隔幾日有人就打俾HR 問:「點解我老公收咁夜?」…我應該點答?

 

 

相信大家都聽過唔少有關阿爸阿媽陪仔女見工、要求參觀下仔女嘅工作環境,或者代仔女請假嘅故事。小編以下哩一位同事雖然無咁嘅直昇機父母,但係就有幸娶左一個好似阿媽咁對佢無微不至嘅老婆……

同事 T 係一個中年侍應,平常前線嘅工作需要輪班,佢加入左公司無幾耐, HR 嘅同事已經分別收過佢老婆嘅電話,而佢老婆平均每幾日就會打黎 HR 一次。根據非正式統計,T 老婆一般打電話黎嘅主要目的有以下幾個:

 

1)「我想知我老公今個禮拜嘅更表!」

其實個更表係 T 嘅主管編嘅,而且應該早就通知左 T,如果佢自己問老公,件事會簡單得多,除非佢有理由相信佢老公俾佢嘅資訊唔正確……

 

2)「點解我老公唔可以放梗禮拜日?」

眾所周知,服務性行業通常假期先係最忙嘅日子,你問小編點解你老公唔可以放梗禮拜日?咁就要問返你老公點解要做侍應啦。再者,更表係主管編嘅,有要求可以由同事本人直接同主管溝通,樣樣都黎搵小編,當小編萬能咩?老實講,如果剩係你每個星期日都放假,其他同事無得放,你估佢地會點諗?要解決哩個問題,可能要改變一下喺香港地大家對前線員工嘅睇法啦……

 

3)「點解我老公要返工返到咁夜?」

Er……公司係開到咁夜,你可以嘗試問下腦細,因為小編真係唔識答你。小編都唔鍾意見到其他人返工返到咁夜,但每個前線嘅同事都有機會輪到夜班。公平架喎……

 

4)「點解我老公返工咁辛苦?」

………

小編都想問下,點解返工會咁辛苦?咪就係因為有哩啲員工囉……最重要嘅一點係,大佬呀,你入職嘅時候同你講清楚哂架啦,入左黎先哩樣嗰樣。合則來,不合則去,唔岩嘅你咪走囉,做咩要搵個老婆黎出面?不如小編又問一句:「點解你係咁代你老公講野,到底係你返工定你老公返工?」

 

唉……又好似肥仔文咁,說好的男人呢?

 

【職場膠事】

 

關於作者:HR 扮工週記

HR 扮工週記
HEA 到核爆、哩埋係枱底畫下圈圈直至 2046 退休既 HR,同大家分享一下每一日 HR 平淡既生活。

我有回應

則留言

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。