【愛情實況系列】寂寞妹妹主動搵大叔，真係會有好結果咩？

近年網上情緣騙案越嚟越多，每次聽到，大家都會疑惑：「點解咁都有人信？點解啲女仔咁易呃？」我曾經就以上嘅問題，問過一位善於寫社會實況故事、寫過情場騙子呢類劇本嘅編劇朋友，佢嘅答案係：「寂寞嘛。」原來「寂寞」兩個字威力咁大，呢個答案，令我想起一個同「寂寞的心」有關嘅故事。

有位中年大叔，四張幾野，個人粗野唔型仔唔靚仔，仲要係窮撚一條，冇特殊技能，更加冇所謂事業成就，比較慶幸嘅係，到咗咁嘅年紀，佢都冇地中海又冇大肚腩。至於對女仔，佢真係一啲都唔認識，曾經呼籲女仔唔好喺感情上依靠男仔，靠自己好過，結果俾一個失戀多年兼一直搵唔到第二春嘅女仔批評：「你太唔明白女仔個心啦。」大叔聽到人哋咁話佢，心諗：「又係播。」不過講都唔信，一條咁嘅麻甩佬，竟然都會有老婆。人生，就係咁奇怪！而更奇怪嘅係，竟然會有一個寂寞的心主動搵佢。

話說有一日，大叔收到一條FACEBOOK MESSAGE，係佢一個女同學嘅細妹。大叔同呢位女同學嘅細妹，只係兩年前有過一面之緣，之後就再冇聯絡，咁突然收到佢嘅FACEBOOK MESSAGE，都要由個女仔再介紹自己一次，年紀大而記憶力日漸衰退嘅大叔先至記得翻。用MESSAGE傳咗幾句，大家客客氣氣一輪，就約出嚟食晚飯，當係聚吓舊。

見面當晚，當然又係先閒話家常。冇幾耐，同學細妹就開始講一樣困擾咗佢好多年嘅問題──冇拖拍。佢仲好坦白咁同眼前呢個完全唔熟嘅大叔講，話唔明點解自己咁多年都搵唔倒對象，好想盡快有拖拍。好明顯，坐喺大叔面前嘅，係一個超級寂寞的心，仲要係好心急嗰種，因為都芳齡三十幾，再過多幾年就四十，係一個女仔大限嘅年紀。大叔雖然對異性近乎無知，都知道年紀係女仔最大敵人呢個事實。

睇到呢度，大家都可能會開始以為同學細妹想主動溝已婚大叔。有咁嘅諗法好正常，但係就完全諗錯隔離。同學細妹雖然同大叔唔熟，但都知大叔一早結咗婚，又點會盲頭烏蠅亂撞？大叔亦好明白呢點，所以從頭到尾都冇誤會。同學細妹好直接、甚至帶有哀求咁同大叔講：「你幫我介紹一個丫。」原來佢主動約大叔嘅目的，係為咗揾大叔做佢媒人。

「你幫我介紹一個丫。」呢句真係非同小可。大叔一心諗住食飯聚舊，點知會聽到一句從來未聽過嘅驚嚇說話。大叔好苦咁話：「我點幫你呀？呢啲嘢我都唔識。」同學細妹係咁求佢：「你幫吓我啦，我知你一定有嘅。」佢嘅意思，根本即係話肯定大叔有筍盤在手，而且一定可以幫倒佢。

大叔就更加唔明白，於是問：「我根本唔識，亦從未做過媒人，你點解搵我喎？」同學細妹於是講：「我家姐話你好叻，係個智者，所以咪搵你幫手囉。」原來係大叔同學做嘅好事。呢個同學，讀書叻、做嘢叻、交際叻、投資叻、搵錢多、結咗婚、有個女、勁幸福，絕對係人生勝利組。大叔心諗：「你家姐點叻都好，都唔應該咁樣整蠱我丫！」於是就對同學細妹講：「我邊度係智者？唔好聽你家姐亂講。」可惜，同學細妹根本聽唔入耳，只係一味懇求。咁又係嘅，等咗咁多年都冇，而家約倒個可能幫倒佢嘅大叔出嚟，甚至可能係唯一希望，又點會咁易放棄丫！

同學細妹不斷苦苦相求，大叔雖然一向對女仔不解溫柔，但見眼前呢個女仔，如果唔係近乎情場絕望，都唔會搵自己做媒人，於是就起咗同情心，終於答應做一件自己從未做過嘅事──幫女仔介紹男朋友。

大叔知道個女仔係付出好大勇氣先會將自己最大嘅私隱講出嚟，怕佢難堪，於是當晚嗰餐飯就主動請個女仔食，然後送佢返屋企，仲一路好言安慰，話佢係個好女仔，一定可以搵倒自己嘅幸福，同時一再保證絕對尊重佢嘅私隱，唔會講出嚟。

當晚嘅事結束後，大叔真正嘅麻煩就嚟到──去邊度搵個男朋友俾佢？

大叔心諗，其實個女仔生得幾好樣，性格亦唔錯，冇拖拍，應該只係得一個原因──佛系，緣份未到。緣份嘅嘢，點到人話事，不過既然答應咗人，大叔只好勉為其難做一次媒人。佢逐一比較身邊嘅AVAILABLE男仔，發覺有一個大過個女仔兩年嘅或者適合。於是，就安排一次戶外活動，等佢兩個互相認識。之後，大叔又安排一啲音樂會，等佢兩個一齊去聽。至於往後點發展，大叔就一個字都唔過問，因為大叔只係一心想盡快甩難。

一年都未夠，大叔收倒一個電話，係個男仔打嚟，佢話：「我哋就嚟結婚，好想你嚟婚禮。」然後，電話裡頭出現同學細妹把聲：「你嚟啦，我哋好想你嚟呀。」聽到咁樣，大叔都好開心，不過就婉拒咗佢哋嘅好意。大叔心諗：「一出席婚禮，就會俾人知道係我做媒人，咁仲得了？」婚禮同蜜月之後，佢哋再約大叔出嚟食飯，仲帶大叔去睇佢哋新買嘅樓。原來個男仔都搵倒吓錢，為新娘子買咗層樓。新郎哥新婚之後仲轉咗去一個大財團做嘢，人工跳升咗好多，真係喜上加喜再加喜。兩個人婚後嘅生活，非常幸福。

至於有冇媒人利是？當然冇，大叔根本唔敢認自己做過媒人。唔單只咁，佢仲千叮萬囑兩位新人：「千祈唔好話係我介紹呀，如果唔係實俾人笑死我架。」其實，大叔更驚嘅係，一旦俾人知道，就好可能會有其他寂寞的心搵佢介紹。一對新人亦都好尊重大叔，一直冇講出嚟。

經過呢件事之後，大叔見過鬼怕黑，雖然自己身邊仲有好幾個AVAILABLE嘅男神筍盤，但提都唔敢提，否則俾啲寂寞的心知道，真係唔得店。

上述嘅故事，值得其他大叔引以為鑑，避免麻煩。至於同學細妹，大膽主動去追求自己嘅幸福，終於得嘗所願，亦實在值得一讚。今時今日，如意郎君唔係咁易搵，女仔多做主動，效果可能更加好架。

【愛情實況系列】

老夫少妻？公司總有個八婆會幫你棒打鴛鴦……
姐弟戀，你 / 妳接受到相差幾多歲？
如果女人要俾帽你戴，買埋層樓俾佢都無用！
一對閨密好姊妹，同時鍾意一個男神，點收科？

作者：問世間

不善談情，但求懂愛；不作失實，但求寫實。

閱讀後覺得好，請多多讚好及分享～：）