如果你愛國,請務必繼續討論「港獨」

圖文不符

 

從愛國嘅立場嚟講,「港獨」係要討論嘅。

香港人因為種種歷史原因,發展咗自己一套嘅文化認同、政治認同,大異於中國內地。呢個政治現實,係中共治港策略上嘅一大難題。

香港人嘅國家觀念薄弱,缺乏國民意識,普遍香港人不甘受黨中央指揮,以致中央有感香港人唔夠「愛國」,在未能保證港人會選出「愛國」嘅特首之前,遲遲未落實《基本法》45 條,使得「一國兩制」嘅實踐蒙上一層揮之不去嘅陰影。

《基本法》 45 條之所以至關緊要,係因為全國人民大會透過《基本法》授權香港嘅權利當中,中央政府保留嘅權利唔多,實質上能夠實踐「一國」原則嘅方法,就係要確保香港特別行政區首長能夠如 45 條所規定向中央負。中共對特首嘅底線,係「愛國愛港、中央信任、有管治能力及港人擁護」。講到底,如果特首由香港人普選產生,中共就要信任香港人能夠選出付合呢啲條件嘅特首。

好明顯,喺今日嘅政治環境下,中共對香港人冇呢種信任。事實上,幾乎每一個香港人都有少許天然嘅「港獨」傾向。呢個 “inconvenient truth” 大家係知道嘅。喺中國特色社會主義之下,國家實行民主專政制度,由共產黨領導。但香港大部份人卻係情緒上抗拒共產黨,忽略「一國」嘅存在,企圖靠「兩制」之護蔭抵制中央對香港嘅治權,將「高度自治」當成「自治」,從某種嚴格定義嚟講已經係一種隱然嘅「港獨」傾向。

呢個係香港政治現實嘅根本問題,一日唔解決呢個問題,香港嘅政治制度永遠無法向前,就算中共中央不斷堅決高舉「一國兩制」大旗,問題唔解決,「一國兩制」嘅發展必然停滯不前。然而,問題應如何解決呢?基於「港人治港」嘅原則,中央政府係唔可能大舉派人來港直接實踐國民教育,但靠香港政府及香港教育界,又未見成效。老實講,香港官員及教育界人士經過多年英殖洗腦之下,國民意識薄弱,就算幾年前嘅國民教育政策冇因反對聲音而閣置,實踐起嚟效果亦不見得會理想。憑空構思出嚟嘅「國愛教育」,欠缺「在地」嘅內容,亦未必令香港人留下深刻印像。呢啲都係推行國民教育嘅實際難題。

喺呢個情況下,近年「港獨」輿論興起,對國家係固然係一個「危」,但亦不失為一個「機」。眾所周知,「港獨」對國家、對香港,都係有害而無利嘅。只要深入探討,理性辯論,所有香港人都應該會明白「港獨」嘅禍害,並且著力阻止任何人推行「港獨」。呢個過程,係一個向香港人施行愛國教育嘅機會。透過更多、更廣泛、更深入嘅討論,香港人就會留下深刻印像,明白「港獨」嘅禍害,亦令香港人更清楚了解「一國兩制」嘅內容。

今時今日,只有少數被異端邪說迷惑嘅香港人誤信「港獨」思想,絕大部份香港人其實係明白事理嘅。香港嘅建制派,溫和民主派,都已經表態明確反對港獨。呢兩個派別,加起嚟已經代表咗絕大部份香港人。所以,只要順手推舟,喺「反港獨」嘅共識之上加以補充,就可以製成一個能夠被廣大香港人接受嘅「國民教育」藍本。雖然呢個藍本同中國特色社會主義之下嘅「愛國」概念有所距離,但推廣「愛國」思想嘅事業並非一時三刻嘅事,不宜冒急,穩步前進勝於固足不前,起碼不至於使討論陷入泥漿摔角。

古哲有云:「防民之口,甚于防川。川壅而潰,傷人必多,民亦如之。是故為川者決之使導,為民者宣之使言。」香港社會對「港獨」嘅討論,係一種凝眾社會「反港獨」共識,建立香港人國民意識嘅大好機會。若將之堵塞,不但令香港人少一個認識「一國兩制」嘅機會,更加會有「越禁越火」嘅危險。如果社會上未對「港獨」禍害充份討論,少數未清楚關鍵嘅香港人,或者會因此而作出過份激進嘅行為,誤己誤人。

所以,在愛國人士嘅角度,「港獨」係必須討論嘅。唔單止應該討論,更加應該廣泛地、全面地、深入地討論,務求香港社會得出共識,令每一個香港人明白「港獨」之禍害。眾所周知,「港獨」係唔可能發生嘅,所以當中嘅討論亦唔會當真危害國家完整性。只要呢一輪「港獨」熱潮過去,香港人就會好似打咗一支「愛國疫苗」,將「一國兩制」、「反對分裂國家」嘅思想內化,日後會成為更加愛國愛港嘅良好中國人民。

如果你係愛國嘅香港人,請你唔好禁制「港獨」言論,必須從理論上、實踐上、道德上,全方位將之擊倒,為香港人嘅「心靈回歸」打上堅實嘅基礎!

 

關於作者:散彈一號

散彈一號
全職文字工作者、應用哲學家。對「邏輯一致性」、「系統複雜度」之類的偏門學問獨有心得。在美利堅合眾帝國邪惡資本主義集團的領導下,嘗試改變世界。

我有回應

則留言

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。