有段日子一個人夜晚搭車返屋企，就會一邊聽盧凱彤嘅〈一個人回家〉，一邊側頭望住窗外嘅街景，眼淚就會不由自主咁流出黎。有時唔知我流淚係因為佢寫得到我嘅感受，定抑或係首歌令我感受到佢嘅感受。我只知佢嘅歌令好多人有共鳴，因為佢表達左內心破碎嘅人經常經歷但好難表達到嘅感受，令聽者喺嗰一刻感到被理解，心底嘅鬱結亦稍微舒解。但我諗佢喺作品寫到出黎嘅孤寂同痛苦，應該只係佢經歷過嘅其中好少部份，佢所經歷嘅係更深刻更真實嘅黑暗。