咁啱咁橋被血濺中啫。

而發叔欠我嗰餐茶，都仲未找數。

（完）

 

鍾意嘅請Like我Facebook Page 😀