【塔羅個案】三十七歲中女表示:「阿邊個議員都有人要兼生得出,我單身都突然有返哂信心囉!」

文教 / 最新文章綜覽

 

(客戶心態不代表個人立場)

 

阿琪搵過我幾次,佢做航空業,樣同身材都唔差架,奈何屢次遇人不淑,近年幾次散拖,唔係男朋友偷食,就係曖昧緊嘅對象無啦啦同左另一個女仔一齊。

「其實都咪話唔灰,我自從大學畢業之後好似無遇啱過人。」阿琪當時閹閹地,「我照鏡,望住塊鏡笑,我心諗,都仲算係人樣吖,我又唔駛男人養,我照顧到自己喎,性格唔完美但都算正常人吖,點解會成為仆街磁石架?」

咁阿琪又講得啱呀,我遇過唔少好似佢咁條件唔差,亦唔係識唔到男仔嘅女性客人,但係唔知係個人當黑,定係資源錯配,又或者得罪講句無帶眼識人,唔係遇著啲 Player,就係遇著啲浪子。

我記得上次送走阿琪時,佢係黎問一個男同事對佢嘅睇法,最後……人地只係職場找樂子,唔係想認真,所以我狠狠地收左佢皮。我仲好記得當時阿琪沮喪嘅樣,「我下星期就 37 歲啦,以前細個,以為 28、29 歲就已經差唔多結婚,無諗過而家搞成咁……」

我當時亦都好老實咁同阿琪講,阿女呀,你睇人好,人睇你好嘅啫,唔係話天下無真愛,我係見過好多快樂 Couple 有情人終成眷屬,但係我亦見更多扭曲愛情觀+破碎婚姻,例如婚禮前一個月發現另一半出軌呀、結婚後一個發現對方搞上自己姐妹呀……你以為睇劇先有呀?本來就戲如人生架。

「所以,搵唔啱人就不如諗下自己點樣生活開心啲好過啦。」我最後咁講。

阿琪當時好失落咁離去。

事隔一排,阿琪興高采烈咁黎搵我,「神婆,我有返希望。」

正當我以為佢有第二春或者升職加人工所以咁開心嘅時候,阿琪雙眼 Bling Bling,「連阿邊個議員都可以咁大年紀未婚懷孕有人埋單,我覺得我仲有希望囉!」

我聽到呢度一秒噴茶。堅噴。要抹手嗰隻。嘩阿琪你開名還開名,人地無承認過自己有孕架,官方講法係無架,至於人地拍拖幾耐我都唔知架!戴哂頭盔先!

不過,如果阿議員嘅經歷,令到一班進入中女年紀嘅單身女子對未來重燃希望,都可以話係對社會一大貢獻吖,講政績我就咩都諗唔起架啦,比到鼓勵班姐妹都算係造福人群嘅~

 

【塔羅牌個案分享】

後生女教友畀已婚傳教士搞大個肚唔認數
你話想生仔我咪唔避孕囉,我家下有咗你就叫我落?
名校老師婚外情的故事
女人就黎三十歲仲係 A0 係咪就叫有問題?
中女不諱言「我有 SP,但我唔會同我老公離婚」
老師的成功要訣:識人、埋堆,攀附權貴;作育英才已經行唔通。
邊個講出「分手」兩個字,邊個就係萬劫不復嘅千古罪人
女性客戶開口埋口「我認為」,咁你有無理過對方點諗先?

 

 

關於作者:神婆

神婆
非典型占卜師,唔神秘,無形象,除了鐘意聽客人講故事,夜間興趣係打機睇動漫同撚貓。https://www.facebook.com/FortunaMessage

我有回應

則留言

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。