點解咁少人認識公司秘書Com Sec 呢個行業？

上一篇文章提到公司秘書嘅工作性質、前景、行業前景、入行所需技能等等。有人可能會問，點解Com Sec咁少人認識呢？筆者認為不外乎三個主要原因。

行業獨立性強

相對於HR、Admin以及Marketing等等常規部門，不是每一間公司都存在著Company Secretarial Department或隸屬Legal Department嘅Com Sec同事，Com Sec需要與其他部門合作機會不多。對內，Com Sec接觸得最多嘅In-house部門依次係Legal Department、Accounting Department、Corporate Communications/Investor Relations Department及其他需要就不同申請向第三方提供BR、CI、Annual Return等文件的部門。對外，Com Sec接觸得最多嘅係外騁律師、Auditor、Offshore Company Agent、Financial Printer、Retail Banking(客戶為普通市民及中小企)或Commercial Banking(客戶為大型私人公司／上市公司) 銀行職員。

因為Com Sec屬於Legal and Compliance範疇，最了解Com Sec行業嘅人，非律師莫屬。

而對呢個行業一知半解嘅人，有唔同反應：
會計部同事：Agreement我哋唔識睇，交俾你哋啦。
Auditor：Com Sec做乜？佢哋要負責做Minutes/Resolutions、Annual Return、Listed　Co嘅話，年報有部分佢哋要負責，成日追佢哋拎嘢追到氣咳都拎唔到。
銀行職員：要問佢哋拎BR、CI、Certificate of Incumbency、O Chart做Customer Due Diligence，有時會幫手跟吓Bank Account、Banking Facility。
人事部：做呢行最緊要有HKICS Membership同埋係Associate，你有無牌呀？有無考慮過進修？
其他同事：係咪秘書處呀？我想搵阿張總呀。
中小企老細：做少少嘢收幾千蚊，平啲得唔得？

亦有部分上市公司董事／股東不知道公司秘書實質要做乜，但大約知道一間公司係交易所上市係要守規矩，少部分公司更視Corporate Governance如無物，架構亂七八糟。

傳媒甚少報道

行頭窄，目標受眾少，新聞價值不大，大眾媒體甚至係網媒，主要報導圍繞專業投資者會關心嘅有關上市公司擔任公司秘書嘅情況，偶爾會因公眾人物為某公司董事及／或股東，疑似涉及利益衝突，「公司結構」（而非公司秘書行業本身）呢個Com Sec工作性質的周邊範疇跟民生及／或政治新聞扯上關係時，因社會關注而作出相關報導。

要提及公司秘書行業新聞，不得不提2016年發生嘅兩件事件：中銀香港嘅內地高層獲港交所豁免專業資格，擔任公司秘書；以及一間知名律師樓遭傳媒揭露一批該律師樓離岸公司客戶嘅機密法定紀錄嘅巴拿馬文件 (Panama Papers) 事件。

由於傳媒就Com Sec行業提供的資訊不多。一般人不求甚解，以第一印象作為判斷標準。對於Com Sec嘅印象，常見嘅回應由最偏頗式回應「你做公司秘書？哦，即係做秘書，專坐老細大脾！」、三姑六婆式回應「心女，做秘書無前途呀！你睇下傑仔，佢而家做緊政府工，好有前途，下刪一千字……」、乃至普通朋友式反應「公司秘書呀？即係乜呀？秘書？」不等。

一般人對於Com Sec嘅形象就係以呢種以訛傳訛嘅形式傳到不同人嘅耳中，形成偏見。

行內人甚少分享

絕少Com Sec行內人分享行業資訊。要數講解Com Sec最詳盡的網上文章，係某知名討論區數年前發起的一個帖文，筆者從該帖文中得到唔少啟發。

呢一行有一種生物名叫「變態阿姐」（不是呢一行獨有，但不知道為什麼呢一行特別多），佢地嘅特點係事事管住、鍾意鬧人、死不認錯。前線人員工作壓力大，工作滿足感低落，因為有心理陰影，令到大家都唔敢出聲，生怕講多錯多，返工已經俾人鬧，上網講錯少少野又會俾人鬧，大家實行少做少錯。

此外，香港教育制度加深「少做少錯」文化。填鴨式教育著重標準答案，不鼓勵大家問問題，主動提問嘅人變成大家眼中嘅「異類」；喺呢種文化成長下，人嘅自尊心變得很強，「不敢提問」背後唔係謙虛低調，而係擔心被人拒絕或取笑會無面子，另一方面失去「可以責怪嘅對象」，心裡面其實係到諗「車，我都識啦，只不過係我唔問同唔答咋嘛」。心裡認為不做一件事，無任何人可以怪責佢，認為人哋因此唔知道佢底蘊如何。

「分享？平時返工對住啲字仲唔夠咩？放工有時間都出去玩啦！仲打字咩，變態！」

「你咁嘅質素學人分享，想笑死人咩！」

「有人寫嘢講Com Sec喎（暗地裡同朋友分享）。」

總之，無人肯做「爛頭卒」。

筆者相信將公司秘書行業資訊透明度提高，有助促進行業發展，一個人的力量有限，唔知道大家又願唔願意一人行多一步，一齊分享行業資訊呢？

作者：吾係秘書——卡比

公司秘書Com Sec呢個行業經常被人誤會為「秘書」，喺呢個既Tedious、沉悶、多女人嘅困獸鬥中搵一片樂土寫文自High。

閱讀後覺得好，請多多讚好及分享～：）