「唉，得佢一個先會唔開心呀？成日係到扮哂慘，個個都有野煩架啦」

人生入面，試過好幾次瀕臨情緒崩潰既邊緣。
第一次係中五個年見證屋企家暴，我老豆扯住老母把頭髮撼落一個hard surface(唔記得啦，人太驚記得既野好零碎），我無出聲。得我一個人，成個人震哂，淨係識哩係房禁住個口喊。

第二次，我老豆衝入廚房拿刀嚇我。最後我鼓起勇氣報警，自此之後老母就日日鬧，點可以報警拉老豆，XYZ點點點….仲叫我唔好再係屋企住，年少氣盛既我就立左幾套校服半夜走左去。
感激當時有個媽媽級既好朋友收留左我一個禮拜，然後去左住宿舍。

個段時間我好驚，日日淨係縮埋，唔想同人講嘢，好無安全感。可能大家中學雞，又或者我本身無埋堆，經常係老師口中/ 耳語聽到其他人話我好怪，唔講野，木無表情（大個左先知masked face本身就係抑鬱症狀，當時只係知道自己好唔開心。）風言風語，落井下石既，想激嬲我睇我發癲既都有。

然後去到讀左大學，搬左返屋企諗住過左咁耐會有改善，後來發現係大錯特錯。
我老豆係會小小事都挑剔我，比如無拉好櫃桶，洗衫哂佢啲電，etc，一唔高興就大聲喝，用拳頭打我房門要我開門比佢鬧…..數唔到仲有幾多樣。我開始神經緊張，聽到拖鞋聲就心跳加速，好易mung，成日覺得其他人都係唔鍾意我，even對方無呢個意思，我都好小心翼翼好驚；好想離開呢個環境，但又無錢。當時夜晚經常自己一個人坐係公園度諗，我應該去邊好？我好唔好唔再讀書出嚟做嘢然後搵個地方自己住，呢個世界咁大唔通真係冇一個地方可以比我繼續生存，係咪應該死咗佢好過？

其他人好似都好開心，得我一個好苦惱，我唔想係咁同身邊嘅人講我點sad，之後我就開始冇再同身邊嘅好朋友聯絡，然後好任性地用哂啲錢去左台灣幾日，因為真係好需要離開一下休息一下。點知我老母就趁我離開咗屋企呢幾日將我啲嘢全部執好晒跟住就同我講你返嚟香港之後唔使再返屋企啦。

件事最後都解決左，好感激一個好好嘅朋友屋企有間空房邀請我去住，只係收我友情價嘅租。係離開咗呢個環境之後，再加上去咗搵輔導，慢慢慢慢咁就走出咗個陰影。唔知係好事定壞事自己怕死又怕痛，就算諗過死，最後都唔敢。（再加埋有好多野未做過又有啲唔甘心咁啦，甘我老母）

我想講嘅係，係呢段時間裏面，開頭朋友都會關心我，到後來輾轉係其他人口中聽到佢哋原來係我背後會話：
「喂，你去關心下佢啦」
「下，唔好啦」
「唉，得佢一個先會唔開心呀？成日係到扮哂慘，個個都有野煩架啦」

當時個朋友圈入面甚至有一個我心儀既對象，曾經曖昧過，佢就係話：「吓，唔好啦嗰個。」可能我leave朋友個grp，佢哋覺得好扮野，attention seeking，係，我真係好驚、覺得好孤獨，睇住其他人日日都好開心咁飲飲食食，同男女朋友出街，自己就有咁多嘢諗，更加覺得自己好奇怪，唔屬於呢個地方，先想離開。睇到張whatsapp cap圖，一下就覺得成個世界冧左，我信任既人，原來無人可以拉到我一把⋯⋯

每次當有公眾人物因為情緒問題自殺身亡嘅新聞，都有好多人覺得唔開心，好震撼，話希望更加多人關注情緒健康呢個issue。奇怪嘅係我發現原來我經歷嘅嘢一啲都唔少見，原來有好多人話俾人聽自己唔開心可能都會得到一啲好負面嘅feedback。可能係我唔識同人相處，又或者係我咁岩真係唔好彩遇到啲唔係咁識處理呢種情況既人，其實想幫佢哋，只係需要聽下，唔好批評佢嘅感受，就已經幫咗好多。

曾經有一個朋友，同我講完一大輪野之後先至同我講，其實之前嘗試過自殘，已經打算自殺，但係講咗出嚟之後又覺得自己好返好多，即使成個過程入面我淨係點頭示意我仲聽緊。

最後想講吓坊間一啲機構嘅計劃，有個輔導員會同你傾下點樣可以令自己嘅生活重返正軌，因為有抑鬱傾向嘅人每一日瞓醒就係唔想做嘢唔想食嘢淨係會覺得情緒好低落，容易陷入一個惡性循環，透過一啲呼吸練習/日常作息嘅規劃同埋心理輔導去改善自己嘅情緒，當時真係幫咗我好多：）當然我諗我呢個情況應該唔算係好嚴重嘅抑鬱，係解決咗主要成因之後就已經開始慢慢回復，但都希望可以幫到更加多人：

香港心理衛生會
http://www.mhahk.org.hk/chi/index.htm


好希望唔會再見到有人因為情緒走上不歸路。

作者：無熱情的臭閪

閱讀後覺得好，請多多讚好及分享～：）