公眾人物暴死翌日，我如常過活，如常日入而作，而我細妹如常放例假。難得佢日間有閒，我地就相約午飯，大破慳囊，幫襯一間晚市食唔起但午市尚且可以接受嘅高檔日式料理。入座之後，大概係因為氣氛和洽而且鮮膾之味合乎預期，而且大家正經對坐之時，話題從來難得，如同人類不知不覺跟隨宿命播弄一樣，我地談及咗盧凱彤之死，以及情緒問題，諸如此類。講咗兩講，我居然聽到用字大約如下嘅一番說話：「其實我同媽咪覺得你由細到大都有病，但係我地慣咗之嘛。其實身邊嘅人唔當你有病，知道點同你相處，咪即係冇病囉。」