【塔羅個案】「男朋友話我好 Chur 我唔覺囉」,對唔住,但係我對你男朋友深表認同

文教 / 最新文章綜覽

 

 

早前寫咗兩篇文,分別係《因為網上寫文章,我重遇返八年前失聯嘅呢位客人,佢話我改變咗佢人生》同埋《個客母親離逝,佢問「有無方法令我忘記呢件事?」》派咗唔少洋蔥,我收到唔少讀者投訴話我呃左佢地好多眼淚,好啦,對唔住,今日寫其他。

「Chur」呢個字,相信唔需要我多講,大家心中都會閃過一啲人,一啲說話,或者一啲畫面。

當日阿芬怒氣沖沖咁黎到我舖頭,話想問感情,原因係男朋友剛剛同佢提出分手。我並唔係第一次見阿芬,上次佢同樣地因為同男友嗌交而黎搵我,當時我話「你一定要比啲時間佢,控制下自己嘅脾氣。唔係話男朋友啱哂,但係如果你唔想同男友再僵持落去嘅話,自己先作出讓步先會有轉機。」

「嗰次我聽完你講,我聽你話,我忍,我低聲下氣 Send 個短訊同佢講,對唔住,我知自己脾氣唔好云云,點知佢已讀不回我喎!」阿芬雙眼瞪得滾大,「喂,而家我同佢道歉,係咪都應該應下機呀?但我記得你話我地要冷靜一陣,所以我都等左兩個鐘先爆佢。」

我個心不禁飄過一句:如果兩個鐘就係冷靜期嘅話……但係,我未有機會出聲,因為阿芬仲係侃侃而談講緊自己有幾唔 gur。

「我都比足面佢啦,你話架嘛,一段關係唔會得一個人啱哂,我都道左歉啦,仲想點呀?我打左幾次比佢,佢唔聽,我知佢未瞓架,因為我見到佢 Facebook 仲覆緊朋友留言。」阿芬個樣有少少不屑,「我見到之後更嬲,即係話我對佢黎講,連佢班朋友都不如啦?係咪咁話?結果佢唔聽我電話,我咪惟有狂 send 短訊比佢問咩事,問佢想點囉!點知佢話我好 Chur,所以分手啦!我唔 Judge 係咪你上次開牌唔準啦吓,但係,我 Chur?我邊度 Chur?我都平心靜氣同佢講道理啦?」

我又露出一個「/w\」嘅表情。

即係咁,阿芬對男朋友 Chur 唔 Chur 我唔評論,但係,至少我覺得佢對我係好 Chur 的。入左黎十五分鐘,占卜時間都就黎完,我都未講到一句野,都唔知話佢黎搵我到底係想開牌,定還是搵我告解。每次我想插嘴(或者直接啲講,係眼見時間無多想 Stop 佢),佢就會「比我講埋先」咁樣一句收我皮,你話我唔 /w\ 就假啦。

上次我叫阿芬冷靜下,結果當晚就返去爆男朋友大鑊,老老實實,咁已經同我比你嘅建議背道而馳。你可能會話,會唔會爆一下就有咁大影響呀?答案就梗係會啦,都話左要你冷靜,結果你冷靜幾個鐘就爆人,喂呀,人地就係因為你脾氣唔好同埋 Chur 先有壓力,你而家狂打電話又短訊千字文咁,人地唔發癲就假啦。

如果你真係聽我講,乖乖地,比少少耐性,比男朋友覺得你真係想自我改善,件事就當然有轉機;而家,當然就神仙都難救。何況,阿芬一直怒氣衝衝,我都叫佢問心,「你想同佢復合,係因為條氣唔順、覺得自己被判死刑判得不明不白吖,定還是你真係想為對方好、愛佢、想同佢有將來?」

阿芬,靜左。

感情嘅野,雙向架。你有想法時,對方都有感受。感情,或者人際關係,之所以咁多年黎都係解不盡說不清嘅話題,正正係因為人與人之間,有太多難以用文字說明嘅化學元素,而人地點諗,好多時都唔到自己控制的。可以做到控制人地思想嘅,咁唔係愛情,咁樣就係邪教,係痴左線架啦。

「即係你都覺得我好 Chur?」聽完我講完一大輪,阿芬忍唔住細細聲問。

「……可以有更溫婉嘅空間。」我苦笑,「至少,你都要比機會自己去理下其他人嘅想法,而唔係咩都以自己為先,希望你唔好介意我咁直接。」

係呀,我好直接,兜圈氹你無用,你一陣 Get 錯我想表達嘅野仲死,年中有好多聽啲唔聽啲嘅客,件事不如意就走黎怪我,我真係心諗……

 

【塔羅牌個案分享】

後生女教友畀已婚傳教士搞大個肚唔認數
你話想生仔我咪唔避孕囉,我家下有咗你就叫我落?
名校老師婚外情的故事
女人就黎三十歲仲係 A0 係咪就叫有問題?
中女不諱言「我有 SP,但我唔會同我老公離婚」
老師的成功要訣:識人、埋堆,攀附權貴;作育英才已經行唔通。
邊個講出「分手」兩個字,邊個就係萬劫不復嘅千古罪人
女性客戶開口埋口「我認為」,咁你有無理過對方點諗先?

 

 

關於作者:神婆

神婆
非典型占卜師,唔神秘,無形象,除了鐘意聽客人講故事,夜間興趣係打機睇動漫同撚貓。https://www.facebook.com/FortunaMessage

我有回應

則留言

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。