【外賣仔日記】（而家八點）可唔可以凌晨12點先送上嚟呀？

之前有一個客好神奇嘅，叫咗嘢食，但係佢竟然唔係屋企，雖然本身係有機制去處理一個唔響屋企嘅客，但係嗰客嘅要求簡直係神奇呀

嗰客係住緊一幢保安好森嚴嘅大廈入面嘅，基本上保安現場打intercom 搵唔到嗰客，都唔洗旨意上樓呀。嗰陣我去到打intercom係無人聽嘅，咁我就要call嗰客睇下佢響邊啦

嗰陣時係夜晚8點左右

嘟～嘟～

客：「喂 ～！」
我：「你好呀，你係咪嗌咗外賣呀？」
客：「係呀，但係而家無人響屋企喎，你可唔可以12點先送嚟呀？」

Hello？你好似係嗌咗外賣喎，凌晨12點先送？而家夜晚8點喎？

我：「唔得呀，唔好意思」（非常溫柔咁同佢講，其實背後係咁問候佢家人）
客：「咁你等我一陣 ～！我轉頭call返你啦，睇下有冇人代收」
我：「ok」

跟住之後就收咗線，然後等佢電話

過咗2分鐘之後，嗰電話響

客：「喂，你好呀，我個工人姐姐會響5分鐘之後返到嚟大堂呀，你交俾佢啦」
我：「咁ok啦 ～！」

阿小姐呀，你係嗌咗外賣架，係你親手撳嗰app架，點解你可以響街然後仲要12點先返到屋企呢？咁你嗌外賣嚟其實係做咩架？

專題：【外賣仔日記】

作者：外賣仔

閱讀後覺得好，請多多讚好及分享～：）